Man Ufan Ebịghi, Ana Afo Edi Ufan

Itie ufan ọkọn̄ọ ke ima. Adan̄a nte afo ekpepde n̄kpọ aban̄a Jehovah, ntre ke ima emi afo enyenede ọnọ enye ọkọri. Nte ima emi afo enyenede ọnọ Abasi ọkọride, ntre ke udọn̄ fo ndinam n̄kpọ esie ọkọri n̄ko. Emi oyonụk fi ndikabade ndi mbet Jesus Christ. (Matthew 28:19) Ebede ke ndidiana ye inem inem ubon eke Mme Ntiense Jehovah, afo emekeme ndinyene itie ufan ye Abasi ke nsinsi. Nso ke ana afo anam?

Ana afo owụt ima oro amade Abasi ebe ke ndinịm mme ibet esie. “Koro ndima Abasi edi emi, ete, nnyịn inịm mbet Esie; ndien mbet Esie ibiakke owo idem.”—1 John 5:3.

Da se afo ekpepde sịn ke edinam. Jesus ama ọnọ mbụk oro akanamde emi an̄wan̄a. Enyene-ibuot owo ọkọbọp ufọk esie ke enyọn̄ akamba itiat. Ndisịme owo ọkọbọp ufọk esie ke enyọn̄ utan. Ke ini oyobio akabarade, ufọk oro ẹkebọpde ke enyọn̄ akamba itiat ikọduọhọ, edi ufọk oro ẹkebọpde ke enyọn̄ utan ama ọduọ, n̄wụre esie onyụn̄ okpon. Jesus ama ọdọhọ ete ke mbon oro ẹkopde ikọ imọ ẹnyụn̄ ẹnamde mmọ ẹbiet enyene-ibuot owo oro ọkọbọpde ufọk ke enyọn̄ akamba itiat. Edi mbon oro ẹkopde ikọ imọ mînyụn̄ inamke mmọ ẹbiet ndisịme owo emi ọkọbọpde ufọk ke enyọn̄ utan. Afo oyom ndibiet ewe?—Matthew 7:24-27.

Uyakidem nnọ. Emi ọwọrọ afo ndika mbịne Jehovah ke akam nnyụn̄ nsian enye nte ke imọ iyom ndinam uduak esie ke nsinsi. Ndinam uduak Abasi owụt nte ke afo edi mbet Jesus Christ.—Matthew 11:29.

Baptism. “Daha ke enyọn̄, kana baptism, nyụn̄ yet mme idiọkn̄kpọ fo fep ke ediseme n̄kot enyịn̄ Esie.”—Utom 22:16.

Buana ọyọhọ ọyọhọ ke ndinam n̄kpọ Abasi. “Se ededi eke mbufo ẹnamde, ẹnam ke ofụri esịt, nte n̄kpọ eke ẹnamde ẹnọ Ọbọn̄, mînamke inọ owo.”—Colossae 3:23.