IKPEHE 8
Nditọ Israel Ẹdụk Canaan
Joshua ada nditọ Israel usụn̄, mmọ ẹkan mbon Canaan ke ekọn̄. Jehovah anam mme ebiereikpe ẹsion̄o ikọt esie ke ufịk
ATA ediwak isua mbemiso nditọ Israel ẹkedụkde Canaan, Jehovah ama ọn̄wọn̄ọ ọnọ Abraham ete ke imọ iyọnọ ubon esie isọn̄ oro. Idahaemi, Joshua ada Israel usụn̄, ndien mmọ ẹben̄e idem ndidụk Isọn̄ Un̄wọn̄ọ.
Abasi ama okụt ke odot ẹsobo mbon Canaan. Mmọ ẹma ẹda oburobụt ido idan̄ ye afai ẹsabade isọn̄ oro. Ntre, akana nditọ Israel ẹsobo kpukpru owo ke mme obio Canaan oro mmọ ẹkekade ekọn̄.
Edi mbemiso mmọ ẹkedụkde obio oro, Joshua ama osio owo iba ọdọn̄ ẹkeyep isọn̄ oro, ndien mmọ ẹkedu ke ufọk Rahab ke obio Jericho. Rahab ama emen mmọ esịn ke ufọk esie onyụn̄ ekpeme mmọ, kpa ye oro enye ọkọdiọn̄ọde ke mmọ ẹdi nditọ Israel. Rahab ama ọbuọt idem ye Abasi nditọ Israel sia enye ama okop nte Jehovah akanyan̄ade ikọt esie. Enye ama anam mbon uyep oro ẹn̄wọn̄ọ ẹte ke mmọ idisoboke imọ ye ubon imọ.
Ke ini nditọ Israel ẹkedụkde Canaan ẹka ndin̄wana ekọn̄ ke Jericho, Jehovah ama anam ibibene Jericho ọduọ. Mbonekọn̄ Joshua ẹma ẹsọp ẹdụk ẹsobo ofụri obio oro, edi mmọ ikotụkke Rahab ye ubon esie. Ekem Joshua ada isua itiokiet an̄wana ata ediwak ekọn̄ onyụn̄ akan ata akamba ikpehe ke Isọn̄ Un̄wọn̄ọ. Ẹma ẹbahade isọn̄ emi ẹnọ mme esien Israel.
Joshua ama anam n̄kpọ Abasi ke ata ediwak isua ndien ke ini enye okoyomde ndikpa, enye ama okot kpukpru owo obon ọtọkiet. Enye ama eti mmọ se Jehovah akanamde ọnọ mme ete ete mmọ, onyụn̄ esịn udọn̄ ọnọ mmọ ete ẹka iso ẹnam n̄kpọ Jehovah. Ke Joshua ye mbon eyo esie ẹma ẹkekpan̄a, nditọ Israel ẹma ẹkpọn̄ Jehovah ẹkekpono ndem. Mmọ ẹkenam ntem ofụri isua 300, isọn̄ọke inịm mbet Jehovah. Ini emi ke Jehovah akayak mme asua mmọ, utọ nte mme Philistine, ẹfịk mmọ. Edi ke ini nditọ Israel ẹkesemede ẹnọ Jehovah ẹte anyan̄a mmimọ, Jehovah ama emek ebiereikpe 12 ẹnyan̄a mmọ.
Ewet nte n̄kpọ eketiede ke eyo mme ebiereikpe ke n̄wed Judges. Othniel ekedi akpa ebiereikpe, Samson edi akpatre, enye okonyụn̄ okop odudu akan kpukpru owo ke isọn̄. Ata akpan n̄kpọ oro ọwọrọde ada ke aduai-owo-idem mbụk oro odude ke n̄wed Judges edi emi: Ndikop item Jehovah asan̄a ye edidiọn̄, edi ndisọn̄ ibuot asan̄a ye nsobo.
—Ẹda ẹto Joshua; Judges; Leviticus 18:24, 25.