San u sa leli fu den sani di apostel Pawlesi be taigi den Tesalonikasama? Te u yee wan sani di nai kai anga den leli fu Beibel efuso u yee wan sani di sa meke u feele, u mu meke moiti fu du sani anga koni. A fositen, den feyanti fu u aini Soviyet Unie be paati wan biifi di be gei enke a den baala fu a edekantoo a be komoto. A biifi ya be gi sowan fu den baala anga sisa taanga-sikin fu komoto aini a olikanisâsi. A fasi fa a biifi ya be sikiifi be gei enke na a edekantoo a komoto tuu. Ma den á be poi koli den baala anga sisa di e dini Yehofa anga den hii ati. Den be fusutan taki den sani di sikiifi aini a biifi á be e kai anga den sani di den be leli. Aini a ten ya, sama di komoto na a tuu biibi e poti sani a internet son yuu fu koli taawan. Pe fu u meke sama koli u gawgaw anga den sani de, u mu meke ala moiti fu luku efu den sani di we yee efuso leisi e kai anga den sani di we leli.​—2 Tes. 2:2; 1 Yoh. 4:1. w24.07 12 ¶14-15

A moo pelensipali bosoloiti di wan sama sa teke, a fu a paamisi Yehofa taki aw libi enke fa a wani. Te a du a sani ya ai kon aini a gaan osufamii fu Yehofa. Aw dini en makandaa anga den baala anga sisa. Yehofa wani ala sama du a sani ya. Saide? A wani wi anga en toon mati. Boiti dati, a wani u libi fu teego (Deit. 30:19, 20; Gal. 6:7, 8). Yehofa nai dwengi sama fu dini en. Ala sama sa luku san den wani du. Ma san den owluman mu du efu wan Kelesten du wan gaan sondu? Efu aa wani tapu anga a sani di ai du, den o puu en aini a kemeente (1 Kor. 5:13). Winsi den baala puu wan sama aini a kemeente, Yehofa wani a sama tapu anga a sani di ai du, da a daai kon neen baka. Disi a wan fu den pelensipali sani fu saide Yehofa meke Yesesi kon dede gi u. A wani gi den sama ya paadon. Yehofa a wan Gadu di lobi sama tuutuu. Neen meke a wani den sama di du wan gaan sondu tapu anga a sani di den e du.​—Sak. 1:3; Rom. 2:4; Yak. 4:8. w24.08 14 ¶1-2

Aini du fu dii biifi di Yohanisi be sikiifi, a be taki sani á de di e gi en piisii enke te a yee taki den pikin fi en e du san den leli. A pisiten di a be e sikiifi a buku ya, son sama be e paati falisi leli aini a kemeente. A sani ya meke den á be e libi na a wan moo. Ma i be abi sama ‘di be e libi enke fa a tuu leli fu Gadu e taki’. Den be e aliki Yehofa, den be e ‘du sani enke fa a wowtu fu Gadu e taki’ (2 Yoh. 4, 6). A ná Yohanisi wawan den Kelesten ya be e meke piisii, ma den be e meke Yehofa piisii tu (Odo 27:11). San a sani ya e leli u? Te we tan dini Yehofa anga u hii ati, wo piisii, ma taawan o piisii tu (1 Yoh. 5:3). We piisii fu di u sabi taki we du sani di e meke Yehofa piisii. Ai piisii te we aliki en. Den engel a hemel seefi e poolo (Luk. 15:10). Useefi e piisii tu te we si fa den baala anga sisa fu we holidoo (2 Tes. 1:4). Te Yehofa o poli a goontapu fu Saatan ya, wo piisii fu di u sabi taki wa gwe fika en. w24.11 12 ¶17-18