Afo Ọfiọk Bible Ọfọn Adan̄a Didie?
‘N̄wed Thomas? Ih, oro esịne ke Bible. Edi n̄wed Jonah isịneke. Ebiet emana Christ? Oh, oro edi Jerusalem—m̀mê enye ekedi Nazareth? Ami ntịmke mfiọk m̀mê n̄wed Isaiah esịne ke akpa m̀mê ọyọhọ ikpehe iba ke Bible. Ibat mme apostle? Ami ntịmke mfiọk.’
“MAGAZINE Christianity Today ọdọhọ ete: “Ndụn̄ọde emi ikpekedịghe n̄kpọ n̄kpaidem edieke edide ẹkekọ ntọt emi ikpọn̄îkpọn̄ ke otu mbon oro mîdịghe Christian. Se ikpade owo idem—inyụn̄ ifịnade owo—edi udomo unana ifiọk N̄wed Abasi oro ẹkekụtde ke otu mme amana obufa Christian.”
Ke uwụtn̄kpọ, mbahade 22 eke ikie ke otu mme Christian inua-inua oro ẹkedụn̄ọrede ẹkekere ke n̄wed Thomas enen̄ede odu ke Bible, ke adan̄aemi mbahade 13 eke ikie mîkọdiọn̄ọke. Kaban̄a Jonah, mbahade 27 eke ikie ẹkedọhọ ke enye idụhe ke Bible, ke adan̄aemi mbahade 12 eke ikie mîkenyeneke ifiọk ndomokiet. Mbahade 6 eke ikie ikakam ikemeke ndikere m̀mê m̀mọ̀n̄ ke Christ akamana, ke adan̄aemi mbahade 16 eke ikie ẹkesiakde Jerusalem, ndien mbahade 8 eke ikie ẹkedọhọde ke enye ekedi Nazareth. Ofụri mbahade 13 eke ikie ikenyeneke ifiọk m̀mê m̀mọ̀n̄ ke ẹkeme ndikụt n̄wed Isaiah ke Bible, ke adan̄aemi mbahade 11 eke ikie ẹkenịmde enye ke N̄wed Abasi eke Christian usem Greek (“Obufa Testament”). Ke adan̄aemi ediwak owo ẹkefiọkde ke mme apostle 12 ẹkedu, mbahade 12 eke ikie ẹkenọ ibat efen, ọtọn̄ọde ke 2 tutu osịm se ibede 20, ndien mbahade 10 eke ikie ikenyeneke ifiọk ndomokiet.
Mbụme oro ọkọnọde mfịna akan ekedi m̀mê ikọ oro “Abasi anyan̄a mmọemi ẹnyan̄ade idemmọ” esịne ke Bible m̀mê isịneke. Mbahade 38 eke ikie kpọt ke otu mme “Christian” oro ẹkedụn̄ọrede ẹkediọn̄ọ ke owo ikwe ikọ oro ke ebiet ekededi ke Bible, ke adan̄aemi n̄wakn̄kan ibat, mbahade 42 eke ikie, ẹkekerede ke ẹkot enye ẹto Bible. Mbon eken ikọdiọn̄ọke.
Christianity Today obụp ete, “Ntak emi unana ifiọk okponde ntem aban̄a Bible? Anaedi, enye oto unana edikot Bible. Mbahade iba ke ofụri mbon America isikotke Bible. Ediwak ke otu kpukpru mme amana obufa Christian ẹsikot Bible inikiet m̀mê ikaba ke urua, mîdịghe isikotke-kot. Eyịghe idụhe ata ediwak Christian ẹnyenede esisịt ifiọk ẹban̄a N̄wed Abasi!”