Ukọbọ ke Akaiso ke Burundi

KE NTỌN̄Ọ ntọn̄ọ 1989, mme andikara idụt Burundi ke ufọt ufọt Africa, ẹma ẹn̄wan̄a ukọbọ ẹfụk Mme Ntiense Jehovah. Nte ẹketọtde ke nsiondi Enyọn̄-Ukpeme eke August 15, 1989, ukara ama odomo ndinyịk Mme Ntiense ẹkan̄ mbuọtidem mmọ, ẹkamade mfiomo, edimụm, imia, ye mme edinam nsọn̄ido eken. N̄kpọ etie didie ọtọn̄ọde ke ini oro?

Ntọt efen otode Burundi ọdọhọ ete ke ini esenyịn district akakade Kinyinya ye Gitega, mbon ukara ẹma ẹdomo ndimụm mme andibuana ke esop oro ke mbono-esop kiet. Esenyịn district ye esenyịn circuit ẹmi ẹma ẹfehe ẹbọhọ, edi mbon oro ẹkemụmde ẹma ẹsịne nditọ ufọkn̄wed iba ẹmi ẹdude ke akamba ufọkn̄wed ye eyenan̄wan oro akade ekpri ufọkn̄wed. Ẹma ẹmia kpukpru mmọ. Ke ndan̄nsiere Mme Ntiense oro ẹkemụmde ẹma ẹdu ke iso andikara ẹnyụn̄ ẹnam an̄wan̄a ntak emi mmimọ mîkemeke ndibuana ke n̄ka ukaraidem. Ẹma ẹfiak ẹmia mmọ. Mme ntọt en̄wen ẹbụk mbiet n̄kpọntịbe emi.

Ọsọn̄idem Christian ebiowo kiet ke Burundi ewet ete: “Owo imụmke owo Ntiense Jehovah ndomokiet ke ntak inọ, uwotowo, m̀mê edibia ukara. Edieke ukara ẹnyenede ata isọn̄ ntak ndinọ Mme Ntiense ufen, yak mmọ ẹnam ntre ke ufọkesop utu ke nditụhọde nditọisọn̄ oro ẹtiede emem emem, ẹbụmede inyene mmọ, ndinyụn̄ mbịne mmọ nte unam ikọt. Ẹma ẹnyịk ediwak nditọete ke esịtidụn̄ ndifehe n̄kpọn̄ ufọk mmọ nnyụn̄ ndu uwem nte mbon nyon̄. Eyenete an̄wan kiet oro ebe esie odude ke ufọk-n̄kpọkọbi ama aka ndikụt ediwak mbon ukara man ẹkpesana ebe esie ẹyak. Kpukpru mmọ ẹma ẹbịn enye ẹfep ye ibọrọ emi: ‘Nnyịn ikemeke-keme ndisana ebe fo nyak ke adan̄aemi mbufo ẹbọde okụk ẹto esenidụt man otodo ẹbiat idụt nnyịn.’ Nso edidọk!”

Nte ededi, eti mbụk oto Burundi edi. Mme Ntiense do ikopke nyekidem m̀mê ndịk. Edi ye usọ, edikwọrọ eti mbụk atara ke akpanikọ, ndien nditọete iren ye iban ẹdiọn̄ọ ẹte, ye ọyọhọ mbuọtidem ke Jehovah, mmimọ imekeme ndiyọ. Ẹma ẹwewet ediwak leta oro owụtde iyatesịt ẹnọ ẹka Burundi, ndien eyịghe idụhe, ediwak owo efen efen ẹyetiene ẹwet ke ini ererimbot okụtde ete ke Burundi ye unana esịtmbọm ke akaiso ke ubịnikọt edikọbọ Mme Ntiense Jehovah.

[Ekebe ke page 15]

Address adaibuot ukara Burundi edi:

His Excellency Major Pierre Buyoya

President of the Republic of Burundi

Bujumbura

REPUBLIC OF BURUNDI