Mme Ufan Abasi Ẹdidụn̄ ke Paradise

Paradise iditiehe nte ererimbot emi nnyịn idụn̄de idahaemi. Akananam Abasi ikoyomke isọn̄ ọyọhọ ye mfịna ye mfụhọ, ubiak ye ndutụhọ. Ke ini iso, Abasi ayanam isọn̄ edi paradise. Paradise editie didie? Ẹyak nnyịn ise se Bible etịn̄de:

Nti owo. Paradise edidi ebietidụn̄ mme ufan Abasi. Mmọ ẹyenam nti n̄kpọ ẹnọ kiet eken. Mmọ ẹdidụn̄ nte ekemde ye ndinen usụn̄ Abasi.—Mme N̄ke 2:21.

Uwak Udia. Ke Paradise, biọn̄ ididụhe. Bible ọdọhọ ete: “Uwak ibokpot [m̀mê, udia] ẹyedu ke isọn̄.”—Psalm 72:16.

Nti ufọk ye inem inem utom. Ke Paradise isọn̄, kpukpru ubon ẹyenyene ufọk idemmọ. Kpukpru owo ẹdinam utom oro adade ata inemesịt edi.—Isaiah 65:21-23.

Emem ofụri ererimbot. Mme owo idin̄wanake idinyụn̄ ikpaha aba ke ekọn̄. Ikọ Abasi ọdọhọ ete: “[Abasi] anam ekọn̄ etre.”—Psalm 46:8, 9.

Nsọn̄idem. Bible ọn̄wọn̄ọ ete: “Andidụn̄ [ke Paradise] ididọhọke ite, Ndọdọn̄ọ.” (Isaiah 33:24) N̄ko, owo ndomokiet ididịghe mbụn̄ọ m̀mê nnan, m̀mê inan m̀mê imụm.—Isaiah 35:5, 6.

Utịt ubiak, mfụhọ, ye n̄kpa. Ikọ Abasi ọdọhọ ete: “N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:4.

Mme idiọk owo ẹyebe ẹfep. Jehovah ọn̄wọn̄ọ ete: “Ẹyesobo mme idiọk owo ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.”—Mme N̄ke 2:22.

Mme owo ẹyema ẹnyụn̄ ẹkpono kiet eken. Ukwan̄ikpe, ufịk, idiọkitọn̄, ye usua ididụhe aba. Mme owo ẹyediana kiet ẹnyụn̄ ẹdụn̄ nte ekemde ye ndinen usụn̄ Abasi.—Isaiah 26:9.