Nte Ifiọk Ntaifiọk Ekeme Ndiwụt ke Mme Utịben̄kpọ Ẹdi Nsu?
Nte mme utịben̄kpọ eke Bible ẹma ẹnen̄ede ẹtịbe? Ediwak owo ẹdu, esịnede ediwak ntaifiọk ye mme adaiso ido ukpono, ẹmi ẹbọrọde ẹte baba. Mmọ ẹkere ẹte ke edinịm mme utịben̄kpọ ke akpanikọ enyene eyo oro enen̄erede onịm nsunsu ekikere ke akpanikọ ndien nte ke ifiọk ntaifiọk eyomfịn owụt ke mmọ ikemeke nditịbe. Ntem, odot ẹtịm ẹfiọk leta emi etienede mi emi ẹkemịn̄de ke The Times eke London oro ediwak ntaifiọk ẹkesịnde ubọk. Enye ọdọhọ ete:
“Idịghe ifiọk oro enyenede nsọn̄ọ ndida ifiọk ntaifiọk nte mfan̄a ndida mbiọn̄ọ utịben̄kpọ. Ndinịm ke akpanikọ nte ke mme utịben̄kpọ ikemeke nditịbe edi edinam mbuọtidem ukem nte edinịm ke akpanikọ nte ke mmọ ẹkeme nditịbe. . . . Mme utịben̄kpọ ẹdi mme n̄kpọntịbe oro akanam mîdaha itie. Sededi ido edinam idahaemi ke akwaifiọk owo m̀mê mme uyarade ekikere oro mme ndụn̄ọde ẹkemede ndinọ ekikere mban̄a, edi akpan n̄kpọ ndisọn̄ọ nte ke ifiọk ntaifiọk (ọkọn̄ọde nte enye edide ke ndise mme n̄kpọ oro ẹkebemde iso ẹda itie) ikemeke ndinyene n̄kpọ ndomokiet nditịn̄ ke n̄kpọ emi. ‘Mbet’ esie n̄kukụre edi ofụri ofụri ifiọk n̄kpọntịbe nnyịn. Mbuọtidem ọkọn̄ọ ke nsọn̄ọ efen.” (Sịghi sịghi ubọkn̄wed edi eke nnyịn.) Ke akpanikọ, idụhe usụn̄ ndomokiet oro ifiọk ntaifiọk eyomfịn ekemede ndiwụt ke mme mbụk utịben̄kpọ oro ẹwetde ke Bible ẹdi nsu.