Nso Iditịbe Inọ Ndisana Ebiet Christendom?

MME andimịn̄ n̄wed Holy Places of Christendom, emi ọdọkisọn̄ nnyom n̄kpọeset oro, Stewart Perowne ekewetde, ẹbụp ẹte: “Anie owo, inamke n̄kpọ sededi ido edinam Christian oro enye otode, ekeme ndidọk nda ke Itien̄kpa ke Ufọkederi Ediset ke N̄kpa [m̀mê, Ufọkederi Edisana Udi] ke Jerusalem ye unana edikop ndịk: koro mi ke ebiet emi ẹkponode ẹnyụn̄ ẹkam ẹn̄wanade en̄wan ẹnọ ke ediwak isua ikie, edi ata iwụk ebiet Christendom.”

Idụhe owo ndomokiet oro ekemede ndiwụt nte ke ẹkebọp ufọkederi emi ke Itien̄kpa, ke ebiet emi Jesus Christ akakpade. Ke akpanikọ, mbemiso Constantine, andikara Rome ekebierede ndibọp ufọkederi do, temple ukpono ndem okodu ke itie oro. Akande oro, Jesus ọkọdọhọ ete: “Abasi edi Spirit: ndien mme andituak ibuot nnọ Enye ẹnyene ndituak ibuot ke spirit ye ke akpanikọ.” (John 4:24) Mme utọ andituak ibuot oro ikponoke “ndisana” ebiet ẹmi ẹdade ubọk ẹnam.

Ini kiet ko, Jerusalem ekedi ebiet oro temple Abasi akadade ndien ke ntre ekedi iwụk ebiet edisana utuakibuot. Ke ntak unana edinam akpanikọ mme andidụn̄ obio oro, nte ededi, Jehovah Abasi ama esịn enye, nte Jesus ekebemde iso etịn̄. (Matthew 23:​37, 38) Jesus n̄ko ama ebemiso etịn̄ aban̄a nsobo iwụk ebiet ido ukpono oro, emi ediwak owo ẹkade iso ndida enye nte edisana ebiet. Ikọ esie ama osu ke ini mbon Rome ẹkesobode Jerusalem ye temple esie ke 70 E.N.​—⁠Matthew 24:​15, 21.

Prọfesi Jesus eyesọp ndinyene n̄kponn̄kan edisu ke idem ofụri ikpehe ido ukpono Christendom, emi enye ọdọhọde nte edide edisana ebiet. Christendom ye ndisana ebiet esie ẹsak iso kemi ẹse nsobo ke ubọk odudu asua ido ukpono emi ẹkotde “mbubiam n̄kpọ eke osobode.” (Daniel 11:31) Mme Ntiense Jehovah ye idatesịt ẹyenọ ntọt aban̄ade nte akama-mbọribọ n̄kpọntịbe emi edidade itie.

[Ndise ke page 32]

Itieakam ke esịt Ufọkederi Edisana Udi

[Ebiet ẹdade n̄kpọ ẹto]

Pictorial Archive (Near Eastern History) Est.