N̄kparawa Owo Ẹmi Ẹnamde N̄kpo Abasi

NTE afo emesikụt etiede esen esen kemi ndiye n̄kparawa owo ẹsiyakde ini mmọ ẹnọ, ye unana ukpeokụk, man ẹdi enyịnusụn̄ fo ẹditịn̄ n̄kpọ ẹban̄a Abasi? Nte esikpa fi idem, ke emana oro unana edinịm ke akpanikọ ọkọride-kọri, kemi nditọ ẹsisan̄ade ye mme ete ye eka mmọ ke nditịn̄ nnọ mbon en̄wen mban̄a mme utịbe utịbe un̄wọn̄ọ Bible eke idara idara ini iso?a

Ke ekese esop Mme Ntiense Jehovah oro awakde ebe 60,000 ke ofụri isọn̄, afo eyekụt ediwak n̄kparawa owo. Mmọ isikaha Ederi nditọn̄wọn̄ (Sunday school) eke urua ke urua m̀mê ndibọ ukpepn̄kpọ catechism. Utu ke oro, n̄kparawa owo ẹmi ẹsibọ ufọn ẹto ẹnyụn̄ ẹbuana ke mme mbonoesop. Ata n̄kpri owo ẹkeme ndinọ mmemmem ibọrọ. N̄kpri owo oro mîsịmke isua duopeta ẹsibuana ke Ufọkn̄wed Utom Ukara Abasi. Ediwak uyen ke ufọt isua duopeta osịm efụtenan̄ ẹsibiat ini nduọkodudu ufọkn̄wed ke ndin̄wam mme mbọhọidụn̄ ẹkpep n̄kpọ ẹban̄a Abasi ye mme utịbe utịbe un̄wọn̄ọ esie kaban̄a ini iso.

Idụhe n̄kpọ oro enen̄ede edi obufa aban̄a utọ utom ini uyen oro. Bible etịn̄ aban̄a mme anam-akpanikọ n̄kparawa iren ye iban, ọkọrọ ye mme uyen ye n̄kpri nditọn̄wọn̄, ẹmi ẹkenịmde n̄wọrọnda uwụtn̄kpọ ke ndinam n̄kpọ Abasi.

N̄wed Bible eke Psalm ama ebemiso etịn̄ aban̄a ‘nsan̄a n̄kparawa iren,’ nte ẹkopde odudu ẹnyụn̄ ẹwakde nte “mbara,” ke utom Abasi. Enye n̄ko ama etịn̄ aban̄a “n̄kparawa” ye “nditọiban” ẹmi ẹtorode enyịn̄ Abasi. (Psalm 110:3; 148:12, 13) Anaedi ndusụk n̄kparawa owo ẹma ẹsịne ke otu mbon oro ẹkedude ke ini ẹken̄wan̄ade edisana spirit Abasi ẹfụk mme andinịm ke akpanikọ ke Pentecost eke 33 C.E. Ke usen oro n̄kpọ nte owo 3,000 ẹma ẹnyịme Ikọ oro ẹnyụn̄ ẹna baptism. Apostle Peter ọkọdọhọ ke nduaidem nduaidem n̄kpọntịbe emi ekedi edisu oro prọfesi Joel okosude ete: “Nditọiren mbufo ye nditọ mbufo iban ẹyetịn̄ prọfesi, n̄kparawa mbufo ẹyekụt n̄kukụt, mbiowo mbufo ẹyenyụn̄ ẹdaba ndap.”​—Utom 2:4-8, 16, 17, 41.

Mme uwụtn̄kpọ Bible eken oro aban̄ade mme owo ẹmi ẹkenamde n̄kpọ Jehovah Abasi ke ini uyen mmọ esịne Samuel, edinen Edidem David, Jeremiah ye Daniel, mme prọfet a-Bible oro ẹtịmde ẹdiọn̄ọ, ọkọrọ ye Timothy anam-akpanikọ. Nsiondi emi emesịne ibuotikọ ita oro ẹnemede n̄kpọ aban̄a ndusụk uwụtn̄kpọ Bible ẹmi. Ke ibuotikọ ẹmi, afo eyekụt ntak emi mme uyen, ye ikpọ owo nde, ẹdade edinam n̄kpọ Abasi nte akpan n̄kpọ ye ntak emi mmọ ẹbiatde ata ekese ini ndin̄wam mme mbọhọidụn̄ mmọ ẹnam ukem oro.

[Mme Ikọ Idakisọn̄]