IBUOTIKỌ IKPAEDEM
Ufọn Uwem Emi-e?
EKPENYENE nneme ye Diana,a oyokụt ke n̄kaiferi emi ọdiọn̄ọ n̄kpọ, etie mbre mbre, onyụn̄ etie ufan ufan. Edi Diana esifụhọ n̄kpa n̄kpa onyụn̄ ekere ke imọ iwọrọke n̄kpọ. Enye ekeme ndifụhọ ediwak usen, ediwak urua, ndusụk ini ediwak ọfiọn̄. Enye ọdọhọ ete, “Idụhe usen emi n̄kpa mîdọn̄ke mi. N̄kpa mi ọfọn akan uwem.”
“Ndụn̄ọde emi ẹnamde owụt ke ini owo kiet owotde idem, ke owo 200 en̄wen ẹsidomo ndiwot idem, owo 400 ẹkekere ndiwot idem.”—THE GAZETTE, MONTREAL, CANADA.
Diana ọdọhọ ke tutu amama imọ idiwotke idem. Kpa ye oro, ndusụk ini enye esidọhọ ke imọ idiọn̄ọke ntak emi imọ idude uwem. Enye ọdọhọ ete, “Esitie nte moto ọkpọtọtọ mi owot. N̄kpa inamke mi ndịk aba, akam ọdọdọn̄ mi.”
Etie ediwak owo ke idem nte etiede Diana. Ndusụk mmọ ẹkere ndiwot idem, ndusụk ẹdodomo ndiwot idem. Edi ntaifiọk ẹdọhọ ke ediwak mbon emi ẹdomode ndiwot idem isiyomke n̄kpa, mmọ ẹsiyom ufen mmọ etre. Mmọ ẹkere ke n̄kpa ọfọn akan uwem, ntre oyom ẹnam mmọ ẹfiọk ntak emi uwem ọfọnde akan n̄kpa.
Edi nso idi ufọn uwem emi? Imọn̄ itịn̄ ntak ita emi okpodude uwem.
a Ẹkpụhọ enyịn̄.