Ntọt Otode Eset

Jehovah idiyakke ndiọi owo ẹbiat Paradise. Mme ufan esie kpọt ẹdidụn̄ do. Nso iditịbe inọ ndiọi owo? Man ọdiọn̄ọ ibọrọ, kere ban̄a mbụk akpanikọ Noah. Noah okodu uwem ke ediwak tọsịn isua oro ẹkebede. Enye ekedi eti owo emi okodomode kpukpru ini ndinam uduak Jehovah. Edi mme owo eken ke isọn̄ ẹkenam ndiọi n̄kpọ. Ntre Jehovah ama asian Noah ete ke Imọ imọn̄ ida ukwọ isobo kpukpru ndiọi owo oro. Enye ama ọdọhọ Noah ọkọn̄ ubom mbak enye ye ubon esie ẹdikpan̄a ke ini Ukwọ oro edidide.—Genesis 6:9-18.

Noah ye ubon esie ẹma ẹkọn̄ ubom oro. Noah ama odụri mme owo utọn̄ ete ke Ukwọ ke edi, edi mmọ ikakpan̄ke utọn̄. Mmọ ẹma ẹka iso ndinam ndiọi n̄kpọ. Ke ẹma ẹkekọn̄ ubom ẹma, Noah ama atan̄ mme unam ọdọn̄ ke ubom oro, ndien enye ye ubon esie ẹma ẹdụk n̄ko. Ekem Jehovah ama anam ọkpọsọn̄ edịm edep. Edịm ama edep uwemeyo 40 ye okoneyo 40. Ukwọ ama ofụk ofụri isọn̄.—Genesis 7:7-12.

Ndiọi owo oro ẹma ẹtaba uwem mmọ, edi ẹma ẹnyan̄a Noah ye ubon esie. Jehovah ama ada mmọ ifụre ifụre ebe Ukwọ oro odụk isọn̄ oro ẹkenamde asana ọbọhọ idiọkido. (Genesis 7:22, 23) Bible ọdọhọ ete ke ini kiet efen ke edi emi Jehovah edifiakde osobo mbon oro ẹsịnde ndinam se ifọnde. Enye idisoboke nti owo. Mmọ ẹyedụn̄ ke nsinsi ke Paradise ke isọn̄.—2 Peter 2:5, 6, 9.

Mfịn ediwak owo ẹnam ndiọi n̄kpọ. Ererimbot ọyọhọ ye afanikọn̄. Jehovah ọdọn̄ Mme Ntiense esie ndien ndien ndidụri mme owo utọn̄, edi ata ediwak owo imaha ndikpan̄ utọn̄ nnọ ikọ Jehovah. Mmọ imaha ndikpụhọde usụn̄ mmọ. Mmọ iyomke ndinyịme se Abasi etịn̄de aban̄a se inende ye se ikwan̄ade. Nso iditịbe inọ mme owo ẹmi? Nte mmọ ẹyekpụhọde ke ini iso? Ediwak owo idikpụhọkede tutu amama. Ini ke edi emi ẹdisobode ndiọi owo ẹfep ndien mmọ ididụhe uwem aba tutu amama.—Psalm 92:7.

Owo idisoboke isọn̄; ẹyenam enye edi paradise. Mbon oro ẹkabarede ẹdi mme ufan Abasi ẹdidụn̄ ke nsinsi ke Paradise ke isọn̄.—Psalm 37:29.