Ndikụt Inemesịt—Edi ke M̀mọ̀n̄?
JESUS ọkọdọhọ ete: “Ọfọfọn ọnọ mbon oro ẹnyenede udọn̄ ẹban̄a n̄kpọ eke spirit mmọ.” (Matthew 5:3) N̄kaiferi kiet oro enyenede esịt akpanikọ ke Middle East ama enyene udọn̄ aban̄a n̄kpọ eke spirit esie onyụn̄ oyom ndinem Abasi esịt. Ke akpatre, enye ama okụt inemesịt—edi ke m̀mọ̀n̄? Nnyịn imọn̄ iyak enye anam an̄wan̄a:
“Ẹkebọk mi ke Ufọkederi Catholic oro ẹnen̄ede ẹsịn idem ke ido ukpono. Ẹma ẹkpep nnyịn nditọn̄wọn̄ ndisibọn̄ akam ke iso mme mbiet kpukpru mbubịteyo, ndien toto ke ini uyen ami mma nnyene udọn̄ ndinam n̄kpọ Abasi.
“Ke isua 17 ke emana, mma ndụk ufọkn̄wed oku-iban ndikabade ndi nun, n̄kerede nte ke oro eyedi usụn̄ ndiyụhọ udọn̄ mi. Nte ededi, mma n̄kụt ediwak n̄kpọ ke otu mme nun oro ẹkefịnade mi. Mmọ ẹma ẹsitịn̄ ikọ-edem ẹban̄a kiet eken . Owo ikesinọhọ nditọ ufọkn̄wed udia ekem, ke adan̄aemi mme nun ẹkediade ata nti udia. Ndien do mme oburobụt edinam ẹma ẹdu ke ufọt mme nun ye mme oku-iren. Ke idotenyịn mi akpade mfụhọ idiọk idiọk, mma n̄kpọn̄ ufọkn̄wed oku-iban oro ke ọfiọn̄ usụkkiet ẹbede nnyụn̄ mfiak nnyọn̄ ufọk.
“N̄kosụk nnyenyene mme mbụme oro owo mîkọbọrọke, ndien ke ini ami mmen̄kekwe mme ibọrọ ẹyụhọde mi, mma nsịm udomo oro ami mmen̄kọdọn̄ke enyịn aba ke ido ukpono. Ndien, ke 1982, ke ndide isua 22 ke emana, ata eyeneka mi eren ye eyeneka mi an̄wan ẹma ẹkpep Bible ye Mme Ntiense Jehovah. Ete ye eka mi ẹma ẹbiọn̄ọ mmọ. Ekese ukọbọ ama osịm eyeneka mi eren, imia, ye n̄kpọkọbi ke ntak obufa ido ukpono esie. Se ikotụkde mi ke esịt, okposụkedi, ẹkedi ikpọ ukpụhọde oro enye akanamde ke uwem esie. Akande oro, enye ama esinọ mi ibọrọ Bible eke ẹsịnede ifiọk oro ami n̄kesibụpde ke anyanini. Ntre mma ntọn̄ọ ndịbe ndịbe ndikot Bible ke idemmi ke okoneyo.
“Usen kiet ami mma ntiene n̄ka ndise mbono Mme Ntiense Jehovah kiet. Ima oro ẹkewụtde do ama otụk mi ke esịt. Ubahade ikodụhe ke ufọt imọ owo ye ubuene. Mme Ntiense oro ẹma ẹdu uwem ke n̄kemuyo ye se mmọ ẹkpepde. Ami mma nnịm ke akpanikọ nte ke mmokụt akpanikọ.
“Ndondo oro ke mbono oro okụrede, ami mma ndọhọ owo mmọ kiet esikpep n̄kpọ ye ami. Mma ndọhọ n̄wan oro nte ke ami nyom ndikpep n̄kpọ kpọt, idịghe ndidụk mme mbono m̀mê ndika ukwọrọikọ, Nte ededi, ibịghike mma ndidiọn̄ọ nte ke ami n̄kekpep akpanikọ. Mma mbọn̄ akam nnyụn̄ mbiere ndinam n̄kpọ Jehovah. Ke October 28, 1983, ami ye eyeneka mi eren ye eyeneka mi an̄wan ima ina baptism. Idahaemi mma n̄kụt usụn̄ ndiyụhọ udọn̄ mi ndinam n̄kpọ Abasi oro ami n̄kenyenede toto ke uyen mi.
“Ọfiọn̄ iba ke baptism ebede, mma ntọn̄ọ utom usiakusụn̄ unọ un̄wam, ndien ọfiọn̄ itiaita ke ukperedem mma n̄kabade ndi asiakusụn̄ ofụri ini. Isua kiet ye ubak ke ukperedem, ẹma ẹkot mi ndinam utom ke n̄kọk itieutom eke Mme Ntiense Jehovah, ẹdiọn̄ọde nte Bethel, oro n̄kesinamde utom ke ibio ini ke isua iba. Nsụkidem oro kpukpru owo ẹkenyenede ama otụk mi ke esịt. Ata ikpọ nditọete ẹma ẹsibuana ke utom uyet usan ke udia mbubịteyo okụrede.
“Ke March 14, 1988, ami mma n̄kabade ndi owo ufọk Bethel tak-tak. Nso edinam inemesịt! Ih, ami mma n̄kụt inemesịt. Ke m̀mọ̀n̄? Ke otu Mme Ntiense Jehovah oro ẹyakde idem ẹnọ! Idahaemi etie mi ke idem nte eketiede andiwet Psalm oro ọkọdọhọde ete: “Usen kiet ke okụre fo ọmọfọn akan tọsịn [ke ebiet en̄wen].’”—Psalm 84:10.