Ibuot 13
Ndikpep N̄kpọ Nto Mme Idomo Jesus
NDONDO oro enye anade baptism ama, spirit Abasi emen Jesus aka ke wilderness eke Judea. Enye enyene ekese n̄kpọ ndikere mban̄a koro ke baptism esie “enyọn̄ [ama] eberede,” man enye ekeme ndikụt mme n̄kpọ eke heaven. Ke akpanikọ, ekese n̄kpọ ẹdu ẹnọ enye nditie n̄kere!
Jesus abiat uwemeyo 40 ye okoneyo 40 ke wilderness inyụn̄ idiaha baba n̄kpọ kiet ke ofụri ini emi. Ekem, ke ini Jesus okopde biọn̄ etieti, Devil aka ndidomo enye, ọdọhọde ete: “Edieke Afo edide Eyen Abasi, wụk mme itiat ẹmi ẹkabade ẹdi uyo.” Edi Jesus ọfiọk ete ke inenke imọ ndida odudu unam utịben̄kpọ imọ nyụhọ mme udọn̄ idem imọ. Ntre enye inyịmeke ẹdomo imọ.
Edi Devil ision̄oke idem ikpọn̄. Enye odomo usụn̄ efen ese. Enye odọhọ Jesus osio idemesie ke ibibene temple ọduọk ke isọn̄ man mme angel Abasi ẹnyan̄a enye. Edi Jesus iyakke ẹdomo imọ ndinam utọ ndyọ ndyọ edinam oro. Ke okotde oto N̄wed Abasi, Jesus owụt ete ke inenke ndidomo Abasi ke usụn̄ emi.
Ke ọyọhọ idomo ita, Devil owụt Jesus kpukpru obio ubọn̄ ererimbot emi ke ndusụk utịbe utịbe usụn̄ onyụn̄ ọdọhọ ete: “Nyenọ Fi kpukpru n̄kpọ ẹmi, edieke ọduọde ke isọn̄ atuak ibuot ọnọ mi.” Edi Jesus afiak esịn ndiyak idem nnọ idomo edinam se ikwan̄ade, emekde ndikaiso nnam akpanikọ nnọ Abasi.
Nnyịn imekeme ndikpep n̄kpọ nto mme idomo Jesus ẹmi. Mmọ ẹwụt, ke uwụtn̄kpọ, nte ke Devil idịghe ikpîkpu odudu idiọkn̄kpọ, nte ndusụk owo ẹdọhọde, edi nte ke enye edi ata owo emi enyịn mîkwe. Idomo Jesus owụt n̄ko nte ke kpukpru ukara ererimbot ẹdi inyene Devil. Koro didie ke Devil ndimen mmọ nnọ Christ ekpekedi ata idomo edieke mmọ mîkenen̄ekede idi esie?
Ndien kere ban̄a emi: Devil ọkọdọhọ ke imọ imeben̄e idem ndinọ Jesus utịp ke edinam utuakibuot kiet nnọ imọ, idem inọde enye kpukpru obio ubọn̄ ererimbot emi. Devil ekeme n̄ko ndidomo nnyịn ke mbiet usụn̄ emi, isoọfọn onịmde nnyịn ndiye ifet ke iso ndibọ inyene ererimbot, odudu, m̀mê akwa itie. Edi ikpowụt eti ibuot didie ntem nditiene uwụtn̄kpọ Jesus ke ndikaiso nnam akpanikọ nnọ Abasi inamke n̄kpọ m̀mê idomo oro etie didie! Matthew 3:16; 4:1-11; Mark 1:12, 13; Luke 4:1-13.
▪ Nso idi mme n̄kpọ oro Jesus nte an̄wan̄ade ekerede aban̄a ke usen 40 ke wilderness?
▪ Didie ke Devil an̄wana ndidomo Jesus?
▪ Nso ke nnyịn ikeme ndikpep nto mme idomo Jesus?