Ido oro Anamde Ukpepn̄kpọ Abasi Enyene Uku

Ndondo emi, mme akama-utom ke usiakifia kiet ke Caracas, Venezuela, ẹma ẹnọ leta ẹsọk mbiowo ye mme asan̄autom unamutom ke esop Mme Ntiense Jehovah oro odude ekpere. Ke leta oro mmọ ẹkewet ẹte: “Nnyịn imokop ata nti ikọ iban̄a mme owo ke ido ukpono mbufo ke mmọ ndidiọn̄ọ ufọn edibiom mbiomo ye edinam akpanikọ. Edi ke ntak emi ke nnyịn ibịne mbufo idahaemi. Ke ntak nnyịn idahaemi inanade mbonutom, nnyịn imoyom owo iba usọp usop ndida mme itieutom ẹtienede mi: kiet enyene ndidi awat o-moto ndien enye eken edidi esenyịn ufọk ubon n̄kpọurua. Nnyịn iyenen̄ede idara ndibọ ntọt ekededi oro mbufo ẹkemede ndinọ mban̄a owo ke esop mbufo m̀mê ke esop odude ekpere. Nnyịn ke akpanikọ iyomke ndida owo oro mîdịghe owo Ntiense. Mbọk, ẹnam nnyịn ifiọk idem edieke owo ndomokiet mîdụhe, sia nnyịn idibetde ibọrọ mbufo mbemiso inamde ubiere ekededi.”

Ke ẹma ẹkekụt leta oro ke idak usụn̄ Ufọkmbono Obio Ubọn̄, kiet ke otu mbiowo esop oro ama aka okosobo ye enyene-usiakifia oro itịn̄de iban̄a mi. Enyene-usiakifia oro ama anam mbubehe ye Mme Ntiense Jehovah ke isua 15 onyụn̄ eti nte imọ mîkenyeneke akwa mfịna ndomokiet ye mbonutom imọ oro ẹkedide Ntiense. Enye ọkọdọhọ ke mmọ ẹdi ifịk ifịk mbonutom oro ẹdade utom ke akpan n̄kpọ, ẹnyụn̄ ẹnamde akpanikọ. Enye ndien ama adian do ete: “Ami mmọfiọk nte ke mbufo isinyịmeke inọ mme anamidiọk, mbufo ẹmesisio mmọ ẹfep. Oro owụt ete ke esop mbufo iyomke ndidụk nsan̄a ye mme uto owo oro.”

Utọ ido oro amanam ukpepn̄kpọ Abasi enyene uku. (Titus 2:10) Enye edi utịp unyene ata udọn̄ ndisọn̄ọ nyịre ket-ket ke nti ido uwem oro ẹsiode ẹwụt ke Bible.