Owo Emi Ekpekpebede​—Job

Uwem Job ama okpụhọde ofụri ofụri. Akpa, enye ama ataba kpukpru inyene esie. Ọyọhọ iba, kpukpru nditọ esie ẹma ẹkpan̄a. Ọyọhọ ita, udọn̄ọ ama adia enye idem. Kpukpru emi ẹketịbe ata usọp usọp ye ke mbuari. Job ama ofiori ke nnanenyịn ete: “Esịt etek ukpọn̄ mi aban̄a uwem mi.” Enye ama ọdọhọ n̄ko ke imọ ‘imoyụhọ esuene inyụn̄ iyụhọ ukụt.’ (Job 10:1, 15) Edi kpa ye ofụri afanikọn̄ emi, Job ikọkpọn̄ke Andibot esie. (Job 2:10) Enye ikayakke se iketịbede inọ enye okpụhọde orụk owo emi enye ekedide. Ntem, Job edi uwụtn̄kpọ owo emi enyenede ime.

Ke ini osobode mfịna, esịt ekeme ‘nditek fi n̄ko mban̄a uwem fo.’ Edi ukem nte Job, afo emekeme ndisọn̄ọ nda kpa ye oro n̄kpọ ẹkpụhọrede, aka iso anam n̄kpọ Jehovah Abasi. James ekewet ete: “Sese! nnyịn idọhọ ite ke mbon oro ẹkeyọde ukụt ẹkop inemesịt. Mbufo ẹmekop nte Job ọkọyọde ukụt, ẹmenyụn̄ ẹkụt utịp oro Jehovah ọkọnọde enye, nte ke Jehovah enen̄ede enyene esịt ima onyụn̄ atua owo mbọm.” (James 5:11) Enye ama ekere aban̄a Job, enye onyụn̄ ekere aban̄a fi!