Eneni Aban̄ade N̄kpa Jesus

KE USEN Passover eke 33 C.E., ẹma ẹwot owo ita. Ẹma ẹda irenowo ita oro ẹkebierede ikpe n̄kpa ẹnọ ẹsan̄a ẹwọrọ ke edem ibibene Jerusalem ẹnyụn̄ ẹkewot ke kiet ke otu ata ubiak ubiak, esuene esuene usụn̄: kpa edikọn̄ ndian ke nnennen eto. Utọ uwotowo emi ekedi ọsọ n̄kpọ ke eyo mbon Rome, ntre ẹkeme ndidori enyịn nte ke etisịm idahaemi ke ẹyefre ke anyanini ẹban̄a mbon oro ẹkewotde ke Passover oro. Nte ededi, kiet ke otu mme owo oro ẹkewotde ekedi Jesus Christ. N̄kpa esie ama eberede usụn̄ ọnọ akwa ukpụhọde ye eneni ido ukpono.

Se ikperede ndisịm tọsịn isua iba ẹma ẹbe tọn̄ọ nte n̄kpọntịbe emi akada itie, ntre afo emekeme ndinyene ntụhọ edida enye nte ikpîkpu mbụk eset. Nte ededi, nte afo ọmọfiọk ete ke owo ibiereke eneni oro ekedemerede tutu osịm emi?

Nte afo ekemede ndifiọk, ediwak million owo ẹnịm ẹte ke Jesus akakpa ọnọ mmimọ. Mmọ ẹnen̄ede ẹnịm ke akpanikọ ẹte ke n̄kpa Christ edi ukpọhọde edinyan̄a ye edifen mme idiọkn̄kpọ, nte ke mbuọtidem ke n̄kpa esie edi usụn̄ adade osịm edinyan̄a. Ke edide n̄kpọ n̄kpaidem, nte ededi, ibuotikọ kiet ke Anglican Theological Review ọtọt ete ke ukpepn̄kpọ oro ẹmade mi odu “ke afanikọn̄.” Ndien “afanikọn̄” emi oto mme adaiso ido ukpono.

Anglican Theological Review anam an̄wan̄a ete: “Ukpepn̄kpọ ufak ke ekikere Christian odu ke afanikọn̄ koro ẹnyenede eyịghe ẹban̄a itiat idakisọn̄ esie ke Bible, ntọn̄ọ esie amakabade ọyọhọ ye ekikere ibio ini ẹmi [mîbịghike uwem] . . . , ndien ekikere esie ke ọwọrọetop idaha eke n̄kan̄ spirit amakabade edi uduot ọkpọ ọkpọ ntụk ye enyọn̄ enyọn̄ edikụt unen nnọ idem.” Ke akpanikọ, mme ekpep ukpepn̄kpọ ido ukpono Protestant ye Catholic ẹmekpu ndisịm orụk unyịme ekededi ke se n̄kpa Jesus Christ ọwọrọde, edieke edide n̄kpọ ekededi odu.

Afo emekeme ndikere ke emi edi sụk utọk nta ekpep ukpepn̄kpọ ido ukpono ifan̄, nte ke enye inyeneke ebuana ye uwem fo. Edi wụk ekikere ke emi: Edieke n̄kpa Jesus enen̄erede enyene ebuana ye idaha fo ke iso Abasi ye idotenyịn kaban̄a afo ndidu ke nsinsi (ke heaven m̀mê ke ebiet en̄wen ekededi), do oyom afo ekere aban̄a eneni emi.

Ntak emi mme ekpep ukpepn̄kpọ ido ukpono ẹsụk ẹnenide n̄kpọ emi? Ke uwụtn̄kpọ, kere ban̄a Ufọkederi Roman Catholic. Enye enyene in̄wan̄în̄wan̄ ukpepn̄kpọ ido ukpono aban̄ade ukpọn̄ ikpaha ke nsinsi ye Abasi-Ita-ke-Kiet. Edi, ufọkederi emi inyeneke ubiere ndomokiet ndinọ mban̄a ufak ebe ke n̄kpa Christ. New Catholic Encyclopedia onyịme ete: “Ẹma ẹtọn̄ọ ediwak ye nsio nsio ndutịm ndinam an̄wan̄a nte ẹkenyan̄ade owo ẹsio ke idiọkn̄kpọ ẹsịn ke mfọn . . . Edi ndutịm ẹmi ndomokiet ikwe unen ofụri ofụri. . . . Ke ndusụk ikpehe owo isịmke ukpepn̄kpọ Ufak onyụn̄ akakaiso ndisio idemesie n̄wụt nte afanikọn̄ ke ukpepn̄kpọ ido ukpono.”

Ikpanaha edi n̄kpọ n̄kpaidem ọnọ fi, ndien, nte ke ediwak million owo oro ẹnen̄erede ẹdọhọ ke ‘Jesus akakpa ọnọ mmimọ,’ esisịt ibat kpọt ẹnyene mfụm mfụm ekikere ẹban̄a se oro enen̄erede ọwọrọ. Nte Anglican Theological Review esịnde enye: “Ke ini ẹnyịkde . . . mme Christian oro ẹnịmde ke akpanikọ ediwak ini isikemeke ndisiak ebiet ukpepn̄kpọ oro otode ke Bible, m̀mê ndinam an̄wan̄a nte enye anamde utom.” Sia ukpepn̄kpọ oro mîn̄wan̄ake mmọ m̀mê oro mmọ mîkemeke ndinam an̄wan̄a efịkde, enen̄ede ọsọn̄ mme andituak ibuot ke mme ufọkederi idem ndikụt nte n̄kpa Christ enyenede ebuana ye uwem mmọ.

Christendom ndikpu ndinyene uyo ke in̄wan̄în̄wan̄ ukpepn̄kpọ oro aban̄ade ufak n̄ko amakpan ukeme ẹmi enye esịnde ndida etop Christian nsịm mme Jew, Hindu, Buddha, ye mbon eken. Ke adan̄aemi ediwak mme utọ owo oro ẹmade ẹnyụn̄ ẹkponode ediwak ukpepn̄kpọ Jesus, ndutịme oro akanarede n̄kpa Christ okụk ye se enye ọwọrọde etie nte n̄kpọ ubiọn̄ọ ọnọ mbuọtidem.

Ndi se n̄kpa Christ ọwọrọde edi ikpîkpu ndiben̄kpọ—se ikande ifiọk owo? Mîdịghe, nte odu eti edinam an̄wan̄a oro ọkọn̄ọde ke Bible? Oyom afo ekere aban̄a mme mbụme ẹmi, koro Bible etịn̄ utịbe utịbe ikọ emi aban̄a Jesus ete: ‘Kpukpru owo eke ẹbuọtde idem ye enye iditakke edi ẹyenyene nsinsi uwem.’—John 3:16.