Enye Ama Ebịghi Akan Nte Mmọ Ẹkekerede!
ISUA oro, 609 B.C.E. Ebiet, Jerusalem. Etịn̄ikọ, prọfet Jeremiah. Enye ama ebemiso etịn̄ aban̄a nsobo edima edisana obio esie, Jerusalem, kpa nsobo oro enyenede ndidi koro mme Jew ẹkewọn̄ọrede edem mmọ ẹwụt Jehovah ẹnyụn̄ ẹsịnde idem ke utuakibuot mme nsunsu abasi. Mmọ ẹma ẹbuana ke utuakibuot ndedehe ido idan̄ ke mme n̄kokon̄ ebiet, ẹwa edin̄wọn̄ uwa ẹnọ abasi mme okpono ndem, ẹtuak ibuot ẹnọ utịn ye ọfiọn̄ ye mme ntantaọfiọn̄, ẹfọp incense ẹnọ Baal, ẹnyụn̄ ẹwa nditọ mmọ ẹnọ Molech.—1 Ndidem 14:23, 24; Jeremiah 6:15; 7:31; 8:2; 32:29, 34, 35; Ezekiel 8:7-17.
Ke enyịn mmọ Jeremiah ekedi owo emi ofioride n̄kpo oyom afanikọn̄, owo emi enyenede ifiopesịt, owo emi okụtde ndudue ọnọ kpukpru n̄kpọ ye kpukpru owo. Ke isua 38 Jeremiah ke ọkọnọ mmọ ntot; ke ofụri isua 38 mme andidụn̄ Jerusalem ke ekesak enye nsahi. Tutu edisịm ini emi, mme owo ẹmi ẹkesụk ẹsesịn Jehovah, ẹdọhọde ke enye idịghe odudu oro ẹkpenyenede udọn̄ ẹban̄a. Mmọ ẹkedọhọ ẹte: “Jehovah idinamke eti n̄kpọ, idinyụn̄ inamke idiọk” n̄ko, “Jehovah ọmọkpọn̄ isọn̄ emi, Jehovah inyụn̄ ikwe.”—Zephaniah 1:12; Ezekiel 9:9.
Prọfet Jeremiah ye Ezekiel ẹma ẹkwọrọ ẹban̄a nsobo Jerusalem, edi n̄kpọ ndomokiet ikotịbeke. Ntre nditọ Israel ẹma ẹdọhọ ẹte ke utọ n̄kukụt oro ndomokiet idisụhọ ke eyo mmimọ, ẹdọhọde ẹte: “Mme usen ebịghi, kpukpru n̄kukụt ẹnyụn̄ ẹtak.” Edi ibọrọ Jehovah kaban̄a emi ekedi: “Mme usen ke ekpere . . . Koro ami Jehovah nyetịn̄, ndien nyenam ikọ eke nditịn̄de, idinamke aba ubịghi ke esịt, koro ke mme usen mbufo, O ufọk nsọn̄ibuot, ke nditịn̄ ikọ, nnyụn̄ nam enye.”—Ezekiel 12:22-25.
Ke 609 B.C.E., ini ama edisịm Jehovah ndisu ikọ esie. Ke Jeremiah ama ọkọnọ ntọt ke se ikperede ndisịm isua aba, mbonekọn̄ Babylon ẹma ẹkanade obio Jerusalem ẹkụk. Ọfiọn̄ 18 ke ukperedem ẹma ẹwụri mme ibibene, ẹfọp temple, ndien ẹma ẹda ata ediwak owo ẹka ntan̄mfep ke Babylon. Nte ẹkebemde iso ẹtịn̄, ẹma ẹda ofụt ye akan̄ ye idiọk udọn̄ọ ẹsobo obio oro.—2 Ndidem 25:7-17; 2 Chronicles 36:17-20; Jeremiah 32:36; 52:12-20.
Jeremiah ama enen. Mme owo oro ẹkedue. Enye ama ebịghi akan nte mmọ ekekerede! N̄kukụt oro ikenyeneke ediwak isua ke iso. Enye ekenyene eyo mmọ.
Emi idịghe ikpîkpu mbụk. Se ikotibede inọ Jerusalem ekedi ntịn̄nịm prọfesi. Enye akada aban̄a n̄kpọ oro edidide. Christendom eyomfịn ada enyịn̄ Christ onyụn̄ ọdọhọ ke idu ke ebuana ediomi ye Abasi; edi enye asan̄a ke nde ikpat mme andikodụn̄ Jerusalem eset. Ke ofụri ofụri, mme ufọkederi Christendom ẹkpep ukpepn̄kpọ mme okpono ndem, ẹsabade idem ye oburobụt ido idan̄, ẹnọ mme ndutịm ukaraidem ibetedem, ẹnọ mme ekọn̄ ererimbot ibetedem, ẹnyịme ukpepn̄kpọ edito ke unam mforo inyụn̄ inyịmeke Abasi nte Andibot, ẹnam nte ikwe ediwa oro ẹwade ediwak million mbon oro mîmanake kan̄a ke itieuwa ifụre, ẹnyụn̄ ẹnyịme mme ekikere akwaifiọk owo, ẹdọhọde ẹte ke Bible edi n̄ke ye nsunsu mbụk.
Nte mbio obio Jerusalem ẹkesakde Jeremiah nsahi, ntre ke Christendom asak Mme Ntiense Jehovah. Ẹda ntọt oro Mme Ntiense ẹnọde ẹban̄a nsobo oro edidide ke Armageddon nte ikpîkpu n̄kpọ. Christendom ọdọhọ ete, ‘Abasi inyeneke udọn̄ iban̄a isọn̄. Yak enye ese heaven enyịn; nnyịn iyese isọn̄ enyịn. Ndien edieke Armageddon edidide, enye ididịghe ke emana nnyịn. Nnyịn ima ikokop mbụk oro mbemiso. Owo ikemeke ndibian̄a nnyịn ke oro!’
Nte emi edidi akani n̄kpọntịbe oro afiakde ada itie? Nte enye enyene ndidi ini en̄wen emi ediwak million owo ẹdifiọkde nte ke enye ama ebịghi akan nte mmọ ẹkekerede?