Ntọn̄ọ N̄wed
Ndima N̄kparawa Nnyịn,
Ete mbufo ke heaven, Jehovah Abasi, ama mbufo etieti. Enye oyom mbufo ẹkop inemesịt. Edi ẹmekeme ndibụp ẹte, ‘Ndi ẹkeme ndinen̄ede n̄kop inemesịt mfịn?’ Eti mbụme edi oro. Kamse, imosobo ediwak mfịna ke uwem. Etie nte mme mfịna oro isisobode kpukpru usen ẹkeme ndinam nnyịn ikûkop inem uwem. Edi edima Ete nnyịn esin̄wam nnyịn. Ikọ esie ọnọ ndausụn̄ ke nte ikpodude uwem ke idiọk ererimbot emi. Okposụkedi emi ẹkewetde Bible anyan ini ko ke edem, item esie enyene ufọn mfịn kpa nte ekenyenede ke ini oro ẹkewetde enye.—Psalm 119:98, 99; 2 Timothy 3:16, 17.
Nnyịn iwet n̄wed emi sia imama mbufo. Iyom mbufo ẹkop inemesịt ẹnyụn̄ ẹnen̄ede ẹkop inem uwem. Ntre, isịn udọn̄ inọ mbufo ite ẹkot n̄wed emi ọtọn̄ọde ke akpa esịm akpatre ẹnyụn̄ ẹfiak ẹkot enye ini ekededi oro ẹnyenede mfịna. Akpan n̄kpọ kiet oro iyomde n̄wed emi anam ọnọ mbufo edi ndinam mbufo ẹsinyene nneme ye ete ye eka mbufo. Imenịm ke mbufo ẹyekot, mîdịghe ẹkpep ndusụk ikpehe ke n̄wed emi ọtọkiet. Ẹyak ete ye eka mbufo ẹda ifiọk ye ọniọn̄ mmọ ẹn̄wam mbufo!
Imenen̄ede ikọm mbufo,
Otu Ukara eke Mme Ntiense Jehovah