Okụk Idụhe inọ Nnan

Mbahade itiaita eke ikie ke otu nnan ẹmi ẹdude ke ererimbot ẹdụn̄ ke mme idụt ntatenyịn. N̄wakn̄kan ibat ẹdu ke Southeast Asia. Do, owo kiet ke otu owo 25 edi nnan mîdịghe okụt n̄kpọ ubak ubak, ntre ke WHO (World Health Organization [Esop Nsọn̄idem Ererimbot]) ọtọt. Nso idi akpan ntak? Unana eti udia nsọn̄idem ye mme udọn̄ọ ẹtode ndedehe ido ukamaidem.

Nte ekemde ye magazine mbon Dutch oro, Internationale Samenwerking, WHO ọdọhọ ete, ye dollar eke U.S. tọsịn million iba ke isua, imọ imekeme ndinam eti ubịnikọt ndibiọn̄ọ udọn̄ọ nnan ke mme idụt ntatenyịn. Okposụkedi ibatokụk emi ekpride akan se mme ukara ererimbot ẹsibiatde ke mme mbubehe ekọn̄ ke usen kiet, WHO ọdọhọ ke imọ ikemeke ndinyene okụk oro iyomde.

Ntre, sia mînyeneke okụk oro ekemde, n̄kukụre se imọ ikemede ndinam idahaemi edi ndin̄wana n̄kpan udọn̄ọ nnan ke ndideme mme n̄kpasịp ibọk vitamin A nnọ nditọn̄wọn̄. N̄kpọ nte nditọn̄wọn̄ 400,000 ke India, Indonesia, Bangladesh, ye Philippines ẹdọnọ udọn̄ọ enyịn oro unana vitamin A edide ntak. Edi WHO ebemiso etịn̄ aban̄a nsobo ete, ye ibat nnan ẹdude idahaemi, ke ererimbot eyenyene nnan million 84 ye mbon oro ẹkụtde n̄kpọ ubak ubak etisịm isua 2000.