“Akwa Ubom Odudu”

ADAN̄A ndutụhọ didie ke Christian ekeme ndiyọ? Mfịn, mme Christian ke ofụri ererimbot ẹsobo unana, n̄wụre ubon, mfụhọ eke n̄kan̄ ntụk, udọn̄ọ, ekọn̄, ye ukọbọ. Nte owụt ifiọk ndidori enyịn ndisobo mmọ man ẹmụm nsọn̄ọnda ẹkama kpa ye kpukpru emi? Paul ọkọdọhọ ke owụt ifiọk. Enye ekewet ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.”—Philippi 4:13.

Mbụk owụt ete ke ukeme otode Jehovah ke akpanikọ ekem ke kpukpru n̄kpọ. Ke uwụtn̄kpọ, ke ini ukara Nazi ke Germany, Mme Ntiense Jehovah ẹma ẹsobo ibak ibak ukọbọ. Nte mmọ ẹma ẹyo? N̄wed oro Les Bibelforscher et le nazisme (Nditọ Ukpepn̄kpọ Bible ye Ukara Nazi) ọdọhọ ete: “Kpa ye kpukpru imia, ndịghe, ye ukpan, kpa ye an̄wan̄wa esuene, n̄kpọkọbi, ye n̄kọbịntem ke mme itienna ekikere, Nditọ Ukpepn̄kpọ Bible [Mme Ntiense Jehovah] akananam iyakke ‘ẹfiak ẹnọ mmọ ukpep.’”

Ke mme itienna ekikere, ẹkesidiọn̄ọ Mme Ntiense ke ekpri idiọn̄ọ oro edide ọsọbọita, emi enyenede uduot mmọn̄ibọn̄ oro ẹkesidiande ke ubọkọfọn̄ mmọ, ẹma ẹnyụn̄ ẹdianade mmọ ẹnịm ẹnọ san̄asan̄a ufen. Nte emi ama anam idem emem mmọ? Ekpepn̄kpọ mban̄a ekikere oro, Bruno Bettelheim ama owụt ete ke mmọ “ikowụtke n̄wọrọnda idaha uku owo ye eti edu ikpọn̄îkpọn̄, edi eketie nte ẹkpeme mmọ ẹsio ke ifiọk n̄kpọntịbe eke ukem itienna oro, emi ọkọsọpde ndisobo mme owo ẹmi mme ufan mi oro ẹkpepde n̄kpọ ẹban̄a ekikere ye ami ke idemmi ikekerede ke ẹtịm ẹdiana kiet.”

Ih, mmọ ẹma ẹnyene “ukeme ndinam kpukpru n̄kpọ.” Ntak-a? Koro mmọ ẹkeberide edem ke Jehovah. Paul ọkọdọhọ ete: “Nnyịn ikama ọsọn̄urua n̄kpọ emi ke aban̄ mbat, man akwa ubom odudu esie okpoto Abasi, itoho nnyịn.” (2 Corinth 4:7) Edieke afo edisobode mme idaha oro ẹtiede idomo idomo, ka bịne Jehovah ye mbuọtidem kaban̄a un̄wam. Ke ọbọde nsịnudọn̄ oto akwa ubom odudu oro enye ọnọde, afo eyekeme ndiyọ.—Luke 11:13.