“Anyanya ye N̄wedibet”
“EKEM [Jehoiada oku] ada eyen edidem ọwọrọ, onyụn̄ ayara enye anyanya ye N̄wed Ibet; ntre ke mmọ ẹnam enye edidem ẹnyụn̄ ẹyet enye aran.” (2 Ndidem 11:12, NW) Emi edi nte n̄wed Ndidem anamde ediyara Edidem Jehoash anyanya an̄wan̄a. Ndi afo ama okụt nte ke ẹsiode “anyanya,” m̀mê ntinya ubọn̄ ẹfep, ke Jehoiada ama odori ekpri edidem oro “N̄wed Ibet” n̄ko. Nso ikedi N̄wed Ibet oro? Ndien ntak emi enye ekedide ubak edinam uyara anyanya emi-e?
Ikọ Hebrew mi ẹkabarede “N̄wed Ibet” esiwak ndida mban̄a Ibet Duop m̀mê ibet Abasi ke ofụri ofụri. (Exodus 31:18; Psalm 78:5, Revised Standard Version) Ke n̄kemuyo ye emi, ukem mbụk oro ke 2 Chronicles 23:11 okot ke The Jerusalem Bible (1966) ete: “Ekem Jehoiada ada eyen edidem ọwọrọ edi, ayara enye anyanya, onyụn̄ odori enye Ibet.” Nte ededi, ke 2 Ndidem 11:12, edikabade emi ada ikọ oro “okpoho ubọk” esịn ke itie “N̄wed Ibet,” okposụkedi ukem ikọ Hebrew oro odude ke ufan̄ikọ mbiba oro. Ntak-a?
Ọwọrọetop n̄wed usiakikọ Bible ke usem German, Herders Bibelkommentar, anam an̄wan̄a nte ke ndusụk mme akabade ikọ ikemeke ndikere nte ke edidem akpayara ibet ke ibuot m̀mê ke ubọk esie. Sia, ke ini ẹnemede ẹban̄a Edidem Saul, 2 Samuel 1:10 asiak okpoho ubọk (m̀mê, n̄kpọ itọn̄ubọk) ọkọrọ ye anyanya oro enye akayarade, mmọ ẹnịm ke anaedi itien̄wed oro ke 2 Ndidem 11:12 okokot ke akpa, “anyanya ye okpoho ubọk.” Edi emi edi ikpîkpu edikekere. Ndisịn “okpoho ubọk” ke itie “N̄wed Ibet” ọwọrọ ndinam akwa ukpụhọde ke uwetn̄kpọ.
The New Jerusalem Bible (1985) ke ntre afiak esịn ekikere Ibet, m̀mê ibet ediomi, esịnde ubak udịmikọ oro, “onyụn̄ ọnọ enye n̄wed ediomi.” Edi nte Jehoiada ama ọnọ Jehoash “N̄wed Ibet”? Edi akpanikọ, ẹkeme n̄ko ndisịn ikọ Hebrew oro ẹkabarede “ayara” nte “ama ọnọ.” Edi ke mbiba, Ndidem ye Chronicles, enye odu inikiet kpọt, etịn̄de aban̄a anyanya ye N̄wed Ibet. Akande oro, ikọ Hebrew oro “ayara” etiene enye inikiet inikiet. Ntem “ayara” enyene ndidi nnennen edikabade. Ẹma ‘ẹyara’ ekpri Edidem Jehoash anyanya ye N̄wed Ibet, nte New World Translation owụtde.
Ntem ntak-a—ndien didie—ke akwa oku ‘akayara’ ekpri edidem oro N̄wed Ibet? Kere se eyen ukpepn̄kpọ owo Germany oro, Otto Thenius ọkọdọhọde ete: “Ibet, kpa n̄wed emi ẹkewetde mme ewụhọ Moses. Ẹkesio emi ke ndamban̄a usụn̄ ẹnyan ke ibuot edidem oro, ke ẹma ẹkebana enye ye anyanya.” (Die Bücher der Könige) Ukem oro, Prọfesọ Ernst Bertheau ọdọhọ ete: “Edidori Ibet [ke ibuot edidem] ke akpanikọ ọnọ ndamban̄a ekikere, nte ke edidem ekpenyene ndikara nte ekemde ye enye.”—Die Bücher der Chronik.
Abasi ama ọnọ ewụhọ ete ke ini edidem editiede ke ebekpo, enye enyene ndision̄o n̄wed Ibet emi nsịn ke n̄wed nnọ idemesie, ekpepde onyụn̄ adade enye esịn ke edinam ke ofụri eyouwem esie. (Deuteronomy 17:18-20) Ekeme ndidi ediyara obufa edidem oro “N̄wed Ibet” ekedi ibio ibio ndamban̄a idiọn̄ọ owụtde ete ke okposụkedi enye idahaemi ekedide edidem, enye ikokon̄ke ikan Ibet Jehovah. Ke mfụhọ, ke Jehoiada ama akakpa, Jehoash ama efre akpan ukpepn̄kpọ emi onyụn̄ ọkpọn̄ utuakibuot Jehovah sụn̄sụn̄, ke akpatre akpade ke ubọk mme owotowo.—2 Chronicles 24:17-25.