Ibuot 84

Mbiomo Edidi Mbet

KE ỌKPỌN̄DE ufọk ọwọrọiso owo Pharisee, emi nte an̄wan̄ade, edide kiet ke otu mbon Sanhedrin, Jesus akaiso anam isan̄ aka Jerusalem. Akwa otuowo ẹtiene enye. Edi nso idi uduak esịt mmọ? Nso inen̄ede ibuana ke owo ndidi ata anditiene enye?

Nte mmọ ẹsan̄ade ẹka, Jesus ọwọn̄ọde enyịn ese otuowo ndien eyedi anam idem akpa mmọ ke ini enye ọdọhọde ete: “Edieke owo etienede Mi, ndien mîsuaha ete esie, ye eka esie, ye n̄wan esie, ye nditọ esie, ye nditọeka esie iren, ye nditọeka esie iban, ­ye uwem [“ukpọn̄,” NW ] esie n̄ko, enye ikemeke ndidi owo mbet Mi.”

Nso ke ikọ Jesus ọwọrọ? Ikọ Jesus mi iwọrọke ite ke mme anditiene enye akpana ẹsua mme iman mmọ ata edisasua. Utu ke oro, ana mbet esie ẹsua mmọ ke ekikere nte ke ima oro mme mbet ẹmi ẹnyenede ẹnọ enye okpon akan enyeoro ẹnyenede ẹnọ mmọ. Ẹdọhọ ke Jacob, eteete Jesus ‘ama asua’ Leah onyụn̄ ama Rachel, emi ọwọrọde nte ke enye ama ama Rachel akan Leah, eyeneka esie.

Kere, n̄ko, ete ke Jesus ama ọdọhọ ete ke mbet ẹkpenyene ndisua “ukpọn̄ esie,” m̀mê uwem esie. Mi n̄ko se ikọ Jesus ọwọrọde edi nte ke ana mbet akpanikọ ama Imọ akan idem nte enye amade uwem esiemmọ. Jesus ke ntem ọsọn̄ọ etịn̄ ete ke owo ndidi mbet imọ edi akamba mbiomo. Idịghe n̄kpọ emi ẹkpenamde ye unana editịm n̄kere.

Nsọn̄ọn̄kpọ ye ukọbọ ẹbuana ke owo ndidi mbet Jesus, nte enye akade iso ndisio n̄wụt: “Owo ekededi eke mînyụn̄ ibiomke [“eto ndutụhọ,” NW ] esie itiene Mi ke edem ikemeke ndidi owo mbet Mi.” Ntem, ana mbet akpanikọ onyịme ndiyọ ukem esuene oro Jesus ọkọyọde, idem abuanade, edieke edide se ẹyomde, ndikpa ke ubọk mme asua Abasi, emi Jesus edikpade ke mî­bịghike.

Ndidi mbet Christ, ke ntre, edi n̄kpọ oro anade nte otuowo ẹtienede enye ẹdụn̄ọde mfọn mfọn. Jesus ọsọn̄ọ etịn̄ akpanikọ emi ke enye nditop n̄ke. Enye ọdọhọ ete: “Koro anie owo ke otu mbufo, emi oyomde ndikọn̄ tọwa, idibemke iso itie ibat se iditakde enye, man enye ọfiọk m̀mê imenyene okụk nte edikemde ndida nnam utom mma? Mbak ndusụk utom edikak enye ke ini enye ama ọkọtọn̄ọ ndibọp, ndien kpukpru mmọemi ẹkụtde ẹtọn̄ọ ndisak enye, ẹte, Owo emi ọkọtọn̄ọ ndikọn̄ ufọk, edi ikemeke ndinam mma.”

Ntre Jesus anam an̄wan̄a otuowo ẹmi ẹtienede enye nte ke mbemiso mmọ ẹkabarede ẹdi mbet imọ, mmọ ẹkpenyene nditịm mbiere nte ke mmimọ imekeme ndiyọhọ se ibuanade, kpa nte owo oro oyomde ndibọp tọwa esikụtde ete mbemiso imọ itọn̄ọde tọwa oro imọ imenyene okụk oro ididade ibọp enye ikụre. Ke otopde n̄ke efen, Jesus akaiso ete:

“N̄ko, anie edidem, emi ọwọrọde aka ekọn̄ ye edidem en̄wen, idibemke iso itie ikere m̀mê enye eyekeme ndida tọsịn owo duop n̄n̄wana ekọn̄ ye enyeemi asan̄ade ye tọsịn owo edịp edi edin̄wana ye enye? Ndien edieke enye mîkemeke, ke ini enye eken osụk odude kan̄a anyan ebiet, enye ọdọn̄ mme isụn̄utom, ete ẹbụp se idinamde man emem odu.”

Jesus ndien osịo akpan n̄kpọ oro esịnede ke n̄ke esie owụt, ọdọhọde ete: “Kpa ntre ke owo mbufo ekededi, eke mîsanake kpukpru se enye enyenede iyak, ikemeke ndidi mbet Mi.” Oro edi se otuowo oro ẹtienede enye, ye, ih, kpukpru mmọ en̄wen oro ẹkpepde n̄kpọ ẹban̄a Christ, ẹkpenyịmede ndinam. Ana mmọ ẹdu ke mben̄eidem ndiyak kpukpru se mmọ ẹnyenede atak​—⁠kpukpru inyene mmọ, esịnede uwem ke idemesie​—⁠edieke mmọ ẹyomde ndidi mbet esie. Nte afo omonyịme ndinam emi?

Jesus akaiso ete, “Ke akpanikọ inụn̄ ọfọn.” Ke Ukwọrọikọ esie oro ke Obot, enye ọkọdọhọ ete ke mme mbet imọ ẹdi “inụn̄ isọn̄,” ọwọrọde nte ke mmọ ẹnyene odudu oro ẹkpemede-kpeme mme n̄kpọ ke idem mme owo, kpa nte ata inụn̄ edide se ikpemede-kpeme n̄kpọ. Jesus eberi ete, “Edi inụn̄ ama akabade adaba, ẹdida nso ẹnam enye enem? Inamke ufọn ke isọn̄, inyụn̄ inamke ke ifụm: ẹtop enye ẹduọk. Owo eke enyenede utọn̄ ndikop, yak okop.”

Ntre Jesus owụt nte ke idem mmọ oro ẹkabarede ẹdi mbet imọ ke ndusụk ini ikpanaha ẹkop mmemidem ke ubiere mmọ ndikaiso. Edieke mmọ ẹmemde idem, mmọ idiwọrọke usiene, kpa se ererimbot emi adade onịm n̄kpọ nsahi ye se mîdotke ke iso Abasi, ke akpanikọ, ẹdade esuene ẹsọk Abasi. Ntem, ukem nte inụn̄ emi adabade, onyụn̄ abiarade, ẹyetop mmọ ẹduọk ke an̄wa, ih, ẹsobo ẹfep. Luke 14:​25-35; Genesis 29:​30-33; Matthew 5:⁠13.

▪ Owo ‘ndisua’ mme iman esie ye idemesie ọwọrọ nso?

▪ Ewe n̄ke iba ke Jesus otop, ndien mmọ ẹwọrọ nso?

▪ Nso idi akpan n̄kpọ ke akpatre ikọ Jesus oro aban̄ade inụn̄?