“Mme Item ke Ndibọk Eyen oro Okopde Inemesịt Onyụn̄ Okụtde Unen”

KE IDAK akamba ibuotikọ emi, magazine oro Medical Aspects of Human Sexuality ama emịn̄ ibuotikọ kiet emi Dr. Irene Jakab, akwa ekpep udọn̄ọ mbeibuot ke ufọkn̄wed ntaifiọk, okowụtde se enye ekerede ke edi se ẹyomde edieke anade nte ẹbọk eyen oro edidide akwa owo oro okụtde unen. Se ikesịnede ke otu “mme item” esie ekedi ufọn oro anade mme ete ye eka ẹma eyen mmọ, ẹda enye usụn̄ ke se inende ye se ikwan̄ade, ẹnyụn̄ ẹkpep enye ndinam mme ubiere. N̄wan emi ama owụt ete ke “mme item” ẹmi ikpedehedei isịne usọp usọp iyatesịt ke n̄kan ete ye eka, ndiyom se idide mfọnmma, editịmede esịt oro ebede ubọk, m̀mê edu unana ukpan.

“Mme item” Dr. Jakab ẹfọn etieti edieke ẹtienede mmọ. Ke akpanikọ, ke ediwak tọsịn isua ẹmi ẹkebede, Bible ama ọnọ mme ete ye eka mbiet item oro. (Se, ke uwụtn̄kpọ, Mme N̄ke 4:1; 13:24; 22:6; Colossae 3:21.) Nte ededi, Bible esịn n̄kpọ oro Prọfesọ Jakab osiode ọduọk: edikpep nditọ ndima Andibot mmọ nnyụn̄ mmehe ye Ikọ esie, oro edide ata akpan n̄kpọ. Apostle Paul ekewet ete: “Mbufo mme ete, ẹkûfiomo nditọ mbufo; edi ẹkama mmọ ke ntụnọ ye item Ọbọn̄ [Jehovah].”​—Ephesus 6:4; Deuteronomy 6:4-7.

Ke utọ ukpep ntre mîdụhe, nditọn̄wọn̄ ẹkeme ndikọri n̄wọrọ owo ye unana ukwak ubom eke eti ido. Utịp ekeme ndidi n̄kpọ afanikọn̄ ke oburobụt ye mbiara ererimbot emi.