IKPEHE 4
Abasi Anam Ediomi ye Abraham
Abraham ọbuọt idem ye Abasi onyụn̄ okop uyo esie, ntre Jehovah ọn̄wọn̄ọ ke iyọdiọn̄ enye inyụn̄ inam ubon esie ọtọt
N̄KPỌ nte isua 350 ẹma ẹbe tọn̄ọ nte Ukwọ eyo Noah okokụre. Abraham okodụn̄ ke Ur emi ekedide obio uforo, oro ẹkotde Iraq mfịn. Enye ama enen̄ede enyene mbuọtidem. Edi ẹma ẹdomo mbuọtidem esie.
Jehovah ama ọdọhọ Abraham ọkpọn̄ obio emana esie okodụn̄ ke esenidụt—ke Canaan. Abraham ama adaha wap, ikonyụn̄ ifan̄ake. Sarah n̄wan esie, Lot eyen eyeneka esie, ye ediwak nditọufọk esie ẹma ẹtiene enye ẹsan̄a ata anyan isan̄ emi ẹkesịm Canaan ẹnyụn̄ ẹdụn̄ do ke ataya. Jehovah ama anam ediomi ye Abraham onyụn̄ ọn̄wọn̄ọ ke imọ iyanam enye akabade edi akamba idụt, ndien ke ofụri ererimbot ẹyekụt mfọn ẹto enye, n̄ko ke imọ iyanam nditọ esie ẹda obio Canaan ẹnyene.
Abraham ye Lot ẹma ẹforo etieti, ẹnyene ata ediwak otuerọn̄ ye enan̄. Abraham ama ayak Lot emek ebiet oro enye edimade ndidụn̄. Lot ekemek ediye isọn̄ ke n̄kan̄ Akpa Jordan onyụn̄ odụn̄ ekpere obio Sodom. Edi mbon Sodom ẹkedi ata mbukpo owo ẹnyụn̄ ẹnam ata ndiọi n̄kpọ ẹdian Jehovah.
Ekem, Jehovah Abasi ama ọdọhọ Abraham ke nditọ esie ẹyewak nte ntantaọfiọn̄ ke enyọn̄. Abraham ama enịm un̄wọn̄ọ oro ke akpanikọ. Edi, Sarah edima n̄wan Abraham ekedi ada. Ke ini Abraham ekesịmde isua 99 ndien Sarah ekpere isua 90, Abasi ama ọdọhọ Abraham ke enye ye Sarah ẹyenyene eyen. Sarah ama aman Isaac nte Abasi ọkọn̄wọn̄ọde. Abraham ama onyụn̄ enyene nditọ en̄wen, edi Andifak oro ẹken̄wọn̄ọde ke Eden edito ubon Isaac.
Ofụri emi, Lot ye ubon esie ẹkesụk ẹdụn̄ ke Sodom, edi edinen owo oro iketieneke mbon obio oro inam oburobụt ido. Ke ini Jehovah okoyomde ndisobo obio oro, enye ama ọdọn̄ mme angel ẹkedọhọ Lot ke imọ imọn̄ isobo obio oro. Mme angel oro ẹma ẹkpak Lot ye ubon esie ẹte ẹwọn̄ọ ke obio oro ẹkûnyụn̄ ẹse edem. Ekem, Abasi ama anam brimstone ye ikan̄ ẹdep ke Sodom ye idiọk obio Gomorrah oro okodude ekpere, onyụn̄ osobo kpukpru owo ke esịt. Lot ye nditọiban esie mbiba ẹma ẹbọhọ. Edi n̄wan Lot ama ese edem, etie nte enye ekekere aban̄a mme n̄kpọ oro enye ọkọwọrọde ọkpọn̄ ke obio oro. Enye ama akpa ke ntak nsọn̄ibuot emi.
—Ẹda ẹto Genesis 11:10–19:38.