Ntọt M’ọkwọrọ Obio Ubọn̄

Ikọ Ntiense Ido Nneme Omon̄wụm Mfri

JESUS ama ọtọn̄ọ nneme oro akadade okosụn̄ọ ke ata enyene-odudu ikọ ntiense ido nneme ke ini enye ọkọdọhọde n̄wan-a-Samaria kiet ke obube mmọn̄ ete: “Nọ Mi mmọn̄ n̄n̄wọn̄.” (John 4:8) Ukem ntre, nnyịn mfịn imekeme ndinyene uforo ata etieti edieke nnyịn idude ke edidemede inọ kpukpru ifet unọ ikọ ntiense ido nneme oro ediberede. Eyenete kiet ke Australia ama ọtọn̄ọ nneme ufan ufan ke ndikot text usen oro ke anyan n̄kpọitie ke in̄wan̄ inemesịt. Eren kiet oro ekenyenede udọn̄ ama okụt n̄wed oro onyụn̄ ọdọhọ ke imọ n̄ko imenyene udọn̄ ke N̄wed Abasi. Enye ekedi owo Catholic oro mîsinamke edinam ido ukpono emi ẹkenyụn̄ ẹkpepde enye ukpepn̄kpọ edito-ke-unam-mforo-owo ke ufọkn̄wed Catholic, ndien idahaemi mîkọfiọkke se okponịmde ke akpanikọ. Eyenete oro ama odiomi ndibọ n̄wed Life—How Did It Get Here? By Evolution or by Creation? nnọ enye.a Usen iba ẹma ẹkebe enye ama ada n̄wed oro aka itieutom eren oro, ndien ẹma ẹdọhọ enye ke eren oro ọwọrọ. Ewetn̄wed esie ama awamade n̄wed oro ọbọ, ọdọhọde ete: “N̄wed emi ke nnyịn ikakam itie ibet.”

Hour iba ke ukperedem eyenete oro ama ọbọ ikot ke urụk ukopikọ oto eren oro ọdọhọde ke imoyom n̄wed Creation iba efen onyụn̄ ọdọhọde ete yak Ntiense oro edikụt imọ ke ọfis. Ke ini eyenete oro akakade ọfis oro, enye ama okụt ete oro ye owo iba efen. Ẹma ẹtọn̄ọ ukpepn̄kpọ Bible ye mmọ, esịnede ewetn̄wed oro, ndien ẹma ẹdiomi ẹte ke eyenete oro edisika do ikaba ke urua. Ke mme urua oro ẹkedide ke iso, ufan an̄wan ete oro, kpa ‘Christian oro afiakde amana obufa,’ ama akaiso ndinọ n̄wed edi, obụpde mme mbụme a-Bible. Ke akpatre, eyenan̄wan emi ama etiene abuana ke ukpepn̄kpọ oro, kpa nte nsan̄a mbubehe ete oro ye ufan esie, ẹmi okonịmde ukpepn̄kpọ edito-ke-unam-mforo-owo ke akpanikọ.

Mmọ ẹma ẹkaiso ke ukpepn̄kpọ Bible mmọ kpukpru ini ke ufan̄ ọfiọn̄ ition, ye ọyọhọ ukpepn̄kpọ iba eke urua ke urua oro ẹnịmde ke in̄wan̄ inemesịt oro. Ekem ufan ewetn̄wed oro ama etiene abuana ke otu ukpepn̄kpọ oro. Ibịghike ke oro ebede, akpa nsan̄a eren oro ye ufan esie ẹma ẹwọrọ ẹka Idaho ke United States, ke ebiet mmọ ẹkekade iso ẹkpep n̄kpọ. Urua ifan̄ ke ukperedem, esenowo ama okosobo akpa owo oro, onyụn̄ obụp m̀mê nso itịbe inọ nneme Bible oro ẹsinyenede ke in̄wan̄ inemesịt oro. Nte odotde, enye ama esikpan̄ utọn̄ ọnọ ukpepn̄kpọ mmọ. Ẹma ẹnam ndutịm ukpepn̄kpọ ẹnọ enye n̄ko.

Nso ikedi utịp kpukpru ẹmi? Ọfiọn̄ efụteta ọtọn̄ọde ke akpa edisobo oro ke in̄wan̄ inemesịt oro, akpa owo oro ye ufan esie an̄wan, kpa akani ‘Christian oro afiakde amana obufa,’ ẹma ẹdọ ndọ ẹnyụn̄ ẹna baptism. Ewetn̄wed oro ye ufan esie ẹma ẹdọ ndọ n̄ko ẹnyụn̄ ẹna baptism. Nsan̄a mbubehe oro ye ufan esie emi akakade United States ẹma ẹna baptism, ndien kiet ke otu mmọ ke anam utom idahaemi kpukpru ini nte asiakusụn̄ unọ un̄wam. Owo oro akakpan̄de utọn̄ ọnọ nneme a-Bible ke in̄wan̄ inemesịt oro ke akaiso ke ukpepn̄kpọ esie. Enye ndien ama adaha aka Ireland, ndien enye ke akasak iso ese ndina baptism!

Kpukpru ẹmi ẹkeda itie koro eyenete kiet akadade ini nduọkodudu udia uwemeyo esie ọnọ ikọ ntiense ido nneme, ndien Jehovah ama ọdiọn̄ mme ukeme esie. Ukem oro n̄ko nnyịn ikpakam ida kpukpru ifet oro inyenede isuan eti mbụk inọ mbon oro ẹkopde biọn̄ ẹban̄a ẹtop Obio Ubọn̄!

[Mme Ikọ Idakisọn̄]