Uwem ye Utom Jesus

“Ke Akpanikọ Emi Ekedi Eyen Abasi”

JESUS ikọn̄ọke ibịghi ke eto, ke ufọt uwemeyo, ke ini utịbe utịbe ekịm oro ebịghide ke hour ita adade itie. Edi itoho ke ntak ọfiọn̄ oro ofụkde un̄wana utịn, sia emi esidade itie kpọt ke ini obufa ọfiọn̄, ndien ọfiọn̄ edi ọyọhọ ọyọhọ ke ini Passover. Akande oro, ekịm otode ntak ọfiọn̄ ofụkde utịn esibịghi ke minit ifan̄ kpọt. Ntre ekịm emi oto Abasi! Iso-ọfọn enye anam mbon oro ẹsakde Jesus nsahi ẹkûbi inua, idem anamde isụn̄i mmọ etre.

Edieke ndyọ ndyọ n̄kpọntịbe emi adade itie mbemiso anamidiọk kiet ọsọn̄ọde asua ọnọ nsan̄a esie onyụn̄ ọdọhọde Jesus eti imọ, ekeme ndidi oro esịn enye akabade esịt. Iso-ọfọn edi ke ini ekịm oro ke iban inan̄, oro edi, eka Jesus ye eyeneka esie an̄wan, Salome, Mary Magdalene, ye Mary eka apostle James Ekpri, ẹsan̄a ẹkpere eto ndutụhọ. John, edima apostle Jesus, odu do ye mmọ.

Didie ke ẹnọ eka Jesus unan ke esịt ntem nte enye esede eyen emi enye ọkọbọkde onyun̄ esede enyịn nte ọkọn̄ọde do ye ubiak! Kpa ye oro, Jesus ikereke iban̄a ubiak esiemmọ, edi ekere aban̄a mfọnọn̄kpọ eka esie. Ye akwa ukeme, enye otụk ibuot ọnọ John onyụn̄ ọdọhọ eka esie ete: “N̄wan, sese, eyen fo do.” Ekem, ke otụkde ibuot ọnọ Mary, enye ọdọhọ John ete: “Sese, eka fo do.”

Jesus ke ntre amayak ukpeme eka esie, emi nte an̄wan̄ade edide ebeakpa idahaemi, esịn ke ubọk apostle oro enye enen̄erede ama. Enye anam emi koro nditọiren Mary eken mîwụtke mbuọtidem kan̄a ke enye. Ntre enye onịm eti uwụtn̄kpọ edinam ndutịm nnọ eka esie, idịghe ke n̄kan̄ n̄kpọ obụkidem kpọt edi n̄ko kaban̄a mme n̄kpọ eke spirit esie.

Ke n̄kpọ nte n̄kanika ita uwemeyo, Jesus ọdọhọ ete: “Itọn̄ ke asat Mi.” Do, ke ọfiọkde ete ke Ete imọ, yak idọhọ, omosio ubọk ọkpọn̄ imọ man ẹdomo nsọn̄ọnda imọ ẹsịm akpatre, enye ofiori ke ọkpọsọn̄ uyo ete: “Abasi Mi, Abasi Mi, nsinam Afo ọkpọn̄de Mi?” Ke ẹkopde emi, ndusụk mbon oro ẹdade ẹkpere ẹdọhọ ẹte: “Sese, Enye ke okot Elijah.” Ndondo oro owo mmọ kiet efehe ekedebi ndọbọ ke vinegar owụk ke eto hyssop, ọnọ enye ete ọn̄wọn̄. Edi mmọ eken ẹdọhọ ẹte: “Yak etie; nnyịn ise m̀mê Elijah ke edi ndikọn̄ọde enye.”

Ke ini Jesus ọbọde vinegar oro, enye ofiori ete: “Okụre.” Ih, enye omokụre kpukpru n̄kpọ ẹmi Ete esie ọkọdọn̄de enye ndinam ke isọn̄. Ke akpatre, enye ọdọhọ ete: “Ete, mmayak spirit Mi nsịn Fi ke ubọk.” Jesus ke ntre ayak odudu-uwem esie esịn Abasi ke ubọk ye mbuọtidem nte ke Abasi eyefiak ayak ọnọ imọ. Ekem enye osụk ibuot esie onyụn̄ akpa.

Ndondo oro Jesus ọduọkde akpatre ibifịk esie, afai afai uyekisọn̄ otịbe, asiakde ikpọ itiat. Uyekisọn̄ oro ọsọn̄ odudu etieti tutu eyedi se okûbọrede mme udi ke edem Jerusalem, mme okpo ẹnyụn̄ ẹwọn̄ọ ke udi ẹbono. Mme andisan̄a mbe, ẹmi ẹkụtde mme okpo nte ẹwọn̄ọde ẹbono, ẹmen mbụk ẹkesuan ke obio.

Ke akande oro, ke ndondo oro Jesus akpade, akwa ikpehe oro abaharede Edisana ye Ata Edisana Ebiet ke temple Abasi asiaha iba, ọtọn̄ọde ke enyọn̄ osịm isọn̄. Nte an̄wan̄ade, ata ediye ikpehe emi edi n̄kpọ nte ikpat 60 ke uniọn̄ onyụn̄ odobi etieti! Ikụreke ke utịben̄kpọ n̄kpaidem emi ndiwụt iyatesịt Abasi ke idem mme andiwot Eyen Esie edi owụt n̄ko nte ke edibe ndụk Ata Edisana Ebiet, kpa heaven ke idemesie, edi se ẹkemede idahaemi ebe ke n̄kpa Jesus.

Nte ededi, ke ini mme owo ẹkopde uyekisọn̄ ye mme n̄kpọ oro ẹtịbede, ndịk anam mmọ ata etieti. Akwa owoekọn̄ esede aban̄a uwotowo oro ọnọ Abasi ubọn̄. Enye ọdọhọ ete: “Ke akpanikọ emi ekedi Eyen Abasi.” Anaedi enye ama odu ke ini ẹkenemede nneme ke ikpe Jesus ke iso Pilate ẹban̄a edidọhọ oro ẹdọhọde ke enye edi eyen Abasi. Ndien idahaemi enye onịm ke akpanikọ ete ke Jesus edi Eyen Abasi, ih, nte ke enye ke akpanikọ edi n̄kpon n̄kan owo akanam odudu uwem.

Utịbe utịbe edinam emi akan mbon en̄wen n̄ko ubọk, mmọ ẹtọn̄ọ ndinyọn̄ ufọk mmọ, ẹmiade ubọk ke ikpanesịt mmọ, nte idiọn̄ọ ọkpọsọn̄ mfụhọ ye esuene oro mmo ẹdiade. Mme andida nsannsan n̄kụt n̄kpọ emi ẹdi mbet Jesus ẹdide iban, ẹmi akpan n̄kpọntịbe emi otụkde ntotụn̄ọ ntotụn̄ọ. Apostle John odu n̄ko. Matthew 27:45-56; Mark 15:33-41; Luke 23:44-49; 2:34, 35; John 19:25-30.

◆ Ntak emi ọfiọn̄ ndifụk un̄wana utịn mîkpedịghe ntak ekịm okodude ke hour ita oro?

◆ Ibio ibio ini mbemiso n̄kpa esie, nso eti uwụtn̄kpọ ke Jesus onịm ọnọ mbon oro ẹnyenede ete ye eka oro ẹma ẹkesọn̄?

◆ Nso idi akpatre utịn̄ikọ inan̄ oro Jesus etịn̄de mbemiso enye akpade?

◆ Nso ke uyekisọn̄ oro anam, ndien ikpehe temple ndisiaha iba ada aban̄a nso?

◆ Didie ke mme utịben̄kpọ ẹmi ẹtụk akwa owoekọn̄ emi esede aban̄a uwotowo oro?