Ntọt M’ọkwọrọ Obio Ubọn̄
Mme Oyom Akpanikọ Ẹnam N̄kpọ Ẹban̄a Ikọ Ntiense Ido Nneme
BIBLE asian nnyịn ete ke mbon mbieterọn̄ ẹyekop uyo Eti Ekpemerọn̄. (John 10:27) Emi edi ntre ke ediwak idụt, esịnede Britain.
◻ Ke uwụtn̄kpọ, ke 1988, esisịt ini mbemiso Christmas, Pamela, kiet ke otu Mme Ntiense Jehovah, ama ọbọrọ ikot urụk ukopikọ ke ọfis emi enye akanamde utom onyụn̄ etịn̄ ikọ ye eren anyam n̄kpọurua kiet emi anamde utom ọnọ ukem usiakifia oro ke ikpehe efen ke England. Ke utịt ikot oro, eren oro ama obụp ete: “Nte afo amanam ntịmidem ọnọ Christmas kemi?” Pamela ama ọdọhọ ete: “Baba!” Andinọ ikot oro ama obụp ete, “Nte ini ibehe fi esisịt?” Pamela ama ọbọrọ ete, “Ami nsidiaha Christmas.” Eren oro ama ọdọhọ ke oro edi esen esen n̄kpọ ndien obụp ntak. Pamela ama ọdọhọ enye ke imọ idi kiet ke otu Mme Ntiense Jehovah onyụn̄ akaiso ndinam an̄wan̄a nte ke idụhe ewụhọ ndomokiet ke Bible ndinịm usọrọ usen emana Jesus ndien ke ẹsiode oro ẹfep, Jesus ikamanake ke December 25. Akande oro, Christmas ke akpasarade ekedi usọrọ mme okpono ndem. Andinọ ikot oro ama ọdọhọ ete ke kpukpru oro ẹketie ata inem inem.
Ọfiọn̄ ita ke ukperedem Pamela ama ọbọrọ ikot ke urụk ukopikọ, ndien andinọ ikot oro ama ọdọhọ ete: “Nte afo emeti nte eketịn̄de ikọ ye ami mbemiso Christmas onyụn̄ asiande mi ete ke afo usudiaha Christmas? Ọfọn, ami mma n̄kụt akpanikọ!” Ekedi kpa eren oro, ndien enye ama anam an̄wan̄a ete ke urua iba ke Christmas ama ekebe, Mme Ntiense iba ẹma ẹdi ke ufọk imọ. Enye ama okot mmọ ẹdụk ẹdi, ndien ukpepn̄kpọ Bible ama ọtọn̄ọ. Enye ama obụk ete ke imọ ima inam usọp usọp n̄kọri ke ukpepn̄kpọ imọ. Enye ama asian ufan esie an̄wan oro okodụn̄de ye enye ete ke usụn̄uwem mmimọ inemke Jehovah esịt, ntre mmọ ẹma ẹdianade ẹtie, ndien idahaemi mmọ mbiba ke ẹkedụk mme mbonoesop ke Ufọkmbono Obio Ubọn̄.
Ke utịt isua oro, ẹma ẹnyịme mmọ nte mme asuanetop oro mînaha baptism, ndien ke ntọn̄ọ ntọn̄ọ 1990 mmọ ẹma ẹdọ ndọ. Ekem mmọ ẹma ena baptism ọtọkiet. Eti utịp otode ibio ibio, ikọ ntiense ido nneme ke urụk ukopikọ!
◻ Jehovah ama ọdiọn̄ eyenete an̄wan efen emi ọkọnọde ikọ ntiense ido nneme ke England. Ke ini owo insurance kiet ekedide enyịnusụn̄ esie, eyenete an̄wan oro ama obụp m̀mê enye akpama ndinọ imọ ubiọn̄ ndinyene eti nsọn̄idem, inemesịt, ye nsinsi uwem. Enye ama ọdọhọ ih onyụn̄ obụp enye m̀mê ewe ndutịm insurance ke enye eketịn̄ aban̄a. Ke ẹma ẹkewụt ke Bible un̄wọn̄ọ Abasi aban̄ade nsinsi uwem ke Paradise ke isọn̄, enye ama ọbọ n̄wed Afo Emekeme Ndidu Uwem ke Nsinsi ke Paradise ke Isọn̄ idem kiet onyụn̄ okot ofụri n̄wed oro ama ke mbubịteyo kiet. Ke ini enye akafiakde osobo ye eyenete an̄wan oro, enye ama asian enye ete ke ntọt oro ekedi utịbe—edieke imọ idikam inyenede mbuọtidem ndinịm enye ke akpanikọ. Eyenete an̄wan oro ama anam an̄wan̄a nte ke enye enyene ndikpep Bible nnyụn̄ ndụk mme mbonoesop ke Ufọkmbono Obio Ubọn̄. Ẹma ẹdiomi ukpepn̄kpọ Bible, ndien enye ama ọtọn̄ọ ndidụk mme mbonoesop. Enye ama ana baptism ke utịt isua oro. Isua kiet kpọt ke ukperedem, enye ama ọdọ eyenan̄wan eyenete an̄wan oro ekebemde iso ọnọ enye ikọ ntiense. Eyenete an̄wan oro ọdọhọ ete, “Ntre, ami mma nnyene eyenete eren ye ebe eyen ke unọ ikọ ntiense ido nneme mi!”
Edi akpanikọ nte ke mme andiyom akpanikọ ẹsinam n̄kpọ ke ini ẹdade unọ ikọ ntiense ido nneme ẹneme akpanikọ Bible. Nte Jesus ọkọdọhọde, mme erọn̄ esie ẹkop uyo esie.