Tus Qaathei Lapa Ne Xomi Meköt
AME ngöne la easa xötrethenge la tulu i Iesu, easë a thithi cememine la hni ka menyik koi Akötresie me hape: “Jiniati e hmitöte la atesiwa i enëtilai.” Ame la sipu aja së, tre, ene la troa mele thenge la thithi celë, nge troa mama ngöne la aqane mele së laka Itretre Anyipici Iehova së. Nyipici laka, ame la ka nyipi ewekë, ke, thaa ene hmekuje kö la troa atre laka ame la ëje i Akötresie, tre, Iehova. Loi e tro sa xome la nöjei ijine troa atrune la ëje i Nyidrë. Eje hi laka, ketre hnëqa ka sisitria la troa hë së ka hape, Itretre Anyipici Iehova.—Mat. 6:9; Is. 43:10.
Ka ihmeku la Salamo 110:3, memine la aja ka eje thene la nöje i Iehova troa xome la huliwa hnei Iehova hna upi angatr troa kuca. Pine nemen matre kola e thene la itre atr asë ka catre thele troa cainöj, la nöjei pengöne macatre me aqane mel? Ame la hnapan, tre, hnene laka, atraqatre la ihnim i angatr koi Akötresie memine la sipu aja ka eje thei angatr troa kuca la hnei Nyidrëti hna amekötine koi angatr. Kola upi së ngöne Deuteronomi 6:5, 6 troa hnimi Iehova hnene la ‘hni së ka pexej, me u së, me trenge catre së.’ Kola upi së hnene la ihnimi ka eje e kuhu hni së troa xome la traeme së, me trenge catre së, me itre mo së troa sajuëne la itre aja ne la Baselaia i Akötresie; hna e ngöne la itre aja cili, la huliwa ne cainöj hne së hna catre kuca thenge la hne së hna atrein.
Hnene la ihnimi Iehova kowe la itre atr matre Nyidrëti a kuca matre troa cainöjën la maca ka loi ne la Baselaia i Nyidrë e cailo fen. Thaa aja i Nyidrëti kö troa meci la itre atr, ngo aja i Nyidrëti tro asë hi angatr a ietra qa ngöne la itre thiina ka ngazo i angatr, me fedre kowe la Atre Xupi angatr, ene pe troa hetrenyi la mel. (2 Pet. 3:9) Öni Iehova ka hape: “Tha madine kö ni la meci ne la ate ka ngazo, ngo loi pe troa hmaca la ate ka ngazo qa ngöne la jë i angeic.” (Ezek. 33:11) Ame ngöne la easa xome la huliwa ne cainöj, kola mama hnyawa e cili la ihnimi Iehova kowe la itre atr. Thaa luelue kö së laka, celë hi ketre kepine lai matre easë a madrin, ngöne la easa xome la huliwa ka nyipi ewekë catr, ene la troa cainöje trootro.
Kola mama fe la sipu ihnimi së koi Iehova ngöne la aqane goeëne së la Wesi Ula i Nyidrë, ene la Tusi Hmitrötr. Maine paatre ju la Tusi Hmitrötr, thatreine kö së troa atre Akötresie me easenyi koi Nyidrë, tune la hna upi së troa kuca hnene la tusi Iakobo 4:8. Nge ketre thatreine jë kö tro sa atre la kepine matre easë e celë fen memine la ewekë ka troa traqa koi së elany. Ketre thaa tro kö sa hane atre ka hape, Adamu hi la xötrapane së asë nge qaane la itre jole ka traqa koi së. (Rom. 5:12) Nge ketre thatreine jë kö tro sa hane atre la etrune la ihnimi Akötresie, ngöne laka hnei Nyidrëti hna upe la Hupuna i Nyidrëti ka caas matre nyine thupene mele koi së. Nyimutre la itre xaa götran Iehova a hamën me ce thawa me easë la hnepe atrehmekune i Nyidrë, me inamacan me trotrohnine ka ijij. Drei la enyipiewekëne koi së la ahnahna hnei Nyidrëti hna hamëne koi së, ene la Wesi Ula i Nyidrë! Tro la hni ne ole së kowe lai ahnahna ka lolo catr, a upi së troa ‘anyipi ewekëne la nöjei ijin’ troa e, me inin, me mekune thele la itre trenge ewekë i Nyidrë. (Efe. 5:15, 16; Sal. 1:1-3) Thaa tro pi kö a hace la itre hni së qa ngöne laka hne së hna xome la ketre traeme nyine troa e la Wesi Ula i Akötresie ngöne la nöjei drai. Ngo loi e tro pe la ihnimi së koi Akötresie a ee së kowe la Wesi Ula i Nyidrë, me aijijë së troa akökötrene la aqane tro sa atrehmekunyi Nyidrë me aciane e kuhu hni së la ihnimi së koi Nyidrë.
Hne së hna atre jëne la Tusi Hmitrötr laka, ame lo kola ena hnei Adamu la wathebo i Akötresie, hnei angeic hna tro xomi së asë isa ala caas itre matra i angeic, kowe la ketre mel ka ngazo, nge ka pë mejiun. Ngo hna atreine hamën hnei Akötresie la ketre jëne iamele kowe la itre atr, me kuca trongëne la itre ewekë ka amamane hnyawa laka, troa eatre la itre hnei Nyidrëti hna ajan kowe la fen.—Gen. 3:15.
Eje asë hi the së isa ala caas la aja ka tru troa ahmitrötrën la ëje i Akötresie ka nyipi lolo. Pine laka kolo pala hi a kökötre la atrehmekune së ngöne la pengöne la Akötresi së ka lolo ene Iehova, haawe, kola upi së troa ce huliwa me Nyidrë memine la organizasio i Nyidrë, hnene la troa catre kuca matre troa hlemu la ëje i Nyidrë me aja i Nyidrë. Troa xecie hnyawa koi së laka Nyidrëti a kepe së me xatua së enehila, nge epine palua fe ngöne la fene elanyi ka hnyipixe.
Eahuni itre atrene la Lapa Ne Xomi Meköt a pane amamane hnyawa la etrune la ihnimi huni koi nyipunie itre trejine me eahuni trahmanyi me föe. Eahuni fe a ajane troa amamane la etrune la madrine hun kowe la elolone la itre trenge catr hnei nyipunieti hna kuca matre troa xome la traeme ka lapa pe qëmekene la “aköte atraqat” matre troa cainöjëne la maca ka loi kowe pala hi la itre atr ka ala nyim. (Hna ama. 7:14) Maine aqane huliwa i nyipunieti hi lai, haawe, epuni hi lai a aijijë angatr troa hane hetrenyi lo ewekë hnei nyipunieti hna kapa ha, ene la troa atre Akötresie me Keriso, pine laka, ewekë lai ka troa eatrongë së kowe la mele ka thaa ase palua kö.—Ioane 17:3.
Eahuni itre trejine me nyipunie,
Lapa Ne Xomi Meköt Ne La Itretre Anyipici Iehova