K’a latigɛ k’an yɛrɛkun di Jehova ma ani ka kɛ a ka denbayamɔgɔ dɔ ye, o ye an ka desizɔnw bɛɛ la kɔrɔtaninba lo ye. Jehova b’a fɛ an kelen kelen bɛɛ k’o lo kɛ. Mun na do? Sabu a b’a fɛ u ka teriya kɛ n’ale ye ani ka ɲɛnamaya kɛ fɔɔ abada (Deter. 30:19, 20; Gal. 6:7, 8). Nka, Jehova tɛ mɔgɔ si waajibiya a k’ale bato. A b’a to mɔgɔ kelen kelen bɛɛ k’a latigɛ a bena min kɛ. Nka ni kerecɛn batizenin dɔ ye jurumuba dɔ kɛ, diinan mɔgɔkɔrɔw ka ɲi ka mun lo kɛ do? N’a ma nimisa, u ka ɲi k’a bɔ kafo kɔnɔ (1 Kor. 5:13). O bɛɛ n’a ta, Jehova b’a fɛ sɔbɛ la o jurumukɛla ka kɔsegi ale ma. Kuun jɔnjɔn minw kama Jehova ye kunmabɔsara di, u la dɔ ye ko jurumukɛla min nimisanin lo, a ka jurumuw ka se ka yafa. Jehova ye Ala kanutigi ye minkɛ, a be jurumukɛlaw jija u ka nimisa.—Zak. 1:3; Ɔrɔm. 2:4; Zaki 4:8. w24.08 14 § 1-2

Tuma min na ciden Zan tun b’a ka bataki 3nan sɛbɛra, mɔgɔ dɔw tun be ngalon kalanw jɛnsɛnna ani ka na ni farali ye kafo kɔnɔ. Nga, dɔw tun be “taamana tiɲɛ sira kan.” U tun be mɛnni kɛ Jehova fɛ ani k’a ka “ciiw bato.” (2 Zan 4, 6). O kerecɛn kantigiw ye Zan ninsɔn diya, nga o dɔrɔn tɛ. U ye Jehova fana ninsɔn diya (Talenw 27:11). An be kalan juman lo sɔrɔ Zan ka kumaw na? N’an be kantigiya kɛ Jehova ye, o be an yɛrɛ ni mɔgɔ wɛrɛw ninsɔn diya (1 Zan 5:3). Misali la, an ninsɔn be diya sabu an b’a lɔn ko an be Jehova dusu diyara. A ninsɔn be diya kosɔbɛ n’a y’a ye ko an be banna kɛwale juguw la ani k’a ka cikanw labato. Mɛlɛkɛw fana ninsɔn be diya (Luka 15:10). An fana dusu be diya n’an y’a ye ko an balimaw be kantigiya kɛra (2 Tes. 1:4). Ni duniɲa juguman nin halakira tuma min na, an ninsɔn bena diya sabu an tora ka kantigiya kɛ Jehova ye k’an to Sutana ka duniɲa kɔnɔ. w24.11 12-13 § 17-18

I ɲɛbɔra mɔgɔ min fɛ i ka ɲi k’a tigi kɔrɔsi fɔɔ tuma juman ka sɔrɔ ka kuma a fɛ? N’i kumana a fɛ joona kojugu, a bena kɛ komi i ma miiri koɲuman ka sɔrɔ k’o kɛ (Talenw 29:20). N’i fana ye wagati caaman ta, a bena kɛ komi i be sigasigara kojugu, sanko n’a tigi bɔra a kala ma ko i ɲɛbɔnin b’a fɛ (Waaj. 11:4). A to i hakili la ko sanni i k’a fɔ dɔ ye ko i b’a fɛ ka teriya kɛ n’a ye furu kama, waajibi tɛ i ka la a la ko i bena a tigi furu. Nga, i ka ɲi ka la a la ko i labɛnnin lo furu kama ani ko o tigi be se ka kɛ furuɲɔgɔn ɲuman ye i fɛ. Nga, n’i y’a ye ko mɔgɔ dɔ ɲɛbɔnin b’i fɛ ani e t’a tigi fɛ do? O yira ka gwɛ i ka kɛwalew fɛ. A man ɲi i k’a to a tigi k’a miiri ko i bena sɔn ka teriya kɛ n’a ye furu kama k’a sɔrɔ o tɛ.—Efɛz. 4:25. w24.05 22-23 § 9-10