Nte Afo Emeti?
Nte afo ama ekere ye ntịn̄enyịn aban̄a mme nsiondi Enyọn̄-Ukpeme eke ndondo emi? Edieke edide ntre, afo iso-ọfọn eyekeme nditi se itienede emi:
◻ Nte ndusụk Christian oro ẹyetde aran ẹyebọhọ “akwa ukụt” ẹnyụn̄ ẹdu ke isọn̄ ke ndusụk ini mbemiso ẹdade mmọ ẹka heaven?—Ediyarade 7:14.
Bible itịn̄ke n̄kpọ nnennen iban̄a emi. Etie nte ndusụk mbụk Bible ẹnọ ekikere ete ke mbon oro ẹyetde aran ẹkeme ndidu uwem mbe ndụk obufa ererimbot. Nte ededi, ediwak million mbon oro ẹdoride enyịn ndidu uwem ke nsinsi ke isọn̄ ẹmebọ ukpep ẹyomde man ẹtọn̄ọ obufa ererimbot. Ntem owo idiyomke ekpri nsụhọ ke utom emi, ndien Abasi ekeme ndimek ndida mmọ n̄ka heaven kaban̄a “ndọ eyenerọn̄” ke nsobo akpara ido ukpono oro, “Akwa Babylon” ebede. (Ediyarade 18:2,10; 19:2,7,8)—8/15, page 31.
◻ Ye mme uduak ewe ke erenowo okponịm esịt esie ke ndidi esenyịn Christian? (1 Timothy 3:1)
Erenowo enyene ndinyanade mbịne itieutom esenyịn, anamde ntre ye nsụhọdeidem koro enye oyomde ndinam n̄kpọ mbon efen. Ke ini nti uduak ke ntre ẹnụkde enye, edinam emi ke n̄kan̄ esie ekeme ndisụn̄ọ ke edidiọn̄ eke spirit nnọ kpukpru mbon oro ẹbuanade.—9/1, page 18.
◻ Ntak emi idem mîkememke apostle Paul kpa ye kpukpru se enye ekenyenede ndiyọ?
Paul anam an̄wan̄wa ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:13) Paul akananam ikodomoke ndibiom mme mbiomo esie ikpọn̄. Utu ke oro, enye ekese Jehovah ndimụm enye n̄kama. (Psalm 55:22)—9/1, page 30.
◻ Nso ke ikọ Paul oro ke N̄wed Mbon Ephesus 4:26: “Ẹyat esịt, ndien ẹkûdue” ọwọrọ?
Ikọ ẹmi ẹwụt nte ke owo ekeme ndiyat esịt ke usụn̄ oro ekerede ke enen, edi ke ini emi otịbede, owo emi ikpakaha iso idu ke idaha ‘iyatesịt tutu utịn osụhọde.’ (Ephesus 4:26) Ntak-a? Koro emi ọkpọnọ Devil ufan̄ ndida owo emi nnam n̄kpọ, ndusụk atapde enye ndinam idiọkn̄kpọ, man enye akpataba unyịme Jehovah. (Psalm 37:8, 9)—9/15, page 21.
◻ Nso akwa ukpụhọde idu ke usụn̄ oro Mme Ntiense Jehovah ẹkpepde n̄kpọ ye eke mme ọkwọrọ ederi Christendom?
Mme Ntiense Jehovah ẹkpep n̄kpọ ye odudu otode Ikọ Abasi, ke adan̄aemi mme ọkwọrọ ederi Christendom ẹkọn̄de ukpepn̄kpọ mmọ ke mme item ido ukpono ndem oro ẹkebọde ẹto Babylon ye Egypt.—10/1, page 25.
◻ Ke nso ata akpan ntak ke Eyen Abasi ekedi isọn̄?
Jesus ekedi isọn̄ akpan akpan ye uduak edibiere eneni oro Satan ekedemerede kaban̄a itie edikara Jehovah.—10/15, page 13.
◻ Ke ndikot mme ukara ererimbot “n̄kpon n̄kan,” nte nnyịn ke usụn̄ ekededi imodụri ntịn̄enyịn ikpọn̄ ukpono oro enyenede Jehovah? (Romans 13:1, NW)
Baba, sia Jehovah omokpon ata etieti akan ikpîkpu edidi “n̄kpon n̄kan.” Enye edi ‘Ọbọn̄ Andikara,’ “Ata Edikon̄.” (Psalm 73:28; Daniel 7:18,22) Mme ukara ererimbot ẹdi n̄kpon n̄kan n̄kukụre ke ebuana ye mme owo eken ke itieutom mmọ. Mmọ ẹnyene mbiomo ndikara nnyụn̄ n̄kpeme mme n̄kann̄kụk.—11/1, page 12.
◻ Ntak emi ima edide andikpon n̄kan ke otu mbun̄wụm spirit Abasi usụkkiet oro ẹsiakde ke N̄wed Mbon Galatia 5:22, 23?
Mbun̄wụm spirit Abasi itiaita eken edi uyarade, m̀mê nsio nsio ikpehe ima, kpa enyeoro ẹsiakde akpa. Kpukpru mbun̄wụm spirit eken ẹdi edu ẹyomde, edi mmọ ididaha ufọn isọk nnyịn edieke nnyịn inanade ima. (1 Corinth 13:3)—11/15, page 14.
◻ Mme ufọn ewe ẹdu ndibọn̄ akam mban̄a ekemmọ mme andinịm ke akpanikọ?
Ke ini nnyịn inamde mfọnọn̄kpọ eke spirit mmọ en̄wen edi ibuot nneme akam nnyịn, nnyịn imesitịm isan̄a ikpehe mmọ ke ima nditọete. Nnyịn n̄ko imesikop mmọ mbọm, ibuanade ke udọn̄ ye mfụhọ mmọ. Ntem, ẹsimen ndotndot ekikere ekededi ẹfep, ẹyakde ufan̄ ẹnọ ekikere oro ọbọpde-bọp oro anamde nnyịn itie ima ima ye idara idara.—11/15, page 21, 22.
◻ Mme ntak ewe ẹnyịk owo ndituak ibuot nnọ Jehovah Abasi?
Nnyịn ikpenyene ndituak ibuot nnọ Jehovah koro enye edide Andibot ndien mme edu esie ẹdụri nnyịn ekpere enye. (Deuteronomy 32:3, 4; 1 John 4:8; Ediyarade 10:6) Bible ọdọhọ ete: “Uten̄e Abasi ọwọrọ udori ke kpukpru usụn̄, koro un̄wọn̄ọ uwem emi odude ke emi ye eke uwem emi edidide asan̄ade ye enye.” (1 Timothy 4:8) Baba abasi kiet idụhe ke ebede Jehovah oro ekemede ndin̄wọn̄ọ orụk n̄kpọ emi ndien ekem anam un̄wọn̄ọ esie osu.—12/1, page 6, 7.