Ntak Emi Jehovah Akayararede Enyịn̄ Esie-e?

N̄wed ukabade ikọ “Akani Testament” emi ẹkemịn̄de ke Poland ke 1964 ama ọbọrọ mbụme emi ke usụn̄ emi anamde owo ekere n̄kpọ. Ke ọbọde odudu umịn̄ n̄wed oto Ufọkederi Roman Catholic, Dr. Stanislaw Lach, akwa ekpepn̄wed ke University eke Lublin, ekewet ete:

“Mbon oro ẹnyan̄ade ẹnyene mbiomo ndiyarade enyịn̄ Abasi nnọ ubonowo.” Ekedi mbiomo nditọ Israel ndisịn ukeme man “mme Gentile ẹtoro enyịn̄ Jahwe (Jehovah) ẹkûnyụn̄ ẹtịn̄ idiọk ẹdian” enye. “Jahwe enyene se ọwọrọde . . . Ẹdikpe ikpe ẹnọ ererimbot ẹtiene nte ẹnamde n̄kpọ ye mbon oro ẹnyịmede enyịn̄ oro.” Akwa ekpepn̄wed oro ọkọdọhọ ke “enyịn̄ oro Jahwe eyekpon ke otu mme idụt . . . Enye eyetara osịm ofụri ererimbot. Se Moses eke nyenede ke ekikere edi oro . . . aban̄a enyịn̄ oro.”

Ih, nte prọfesi Malachi 1:11 ọdọhọde: “Enyịn̄ mi eyekpon ke otu mme idụt, Jehovah mme udịm ọdọhọ.” Ndien mmanie mfịn ẹtan̄a enyịn̄ oro ke ofụri ererimbot man “(ẹkpe)nyan̄a kpukpru owo eke ẹsemede ẹkot enyịn̄ Jehovah”? Edi Mme Ntiense Jehovah! Nte mme owo ẹnamde n̄kpọ ye ‘mme ekere enyịn̄ esie’ ẹmi, ih, “mbon oro enyịmede enyịn̄ ẹmi” edi n̄kpọ n̄kpa ye uwem ọnọ mmọ. Didie ke afo anam n̄kpọ ye Jehovah ye Mme Ntiense esie?​—Utom 2:21; 15:14; men Malachi 3:16-18 domo.