Nte Afo Emeti?

Nte afo ama okụt nte mme nsiondi Enyọn̄-Ukpeme eke ndondo emi ẹnyenede ufọn ẹnọ fi? Do ntak mûdomoke ibuot uti-n̄kpọ fo ye se itienede ẹmi-e?

◻ Nso ke ana nnyịn inam edieke nnyịn iyomde ndinyene n̄kemuyo ye emem nnọ kpukpru owo ẹmi ẹtode kpukpru orụk nte ẹwụtde ke Isaiah 2:4?

Akpa kan̄a, nnyịn inyene ndidiọn̄ọ nte ke Andibot nnyịn, Jehovah, enyene unen ndikpep nnyịn “ido esiemọ.” Ndien ọyọhọ iba, ana nnyịn inyene akpan udọn̄ ndidu uwem ekekem ye mme ewụhọ Abasi ebe ke ndidọhọ nte: “Nnyịn iyenyụn̄ isan̄a ke usụn̄ esie.” (Isaiah 2:2, 3)​—12/15, page 5, 6.

◻ Ntak emi usua ye ubiọn̄ọ eke ofụri ererimbot mînamke Mme Ntiense Jehovah ẹtek ke ifịk ẹnyụn̄ ẹtie mfụhọ mfụhọ-ọ?

Jesus ama ebemiso etịn̄ ete ke utọ ubiọn̄ọ ye usua ntre edidi n̄kpọ oro ẹdidade ẹdiọn̄ọ mme ata andituak ibuot. (John 15:20, 21; :2 Timothy 3:12) Ntre ẹfiak ẹsọn̄ọ mme anditan̄a eti mbụk idem nte ke mmọ ẹnyene unyịme Abasi. Ke adianade do, Mme Ntiense Jehovah ẹdiọn̄ọ ẹte ke mmimọ imenyene ibetedem oro otode Ata Edikon̄ Abasi, kpa Jehovah.​—1/1, page 12.

◻ Nso idi ndusụk akpan n̄kpọ oro anade isịm edieke anade ẹbọrọ mme akam nnyịn?

Ana nnyịn inen̄ede inịm ke akpanikọ nte ke Abasi enen̄ede odu. Ana nnyịn ‘iyom enye ke ofụri esịt,’ inyenede mbuọtidem nte ke enye eyenọ mbon oro ẹnamde ntre utịp. (Mme Hebrew 11:6) N̄ko, ana nnyịn isan̄a ikpere Jehovah ebe ‘ke Jesus Christ ikpọn̄îkpọn̄. (John 14:6, 14)​—1/15, page 4, 6.

◻ Nso idi “ido [uten̄e] Abasi”? (1 Timothy 3:16)

Uten̄e Abasi edi ukpono, utuakibuot, ye utom ẹnamde ẹnọ Abasi, ye edinam akpanikọ nnọ ukara ofụri ekondo esie.​—1/15, page 11.

◻ Anie edi “owo eke edide ata abiatibet” oro Paul etin̄de aban̄a ke 2 Thessalonica 2:3?

Paul itịn̄ke iban̄a n̄kpasịp owo kiet, koro enye ọdọhọ ete ke “owo” emi ama odu ke eyo Paul ndien ke eyekaiso ndidu tutu Jehovah osobo enye ke utịt editịm n̄kpọ emi. Ntre, “owo eke edide ata abiatibet” edi ndamban̄a utịn̄ikọ. Uyarade omowụt nte ke enye edi atan̄-idem, eseri-iseri otu mme ọkwọrọ ederi Christendom, ẹmi ke ediwak isua ikie ẹkemende idemmọ ẹnịm nte ibet ke idemmọ.​—2/1, page 11.

◻ Didie ke ẹkeme ndisio idiọkitọn̄ mfep?

Ẹkeme n̄kukụre ndisio idiọkitọn̄ oro odude ke otu owo mfep ebe ke edinọ ukpep ye ntụnọ oro odotde, ẹtienede ndausụn̄ m̀mê mme ibet ido uwem ket-ket. Ana utọ ukpepn̄kpọ oro ọwọrọ oto ebiet oro idiọkitọn̄ mîdụhe. Edi Abasi emi odude ke heaven ikpọn̄îkpọn̄ ekeme ndinọ utọ ukpep emi, ndien ẹkụt uto ukpep oro ke n̄wed ndausụn̄ esie kpa Edisana Bible.​—2/15, page 5.

◻ Edieke anade ọkpọ ọkpọ ukpepn̄kpọ Bible osụn̄ọ ke edikọri ido uten̄e Abasi, nso ke ukpepn̄kpọ oro ekpesịne?

Uduak ọkpọ ọkpọ ukpepn̄kpọ ikpedịghe ikpîkpu edikot se idude ke mme page n̄wed n̄kụre ndien ke ntre ẹbọde ntọt ẹdọn̄ ẹyọhọ ibuot. Utu ke oro, ke ẹkotde ikpehe ikọ Abasi kiet, ana ẹda ini ẹkere ẹban̄a n̄kpọ oro man ẹbiere se enye ekpepde owo aban̄a mme edu ye usụn̄ Jehovah man otodo eyen ukpepn̄kpọ oro ekpekeme ndibiet Jehovah ke afan̄ emi.​—3/1, page 13.

◻ Ntak emi ọkpọ ọkpọ ukpepn̄kpọ Bible ekpesịnede edikot mme mbụk Gospel ẹmi aban̄ade Jesus kpukpru ini-e?

Uwụtn̄kpọ Jesus aman̄wam nnyịn ndikọri ido uten̄e Abasi. Jesus ama ọdiọn̄ọ Ete esie otịm ọfọn akan owo efen ekededi, ntre enye ama ekeme ndikpebe mme usụn̄ ye edu Jehovah ket-ket. Ntem, enye ama onịm mfọnmma uwụtn̄kpọ uten̄e Abasi ọnọ nnyịn. (John 1:18; 14:9; Rome 13:14)​—3/1, page 18.

◻ Ke n̄ke Jesus oro aban̄ade talent, edida mme talent oro nsịn ke utom ọwọrọ nso? (Matthew 25:19-23)

Edida mme talent oro nsịn ke utom ọwọrọ ndinam n̄kpọ ke edinam akpanikọ nte mme isụn̄utom Abasi, inamde mme mbet, inyụn̄ isuande akpanikọ eke spirit nnọ ikọtufọk Abasi. (Matthew 24:45; 28:19, 20; 2 Corinth 5:20)​—3/15, page 13.

◻ Ke nso usụn̄ ita ke Bible edi n̄wọrọnda ke ẹmende ẹdomo ye kpukpru ebiet eken oro ẹsinyenede item ẹto?

Akpa, item esie esinyene ufọn kpukpru ini. (Psalm 93:5) Ọyọhọ iba, Bible emebe udomo eke ini. (Isaiah 40:8; 1 Peter 1:25) Ọyọhọ ita, ntatara item Bible inyeneke mbiet. Inamke n̄kpọ m̀mê nso mfịna m̀mê ubiere ke nnyịn isak iso ise, ifiọk odu ke Bible oro ekemede ndin̄wam nnyịn.​—4/1, page 13.

◻ Nso idi uyarade iba ndiwụt nte ke Bible edi Iko Abasi, idịghe eke owo?

Anana-mbiet ifiọk Bible ye odudu oro enye enyenede ke ndikpụhọde mme owo. (Mme Nke 2:1. 5, 6; Mme Hebrew 4:12)​—4/1, page 21.