Mbemiso Ikọ

M̀mọ̀n̄ ke N̄keme Ndibọ Nti Item?

Eke Iban

Kpukpru ini, osụk ekere aban̄a ediye akparawa oro edide ufọkn̄wed mbufo obufa. Afo ke ekere ete, ‘Nso idiọk ke ami ndikere mban̄a enye; eyen mbon ikam idiọn̄ọke ke utọ owo nte ami mmọdo.’ Idem n̄kpọ, idịghe afo ikpọn̄ ama enye. Idụhe eyenan̄wan emi mîmaha akparawa emi. Etịn̄ emi sia emesikop nditọ iban eken ẹnemede nneme ẹban̄a enye kpukpru ini.

Etise, enyịn esie edidụk ye okwo. Ukpen̄ke-kpen̄ idem, enye atuak inua imam ediye ediye. Imam onyụn̄ ọbọhọ fi ekpri. Enye asan̄a edi ndineme nneme ye afo.

Enye ọkọm fi nte n̄kpọ eke bụt anamde enye, ete, “Mmọkọm-o!”

Afo ọbọrọ enye ete, “Mmọkọm nde-o!”

Enye ete fi, “Ami n̄kere Eyamba.”

Uyo ọbọhọ fi inikiet inikiet, “Ndi edi mi obufa?”

Enye ete, “Ibịghike ikọwọrọ idi mi.”

Unịmke ke Eyamba ekpetịn̄ ikọ ye afo!

Eyamba ọdọhọ fi ete, “Mmọn̄ nnam ekpri usọrọ ke ufọk nnyịn n̄wed ama asuana mfịn. N̄kọ eyedi?”

Ekem, enye otop fi ke enyịn anam nte iyom ndisịn fi etap ke utọn̄ onyụn̄ ọdọhọ ete, “Yak nsian fi, ete ye eka mi ididụhe ke ufọk ini oro, ndien se ẹn̄wọn̄de oyodu barasuene. Ọdọhọ didie, n̄kọ eyedi?”

Eyamba ke ebet ọnọ imọ ibọrọ. Idụhe eyenan̄wan emi mîkpọsọpke-sọp inyịme ke iyaka!

Afo edibọrọ enye nso?

Eke Irenowo

Nditọ ufọkn̄wed mbufo iba ke ẹsan̄a ẹdi. Nsia eyemede fi sia mmọ ẹdodomo ndinam fi ọn̄wọn̄ sika ikaba kan̄a urua emi. Ọyọhọ ikata oyom ndidi emi.

Akpa owo ọdọhọ fi ete: “Afo asan̄a ikpọn̄ ebọk emi. Yak n̄wụt fi ufan kiet.” Enye otop fi ke enyịn ke ini ọdọhọde “ufan” kiet, onyụn̄ osio n̄kpọ ke ekpat ọfọn̄idem esie anyan ọnọ fi.

Omokụt ke n̄kpọ emi enye osiode ke ekpat ebiet sika. Emenen̄ede ọfiọk se n̄kpọ emi edide, ndien nsia etetịm eyemede fi.

Afo ọdọhọ mmọ ete, “Mmọdọdọhọ mbufo ke nsin̄wọn̄ke . . .”

Owo enye eken esịbe odụk onyụn̄ ọdọhọ ete: “Mmọn̄ọ, ndi idịghe ido ukpono mbufo edi ntak? Owo iyakke okop inem uwem ndomo esisịt!”

Akpa owo ọnọ fi inua ete, “Okûdi edi mbe-o?”

Afo ọbọrọ uko uko ete, “Ndịghe mbe!”

Ekem, ọyọhọ owo iba odori fi ubọk ke afara onyụn̄ etịn̄ sụn̄sụn̄ ete: “Da, bọ fịp.”

Akpa owo anyan afia n̄kpọ ọnọ fi onyụn̄ etịn̄ sụn̄sụn̄ ete: “Nnyịn iditịn̄ke inọ owo, owo ndomokiet idinyụn̄ ifiọkke tutu amama.”

Nso ke edinam?

SE ITỊN̄DE emi esitịbe kpukpru usen ke ekperede ndidi kpukpru ebiet ke ererimbot. Edi se idude edi ke ndusụk uyen ẹsifiọk se ẹkpenamde ke mme utọ idaha emi ẹkan mme uyen eken. Ke ini ẹdọhọde eyeneren etiene ọn̄wọn̄ sika, enye ekeme ndikere: ‘Nyomke ndin̄wọn̄ sika, edi nyomke ẹsisak mi. Ntak emi mmen̄kemeke ndiwụt nditọ ufọkn̄wed nnyịn ke inyeneke se inamde mi?’ Mîdịghe, eyenan̄wan emi erenowo ọdọhọde edi iwọrọ an̄wa ekeme ndikere: ‘Akparawa emi ọfiọk ndikama idem-o! Nsinam mmenyịmeke—ọkpọkọm inikiet emi kpọt?’

Ẹnọ ediwak uyen ukpep man ẹsọn̄ọ ẹda ẹwụt ke se mmimọ inịmde ke akpanikọ enen. Okposụkedi ekemede nditie esen esen, ukpep oro ẹnọde mmọ esinam mmọ iyakke ẹnyịk mmọ ẹnam se idiọkde. Ndi akpama ndidi utọ uyen oro? Se idude edi ke emekeme ndidi! Edisan̄a didie edi?

Bible ekeme ndin̄wam fi anam n̄kpọ uko uko ke ini osobode mfịna. Sia enye edide Ikọ Abasi oro ẹkedade odudu spirit ẹwet, enye ọdọn̄ọ ata nti item. (2 Timothy 3:16, 17) Mme mfịna ewe ke Bible ekeme ndin̄wam fi ese aban̄a? Se mme n̄kpọ oro ẹwetde ke idak emi nyụn̄ sịn idiọn̄ọ emi ✔ kpere enye oro enen̄erede ebehe fi.

□ Nte akpanamde n̄kpọ ye owo isio uduot

□ Se akpanamde man ama nte idem fo etiede

□ Nte akpasan̄ade enyene mme ufan

□ Nte ekpesede aban̄a mme mfịna ke ufọkn̄wed

□ Nte akpabiatde okụk fo ke eti usụn̄

□ Nte akpanamde n̄kpọ ye ete ye eka fo

□ Nte ekpesede aban̄a nte etiede fi ke idem

□ Mme edinam ini nduọkodudu oro ekpemekde

□ Nte akpanamde n̄kọri eke spirit

Nte edikụtde ke page 4 ye 5, ẹneme mme n̄kpọ oro ẹsiakde mi ke ikpehe usụkkiet oro ẹdude ke n̄wed emi. Mme n̄kpọ ewe ke ekesịn idiọn̄ọ? Emekeme ndibem iso n̄kot mme ikpehe oro kan̄a. Item Bible ẹkeme ndin̄wam fi ese aban̄a n̄kpọ emi kiet kiet. N̄wed emi osụk okotde mi oyowụt fi nte akpanamde emi.a

N̄wed emi ọyọnọ fi ifet etịn̄ ekikere fo. Ke uwụtn̄kpọ, ke ekperede ndisịm utịt ibuot kiet kiet, oyokụt ekebe oro ẹkotde “Se Ndinamde.” Do, ẹyedọhọ fi ewet nte aduakde ndida se okotde nsịn ke edinam. Mme page oro utomufọk ẹdude—utọ nte enye oro ẹkotde “Se Ndinamde ke Ini Mme Uke Mi Ẹyomde Ntiene Nnam Se Mîfọnke” ke page 132 ye 133—ẹyen̄wam fi enen̄ede ekere aban̄a mme mfịna oro esisobode ye se akpanamde aban̄a mmọ. Ke adianade do, ikpehe kiet kiet ke n̄wed emi etre ye page emi ẹkotde “Se N̄wetde Nnịm.” Ẹnịm page emi man afo ewet nte se okotde ke ikpehe oro ebehede fi. Oyokụt nsio nsio page usụkkiet ke n̄wed emi, oro ẹkotde “Owo Emi Ekpekpebede.” Mmọ ẹtịn̄ ẹban̄a nsio nsio owo ke Bible emi odotde ekpebe.

Bible eteme fi ete: “Nyene ọniọn̄, nyụn̄ nyene asian.” (Mme N̄ke 4:5) Ikọ oro “ọniọn̄” ye “asian” ẹnyene se ẹwọrọde ẹkan sụk ndifiọk eti ye idiọk. Oyom afo ọfiọk ntak emi mme owo ẹsinamde se mmọ ẹnamde. Ke uwụtn̄kpọ, ndifiọk idiọk utịp oro idiọk edinam edidade edi ọkọrọ ye nti utịp oro afo edibọde ke ndinam se inende ayan̄wam fi ọsọn̄ọ ada uko uko esịn nditiene mme uke fo nnam se mîfọnke.

Fiọk ete: Okposụkedi emi ekemede nditie ndusụk ini nte ke mfịna ọmọn̄ emen fi emen, idịghe afo ikpọn̄ osobo utọ mfịna oro. Mbon en̄wen ẹma ẹsobo utọ mfịna oro ẹnyụn̄ ẹse ẹban̄a enye uforo uforo. Afo n̄ko emekeme ndise mban̄a mfịna fo! Da n̄wed Mme Mbụme Oro N̄kparawa Owo Ẹbụpde—Mme Ibọrọ Oro Ẹnyenede Ufọn, Eboho 2 nam n̄kpọ nte ọfọnde. Enye ayanam fi enen̄ede enịm ke Bible ọnọ mfọnn̄kan item oro owo ekemede ndibọ ke ebiet ekededi!

[Ikọ Idakisọn̄]