Ibuot 26

Ọnyọn̄ Edi ke Capernaum

ETISỊM idahaemi etop Jesus amasuana osịm anyan ebiet, ndien ediwak owo ẹnam isan̄ ẹka mme nsannsan ebiet oro enye odude. Nte ededi, ke usen ifan̄ ẹma ẹkebe, enye afiak ọnyọn̄ edi Capernaum emi ekperede Inyan̄ Galilee. Etop asuana usọp usọp ke ofụri obio oro nte ke enye ọmọnyọn̄ edi, ndien ediwak owo ẹdi ke ufọk oro enye odude. Mme Pharisee ye mme ekpep Ibet ẹto ke anyan ebiet nte Jerusalem ẹdi.

Otuowo ẹwak etieti tutu mmọ ẹfaha ke enyịnusụn̄, ndien ufan̄ idụhe inọ owo ekededi ndibe ndụk esịt ufọk. Ini ekem nditọn̄ọ akpan n̄wọrọnda edinam. Se itịbede ke edinam emi edi ata akpan n̄kpọ, koro enye an̄wam nnyịn ndifiọk nte ke Jesus enyene odudu ndisio se ikamade ntak ufen ubonowo mfep nnyụn̄ mfiak nnọ kpukpru mbon oro enye emekde nsọn̄idem.

Ke adan̄aemi Jesus ekpepde otuowo n̄kpọ, irenowo inan̄ ẹmen ọdọn̄ọ akpauben̄ ke n̄kpana ẹdi ufọk oro. Mmọ ẹyom Jesus ọkọk ufan mmọ udọn̄ọ, edi ke ntak otuowo, mmọ ikemeke ndidụk esịtufọk. Nso edikpu ke emi edi ntem! Edi mmọ ikpaha mba. Mmọ ẹdọk mbat mbat ọkọm, ẹnyụn̄ ẹtịbe odudu ke enye, ẹnyụn̄ ẹsụhọde n̄kpana oro ọdọn̄ọ akpauben̄ oro anade ke esịt ke nnennen ebiet oro ekperede Jesus.

Nte Jesus ayat esịt ke ntak editịmede enye? Baba! Utu ke oro, mbuọtidem mmọ otụk enye esịt ntotụn̄ọ ntotụn̄ọ. Enye ọdọhọ ọdọn̄ọ akpauben̄ oro ete: “Ẹmefen mme idiọkn̄kpọ fo.” Edi nte Jesus ke akpanikọ ekeme ndifen idiọkn̄kpọ? Mme scribe ye mme Pharisee ikereke ntre. Mmọ ẹkere ke esịt mmọ ẹte: “Nsinam owo emi etịn̄de ikọ ke usụn̄ emi? Enye ke osụn̄i Abasi: anie ekeme ndifen mme idiọkn̄kpọ ke mîbọhọke kiet, kpa Abasi?”

Ke ọfiọkde ekikere mmọ, Jesus ọdọhọ mmọ ete: “Nsinam mbufo ẹnenide n̄kpọ ẹmi ke esịt mbufo? Ewe emem akan, m̀mê ndidọhọ ọdọn̄ọ akpauben̄ ete, “Ẹmefen mme idiọkn̄kpọ fo; m̀mê ndidọhọ enye ete, Daha ke enyọn̄, men mbịri fo, nyọn̄?”

Ekem, Jesus ọkpọn̄ otuowo, esịnede mme andisụk enye uyo, man ẹkụk n̄wọrọnda edinam oro ediyarade odudu oro enye enyenede ndifen mme idiọkn̄kpọ ke isọn̄ nnyụn̄ n̄n̄wụt ke akpanikọ nte ke enye edi akakan owo oro akanam odude uwem. Enye ọwọn̄ọde ese ọdọn̄ọ akpauben̄ oro onyụn̄ ọdọhọ ete: “Daha ke enyọn̄, men mbịri fo, nyọn̄ ufọk” Ndondo oro enye adaha ke enyọn̄, asan̄ade ọwọrọ an̄wa ke iso kpukpru mmọ ye n̄kpana esie! Ke n̄kpaidem mme owo oro ẹnọ Abasi ubọn̄ ẹnyụn̄ ẹfiori ẹte: “Akananam nnyịn ikwe orụk n̄kpọ emi”!

Nte afo omokụt ete ke Jesus etịn̄ aban̄a mme idiọkn̄kpọ nte ẹnyenede ebuana ye udọn̄ọ ye nte ke edifen mme idiọkn̄kpọ enyene n̄kpọ ndinam ke owo ndikop nsọn̄idem ke ikpọkidem? Bible anam an̄wan̄a ete ke akpa ete nnyin, Adam, ama anam idiọkn̄kpọ ndien nte ke kpukpru nnyịn ikada mme utịp idiọkn̄kpọ oro imana, oro edi, udọn̄ọ ye n̄kpa. Edi ke idak ukara Obio Ubọn̄ Abasi, Jesus eyefen mme idiọkn̄kpọ kpukpru mbon oro ẹmade Abasi ẹnyụn̄ ẹnamde n̄kpọ Esie, ndien adan̄aoro ẹyesio kpukpru udọn̄ọ ẹfep. Oro edifọn didie ntem! Mark 2:​1-12; Luke 5:​17-26; Matthew 9:​1-8; Rome 5:​12, 17-19.

▪ Nso ikedi ntọn̄ọ kaban̄a akpan n̄wọrọnda edinam?

▪ Didie ke ọdọn̄ọ akpauben̄ oro okosịm Jesus idem?

▪ Ntak emi kpukpru nnyịn inamde idiọkn̄kpọ, edi didie ke Jesus ọkọnọ idotenyịn nte ke edifen mme idiọkn̄kpọ nnyịn ye edifiak nnọ mfọnmma nsọn̄idem eyeda itie?