Ntọt M’ọkwọrọ Obio Ubọn̄
Ndikwọrọ Eti Mbụk ke “Utịt Ererimbot”
“ẸYENYỤN̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” Jesus eketịn̄ ntre ọnọ mme mbet esie ibio ini mbemiso enye akpade. Ndondo oro enye ama ekeset ke n̄kpa, enye ama akaiso ọdọhọ ete: “Mbufo ẹyenyụn̄ ẹdi ntiense Mi ke Jerusalem, ye ke ofụri Judea ye Samaria, tutu osịm utịt ererimbot.” (Matthew 24:14; Utom 1:8) Mfịn, prọfesi ẹmi ẹmesu ke se ibede idụt 200, esịnede idụt Peru eke mbon South America.
Mme Ntiense ẹwakde ẹbe owo 32,000 ke ẹkwọrọ eti mbụk ke ediye idụt oro, ndien efakutom mmọ ke akpanikọ esịne ndusụk nsannsan ikpehe ke ererimbot: ikpọ obot Andes, ẹmi ẹkon̄de ke ikpat 14,000 ye 15,000, n̄ko ye ufiop ufiop akai Amazon, emi ẹkemede ndida n̄kpri ubom kpọt nsịm mme owo. N̄kọk itieutom Peru ọtọt ete:
◻ “Ke n̄kan̄ akai oro, nnyịn imenyene akpan asiakusụn̄ itiaita ẹmi ẹkenọde n̄kpri ubom iba oro ẹkotde lanchas. N̄kpri ubom ẹmi odụk mmọn̄ ke ikpat kiet kpọt, ntre esimem utom nditat edikwọrọ eti mbụk n̄kosịm ediwak mbufa ebiet ke ata n̄kpri inyan̄ oro. Mi kan̄a, nditọete ẹmi ẹkamade n̄kpri ubom mi ẹma ẹnịm ediwak tọsịn magazine, n̄wed, ye Bible ke mme itie ikie, ke ofụri Itịghede Amazon eke mbon Peru. Nte nnennen utịp, ẹma ẹsiak mbufa esop inan̄, adianade ye otu ition oro ẹdude nsannsan, ẹmi esitọtde ibatutom ẹnyụn̄ ẹnịmde mme mbonoesop. Ẹdori enyịn ẹte ke otu ẹmi ẹyesọp ndikabade ndi mme esop.”
◻ Ẹma ẹsiak obio-in̄wan̄ kiet ke n̄kann̄kụk ebiet ukot aran ke esan̄ukwak Mbe Obot Andes, emi esimende aran ke obio-n̄wan̄ oro ebe n̄kokon̄ Obot Andes aka utọ anyan ebiet nte mbenesụk edem usoputịn. Ke ntak mme mbonutom itie aran esan̄ukwak emi ẹkedude do, obio emi ama enyene itie unyam mmịn 20, onyụn̄ edi se ẹdiọn̄ọde nte ebiet ukpammịn ye udia-uwem. Nte ededi, ke mme akpan asiakusụn̄ ẹma ẹkenọ ikọ ntiense mfọn mfọn, ediwak owo ẹma ẹnam n̄kpọ ẹban̄a etop Obio Ubọn̄, ndien idahaemi itie unyam mmịn inan̄ kpọt ẹdu ke obio oro! Ke ini esenyịn circuit akakade do ndondo emi, owo 189 ẹkedi ẹdikop utịn̄ikọ an̄wa. Idahaemi otu oro esịnede asuanetop 7 odu ke obio oro, ndien owo ẹwakde ẹbe 45 ẹsidụk kpukpru mbonoesop. Ibịghike, ye edidiọn̄ Jehovah, enye eyekabade edi esop.
◻ Ke kiet ke otu esop 221 ẹmi ẹdude ke ibuot obio Peru, Lima, eren emi ọsọn̄de ke isua 29 obụk nte enye ọkọbọde akpanikọ. Ke ọkpọn̄de ufọkn̄wed ke edide isua 13 ke emana, enye ama odụk n̄ka ntịme onyụn̄ ọtọn̄ọ utom un̄wana en̄wan, uda n̄kpọsọn̄ ibọk ye unam oburobụt ido. Ke ama okokụre amama-ye-mûmaha utomekọn̄ ke isua iba, enye ama ọtọn̄ọ ndinyene mfịna ke ibuot. Ekem, ke 1983, osụhọdeidem eyenete an̄wan kiet, emi mîsarike asari ama osobo ye enye ke utom eke ufọk-ke-ufọk. Nte akpa ini, enye ama okop n̄kpọ aban̄a obufa ererimbot oro ima ye emem ẹdidude. Ẹma ẹtọn̄ọ ukpepn̄kpọ Bible, ndien ye ima ima un̄wam otode esop ye ke odudu Jehovah, enye ama ekeme ndikan ndiọi ido esie. Ke 1986 enye ama ana baptism, ndien idahaemi enye ke anam utom nte asan̄autom unamutom ke esop.
Ke akpanikọ, ikọ Jesus oro nte ke ẹyekwọrọ Obio Ubọn̄ ke “utịt ererimbot” ke osu ke Peru ye ndyọ ndyọ utịp, ke ufọn ediwak owo ẹmi ẹkopde biọn̄ ye nsatitọn̄ akpanikọ ke idụt oro.