Mme Mbụme Ẹtode Mme Andikot
◼ Mme angel ẹdi spirit, inyeneke idem eke obụk, ntre ntak emi mbufo ẹsiwụtde mmọ ke ndise nte ẹnyenede mba-a? Nte emi edi sụk ido edinam ido ukpono-o?
Nnyịn isiwak ndiwụt mme angel ye mba ke ntak ndamban̄a edinam an̄wan̄a oro ẹkụtde ke Bible.
Afo emenen ndidọhọ nte ke edibotn̄kpọ ẹdide spirit inyeneke idem eke obụk ye ata mba—m̀mê iso, ubọk, ukot, m̀mê mme ndido idem eken. Edi, ediwak idaha, ke ini mme angel ẹkesibiọn̄ọrede mme asan̄autom Abasi ke iso, anaedi mmọ ẹkesitie nte ata irenowo, koro ẹma ẹsidue ẹda mmọ ntre.—Genesis 18:2, 22; 19:1; Judges 6:11-22.
Ndusụk ini, nte ededi, mme owo ẹma ẹsikụt n̄kukụt ẹban̄a mme angel ẹnyụn̄ ẹtịn̄ nte mmọ ẹtiede. Prọfet Ezekiel ama okụt “mbiet n̄kpọ inan̄” ndien ke ukperedem n̄kukụt, enye ama anam ẹdiọn̄ọ mmọemi nte mme angel oro ẹdude ke udịm oro ẹdiọn̄ọde nte mme cherubim. (Ezekiel 1:5; 9:3; 10:3) Mme angel ẹmi kiet kiet ẹnyene mba inan̄, emi owụtde ukeme oro mmọ ẹnyenede ndinam n̄kpọ usọp usọp ke ikpehe ekededi nte ekemde ye ewụhọ Abasi. “Mmọ ikabakede [“iwọn̄ọkede iso,” NW] ke ini mmọ ẹsan̄ade; kpukpru mmọ kiet kiet ẹnen̄ede iso ẹsan̄a . . . mmọ ẹka ke ebiet ekededi eke spirit oyomde ndika do: ikabakede ke ini mmọ ẹsan̄ade.”—Ezekiel 1:6, 9, 12.
Edi mme angel oro ẹkesikụtde ke n̄kukụt ikesidịghe ukem ukem kpukpru ini. Mme edibotn̄kpọ edide angel oro ẹkotde mme seraphim oro Isaiah okokụtde ẹkenyene mba itiokiet. (Isaiah 6:1, 2) Mme ukpụhọde ẹma ẹkam ẹdu ke mme n̄kukụt Ezekiel. Ke akpa oro, mme angel oro ẹma ẹnyene ukot, ubọk ke idak mba inan̄, ye iso inan̄ (nte eke owo, lion, enan̄, ye ntrukpom). Ke udiana n̄kukụt esie, kiet ke otu iso ẹmi ẹketie nte eke cherubim utu ke ndidi eke enan̄, iso-ọfọn ndiwụt akwa odudu eke mme cherubim. Ndien ke n̄kukụt ukperedem eke edibana ndamban̄a temple, Ezekiel ama okụt mme cherubim oro ẹnyenede iso iba, kiet edide eke owo enye eken edide eke lion. (Ezekiel 1:5-11; 10:7-17; 41:18, 19) Ke Ata Edisana ataya utuakibuot kpa ye temple oro Solomon ọkọbọpde ke Jerusalem, mme cherub oro ẹnyenede mba iba ẹma ẹdu. Mmọemi ẹkedu ke okukịp akwa ekebe ẹdade gold ẹnam oro ẹkekotde ekebe ediomi. Mme cherubim ẹdade gold ẹnam mi ẹkese kiet eken, ndien mmọ mbiba ẹma ẹtat mba mmọ iba ẹnyanade ẹfụk Ekebe Ediomi. (Exodus 25:10-22; 37:6-9) Ikpọ cherubim iba ẹdade gold ẹfụk ẹkeda ke enyọn̄ Ekebe Ediomi (ye okukịp esie) ke temple Solomon, kiet kiet enyenede mba iba oro ẹnyanarede.—1 Ndidem 8:6-8; 1 Chronicles 28:18; 2 Chronicles 5:7, 8.
Josephus ekewet ete: “Amaedi mme cherubim [oro] ke idemmọ, owo ndomokiet ikemeke nditịn̄ m̀mê ndikere nte mmọ ẹketiede.” Ntem, ndusụk nditọ ukpepn̄kpọ ye mme ewet ndise ẹkọn̄ ekikere ndise mme angel (akpan akpan mme cherubim) ke inua-okot ndise eset eke Near Eastern oro aban̄ade mme abasi ke mbiet mme unam mba. Edi ndausụn̄ oro ẹberide edem ẹkan edi utịn̄ikọ Ezekiel oro nte ke mbon oro enye okokụtde “ẹbiet owo.” (Ezekiel 1:5) Ntre ke ini iwetde ndise mme angel eke heaven ke mme n̄wed nnyịn, nnyịn ke ofụri ofụri isiwụt mmọ ke mbiet owo. Nnyịn isiwụt mmọ ye mba ke ntak uwak itie oro Bible etịn̄de aban̄a nsio nsio angel nte ẹnyenede mba n̄ko ke ntak utịn̄ikọ aban̄ade mme angel nte ‘ẹfede-fe.’—Ediyarade 14:6; Psalm 18:10.
Ke akpatre, page 288 ke Revelation—Its Grand Climax At Hand! owụt edibotn̄kpọ eke heaven oro enyenede mba, ayarade anyanya ke ibuot esie onyụn̄ akamade ukpọhọde ke ubọk esie. Emi edi in̄wan̄în̄wan̄ editịn̄ n̄kpọ mban̄a Ediyarade 20:1: “Ekem n̄kụt angel otode ke heaven osụhọde, akama ukpọhọde editụn̄ọ ukpe ye akwa n̄kpọkọbi ke ubọk.” Nnyịn idiọn̄ọ ke angel emi akamade ukpọhọde mi edi Jesus Christ oro ẹnọde ubọn̄. Ndise oro owụt enye nte enyenede mba man asan̄a ekekem ye akpanikọ oro nte ke mme angel oro ẹkekụtde ke n̄kukụt ẹma ẹsinyene mba.