Obufa ererimbot ekpere!

ẸSINỌ ediwak ekikere ẹban̄a nte ẹkpekọkde mme mfịna ererimbot. Ke ofụri ofụri, mmọ ẹsiyom ekikere ye edidianakiet ọkọrọ ye kpukpru idụt ke ofụri ererimbot ndisịn n̄wọrọnda ukeme. Ẹkere ke nte n̄kpọ ẹdiọkde ẹkan, ufọn edinyene ukpeme edem mbiba eyenyịk mme idụt ndifiak n̄kere mban̄a mme ebeiso n̄kpọ mmọ nnyụn̄ ndian ubọk nnam obufa ererimbot oro ẹkemede ndidụn̄. Ẹkere ke ẹyesịbe okụk ẹsisiode ẹnịm ndidep n̄kpọekọn̄ ẹfep akamba akamba man ẹkeme ndida inyene emi n̄kọk mme mfịna n̄kann̄kụk ye, nte ẹwụtde ke State of the World 1990, “utu ke mmọ ndinyene akwa ndutịm ukpeme idem eke mmọ, mme ukara ukaraidem ẹkeme ndiberi edem ke akwa ntatara ye ọsọn̄idem udịmekọn̄ unam emem U.N., kpa kiet oro edinyenede ukeme ye odudu ndikpeme idụt ekededi oro abuanade ye enye nsio ke ubọk idụt nyomikọ.”

Edi mme utọ ndutịm oro ẹkpu ofụri ofụri ke ndida mme idaha oro ẹyomde ẹmi ẹkesiakde ke mme ntọn̄ọ ntọn̄ọ page n̄wed nnyịn ndi. Mme ikpîkpu ndutịm ubọk owo ikemeke ke baba usụn̄ kiet ndikọk mme idiọkn̄kpọ ye idiọkitọn̄ ubonowo; mmọ isioho usua ye en̄wan eke orụk ifep; mmọ ision̄oke ima unana ibụk ke otu ofụri ubonowo idi; mmọ inyụn̄ ikemeke ndin̄wọn̄ọ ke iyeda utịt isọk udọn̄ọ ye n̄kpa. Owo inamke n̄kpọ iban̄a ubiatibet nte ekemde, m̀mê owo ndikam ntetịn̄ nte ke ẹyemen utọk ye usua ido ukpono ẹfep. Ndien owo ikam ikereke-kere iban̄a edisio mme unọmọ ẹtode obot mfep. Ẹyak ufreidụt akaiso, ye ukeme oro enye enyenede ndida mme mfịna ndi. Ke mfụhọ, ndien, ana nnyịn isịm ubiere nte ke ubonowo okpu ndida usọbọ emi enyenede ufọn ndi.

Edi, usọbọ odu! Ke akpanikọ, ẹma ẹn̄wọn̄ọ kpukpru n̄kpọ ẹmi ubonowo oyomde mi, ndien en̄wọn̄ọ emi oto Abasi “emi mîkemeke ndisu nsu.” (Titus 1:2) Enye ọfiọk nnennen nnennen se ẹnyenede ndinam, enye onyụn̄ enyene ọniọn̄, odudu, ye ukeme ndinam se enye akaduakde.​—Ediyarade 7:12; 19:1.

Abasi ọn̄wọn̄ọ ete: “Osụk esisịt idiọkowo ididụhe: ndien ke afo etịn̄de enyịn ke ebiet esie, enye ididụhe. Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”​—Psalm 37:10, 11.

Didie ke ẹdinam emi? Isaiah 11:9 ọbọrọ ete: “Mmọ idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah eyeyọhọ ke ererimbot, kpa nte mmọn̄ ofụkde inyan̄.” Ih, ẹyekpep ofụri ubonowo “ifiọk Jehovah,” ndien owo idiyakke owo ekededi ẹmi ẹsịnde ndidu uwem ekekem ye ifiọk emi ẹdu ẹnyụn̄ ẹtịmede emem mbon en̄wen. Owo idisoboke ediye isọn̄ nnyịn aba.

Psalm 46:8, 9 ọn̄wọn̄ọ ete, “Ẹdise se Jehovah anamde . . . Enye anam ekọn̄ etre tutu osịm ke utịt ekondo.” (Se n̄ko Micah 4:3, 4.) Akpan n̄kpọ kiet ke ndinam emem odu ke ekondo edi ndida utịt nsọk en̄wan idụt ye idụt. Ẹn̄wọn̄ọ ke edidianakiet eyedu, sia ukara kiet kpọt edidude ke ofụri ererimbot​—kpa eke Abasi. Ndien ukara esie edi Obio Ubọn̄ “eke [owo] mîdisoboke ke nsinsi.” (Daniel 2:44) Akande oro, Edidem esie edi enyeoro ẹkenamde eset, kpa Jesus Christ emi mîkemeke ndikpa, oro edikarade ke unenikpe ye edinen ido.​—Isaiah 9:6, 7; 32:1.

Edi nte ndammana unana mfọnmma owo eyebiat emi ndien n̄kaiso ubiak, udọn̄ọ, eseme, ye n̄kpa otịmede enye? Baba, koro mmọemi n̄ko ẹdide n̄kpọ eset. Ediyarade 21:4 ọn̄wọn̄ọ ọnọ nnyịn ete: “Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.” Ẹyefen ndammana idiọkn̄kpọ ke ntak uwa ufak Jesus, ndien ẹyefiak ẹda ubonowo ẹkesịm mfọnmma idaha. (Rome 6:23; Ephesus 1:7) Ndien anie ekeme ndidu ke mfọn n̄kan idaha ndikara odudu obot nnyụn̄ n̄kpeme mmọ mbak ẹdinọ ubonowo unan akan Andibot mmọ?​—Psalm 148:5-8; Isaiah 30:30.

Mme n̄kpọ oro owo ekemede ndikekere nnyụn̄ ndori enyịn mban̄a kpọt, Abasi eyenọ. Edi ini ewe? Prọfesi Bible owụt ke mme ukpụhọde ẹmi ẹdidi ke ini mme idụt ‘ẹdiyatde esịt,’ owo ẹdinyụn̄ “ẹsobode isọn̄.” (Ediyarade 11:18) “Ndiọkeyo” onịm utịt akani ererimbot emi idiọn̄ọ​—osụn̄ọde ke idaha ẹmi ẹdiọkde-diọk ẹkan ẹmi nnyịn ikụtde nte ẹkande nnyịn ẹkụk idem idahaemi. (2 Timothy 3:1-5, 13) Ndien Jesus ama ebemiso etịn̄ ete ke emana emi okụtde mme utọ n̄kpọ oro edidi emana emi edikụtde edisu mme un̄wọn̄ọ Abasi.​—Matthew 24:3-14, 32-34.

Da ini dụn̄ọde mme un̄wọn̄ọ oro ẹkewetde ẹnịm ke Bible. Koro ke ọtọ emi, mme owo ẹmi ẹnyenede ifiọk ye Abasi ẹmenyịme ẹte: Idahaemi edi ini ọnọ obufa ererimbot!