Ntọt M’ọkwọrọ Obio Ubọn̄
Mmọ Ẹma Ẹnịm Ke Akpanikọ Ke Kathmandu
EWET ndise kiet edide n̄wan ama ọtọn̄ọ ndiyom akpanikọ ke Brittany, France, ke 1980. Enye ama enyene nneme ye mbon Pentecostal onyụn̄ ekpep n̄kpọ aban̄a mme ido ukpono Edem Usiahautịn—ye unana uyụhọ. Ekem enye ama enyene ndusụk nneme ye kiet ke otu Mme Ntiense Jehovah edi ikebịghide ama etre. Enye ama osobo ye eren ewet ndise efen onyụn̄ ọtọn̄ọ ndinam utom nnyụn̄ ndụn̄ ye enye.
Ikebịghike ke emi ebede owo iba ẹmi mîdọhọ ndọ mi ẹma ẹbiere ndika Nepal. Uyai ye emem idụt emi ama otụk mmọ ke idem akamba akamba edi mmọ ẹma ẹkụt edikpu ke ndutịm utọ ubahade oro okodude, emi eketiede nte inenke ke enyịn mmọ mbon Edem Usoputịn.
Ke ẹfiakde ẹnyọn̄ France, n̄wan oro ama ọnọ nsan̄a esie ekikere ete yak mmimọ ikpep Bible ọtọkiet, ndien ke n̄kpaidem esie enye ama onyịme. Mmọ ẹma ẹsobo ye Ntiense emi enye ekenyenede nneme isua iba mbemiso. Ke ntọn̄ọ mmọ ẹkekama Bible kpọt, edi nte ini akade mmọ ẹma ẹnyịme ndikama n̄wed Akpanikö oro Adade osim Nsinsi Uwem ndien ke ukperedem n̄wed Afo Emekeme Ndidu Uwem ke Nsinsi ke Paradise ke Isọn̄. Ke ufan̄ isua kiet mmọ ẹma ẹtre ndida n̄kpọsọn̄ ibọk.
Ke ẹma ẹkefiak ẹka Nepal ke ọfiọn̄ iba, owo iba ẹmi ẹma ẹfiak ẹnyọn̄ France ke ebiet emi mmọ ẹkekade iso ndikpep n̄kpọ. Mmọ ẹma ẹtre un̄wọn̄ sika ye edika itie un̄wọn̄n̄kpọ ye ufọkunek ẹnyụn̄ ẹtọn̄ọ ndidụk mme mbonoesop Mme Ntiense Jehovah. Nte ededi, ke mmọ ẹma ẹkekụre n̄wed Ndidu Uwem ke Nsinsi, mmọ ẹma ẹbiere nditre ndikpep n̄kpọ.
Mmọ ẹma ẹfiak ẹka Nepal ke ebiet emi mmọ ẹkedụn̄de ke ekpri ufọk ke ukot Obot Himalaya. Usen kiet akanieren kiet esịnede kot ye tai, ama ọkọn̄ usụn̄ufọk mmọ. N̄wan oro okodu ikpọn̄ ke ufọk, ndien enye ama ekere ke anaedi edep ndise ekedi ndise mbuwed mmọ. Ke n̄kpaidem esie enye ekedi Ntiense edide ke ibuot owo oro ekekpepde n̄kpọ ye mmọ ke France. Ikebịghike nsan̄a esie ama ọnyọn̄ edi, ndien ẹma ẹnyene nneme ke hour iba.
Usen ifan̄ ke ukperedem, owo iba ẹmi ẹma ẹdụk mbonoesop Mme Ntiense Jehovah ke Kathmandu ndien usana idem mme andidụk ama enen̄ede otụk mmọ ke idem. Mmọ ẹma ẹkụt ukem ima nditọete ye inemesịt oro mmọ ẹkekụtde ke mme mbonoesop ke France. Mmọ n̄ko ẹma ẹkụt edidianakiet mbon Nepal oro ẹkedude, okposụkedi mmọemi ẹketode nsio nsio n̄kaowo. Idahaemi mmọ ẹma ẹnịm ke akpanikọ nte ke anaedi emi edi esop Jehovah.
Ọfiọn̄ kiet ke ukperedem mmọ ẹma ẹfiak ẹka France ndien ikebịghike ẹfiak ẹtọn̄ọ ukpepn̄kpọ Bible mmọ ẹnyụn̄ ẹdụk mme mbonoesop. Mmọ ẹma ẹdo ndọ, ẹtọn̄ọ ndibuana ke utom unọ ikọ ntiense, ndien ke akpatre ẹna baptism. Ebe idahaemi edi asan̄autom unamutom, ndien n̄wan esie esibuana ke utom usiakusụn̄ unọ un̄wam kpukpru ini. Ke akpanikọ, spirit Jehovah eyen̄wam mbon oro ẹnyenede nnennen esịt ndinam n̄kọri nnyụn̄ n̄kabade ndi mme andituak ibuot nnọ enye.—Ediyarade 7:15-17.
[Ekebe/Ndise obio ke page 9]
NEPAL
Ibatowo - 17,712,221
N̄wakn̄kan ibat M’asuanetop 1990 - 63
Mbahade, asuanetop 1 - 281,146
Ukem mbahade ibat M’asuanetop Asiakusụn̄ - 10
Ibat Esop - 1
Ukem mbahade ibat Ukpepn̄kpọ Bible - 107
Mme andidụk Editi - 220
[Ndise Obio]
(Ama oyom ndikụt nte enye enen̄erede etie, se n̄wed)
NEPAL
INDIA
[Ndise ke page 9]
An̄wa urua ke Kathmandu, Nepal