Aqane Tro Sa Xatuane La Itre Sinee Së Ka Tha Hmi Kö

1-2. Ame la easa atre la nyipici, nemene la ka thë la imelekeu së me itre sinee?

ÖNI Iesu kowe la ketre atr ka pi xötrethenge nyidrë ka hape: “Tro jë pe kowe la hnalapa i hmunë, me lapa i hmunë, nge qaja ju koi angatr la nöjei ewekë hnei Iehova hna kuca koi hmunë.” (Mar. 5:19) Iesu e celë a amamane la ketre thiina ka ej thene la atr, ene la aja troa ce thawa la itre maca ka lolo kowe la itre sinee së.

² Mekune pala kö eö lo eö a atre la nyipici? Ma tha lapa hnyawa kö eö, ke eö a pi ce thawa memine la fami eö. Ngo maine jë, tha pi drei eö kö hnei angatr. Maine pena, catre pala ha la aqane qaja i eö la maca. Matre tune kaa la aqane tro sa acatrene la imelekeu së memine la itre sinee së, me metrötrëne la itre trepene meköti Iehova?

3. Nemene la hne së hna troa ce wang ngöne la tane mekune celë?

³ Ame ngöne la tane mekune celë, tro sa ce wang laka: (1) tro la utipine a xatua së troa nyipiewekëne la itre sinee së ka tha hmi kö,a ngacama tha kapa kö angatr la nyipici; (2) nyipiewekë troa goeëne la itre thiina i angatr ka loi, ngo tha itre thiina maine itre trengewekë i angatr ka ngazo; (3) tro la atreine itreqe me thiina ka loi hne së hna amaman a xatua angatr troa atrehmekune la nyipici; nge (4) tro sa amamane la ihnimi së koi angatr.

UTIPI ANGATRE JË

4. Nemene la hnei Iesu hna kuca, ngacama tha pi drei nyidrëti kö hnene la angetre Iudra?

⁴ Hnei Iesu hna thele troa xatuane la itre atr, ngacama tha pi drei nyidrëti kö hnei angatr. Hnei nyidrë hna aceitunë nyidrë memine la ketre atre eënyi vin. Ngacama tha hame kö la ketre iwacua, ngo hnei nyidrë hna nue trengecatr matre tro ej a wawen. (Luka 13:6-9) Ame la Iesu a hamëne la ceitune cili, traqa koi köni macatre nyidrë a isine troa xatuane la angetre Iudra troa lapaune koi nyidrë. Hnauëne la nyidrëti a ujë tun? Pine laka, hetre utipine i nyidrë koi angatr, matre nyidrëti a treqene hnyawa tro angatr a ujë.

5. Hnauëne la Iesu a utipine la angetre Iudra?

⁵ Iesu a utipine la angetre Iudra, ke tha hna xatua angatre kö hnene la itre he ne hmi troa lapaune koi Akötresie. Öni nyidrë, “Ceitu i angatr me itre mamoe ka pë atre thupën.” (Mar. 6:34) Qëmekene tro nyidrëti a mec, hnei nyidrëti hna treije pi Ierusalema. Pine nemen? Pine laka atre hi nyidrë laka, alanyim la ka troa mec, ke pëkö lapaune i angatr. (Luka 19:41-44) Maine tro sa utipine la itre sinee së ka tha hmi kö, tui Iesu, tro së lai a hetre aja troa xatua angatr.

6. Hnauëne la tro sa atreine itreqe memine la itre sinee së ka tha hmi kö? (Galatia 6:9)

⁶ E jë la Galatia 6:9. Ngacama tha pi drei së kö hnene la itre sinee së, ngo loi e tro sa atreine itreqe me ‘catre kuca la loi.’ Atre hi easë laka, loi e troa nue ijin matre troa nuetrij la itre ini hnapan, me acatrene la lapaune së. Maine jë tui eö hi ekö, ‘pëkö mejiune i eö lo, nge goi pë fe Akötresi eö e celë fen.’ (Efe. 2:12) Matre hetre ka xomi ijin troa xatua eö troa atre la itre nyipici qa hnine la Tusi Hmitrötr. Ame enehila, qanyi eö pena troa xomi ijin troa xatuane la itre sinee i eö ka tha hmi kö.

THELE JË TROA TROTROHNI ANGATR

7. Nemene jë la ka sawa la itre jini Iesu troa lapaune koi nyidrë?

⁷ Hnene la itre jini Iesu hna hane dreng la itre iamamanyikeu hnei nyidrë hna kuca e Galilaea. (Luka 4:14, 22-24) Ngo tha hnei angatre kö hna canga lapaune koi nyidrë. (Ioa. 7:5) Pine nemen? Tha hna qaja kö hnei Tusi Hmitrötr. Ngo ej a qaja la lue kepin ka sawa la angetre Iudra troa xötrethenge Iesu. Ame la itre xan, angatr a xou, wanga qanangazo angatre jë hnene la itre ka lapa ezi angatr. (Ioa. 9:18-22) Nge ame pena itre xan, atre Iesu hi hnei angatr qane lo nyidrëti a co, matre tha mekune kö angatr laka, nyidrëti hi la nekö i Akötresie. (Mar. 6:1-4) Ma eje fe hi lai ka sawa la itre jini Iesu troa xötrethenge nyidrë. Maine jë, celë hi kepin matre xele kö la itre sinee së ma drei së.

8. Hnauëne laka, ngazo la aqane ujë me qeje së hnene la itre sinee së ka tha hmi kö?

⁸ Mekune jë la kepine matre angatr a qaja maine ujë tun. Maine jë hnene la itre jini Iesu hna hane mekun tune la itre xaa sinee i nyidrë laka, “hmo hë angeic.” (Mar. 3:21) Hnauëne la angatr a mekun tun? Kola amamane ngöne la itre xötr laka, tru catr la itre atr ka traqa koi nyidrë, matre pëkö ijine i nyidrë troa pane xen. (Mar. 3:20) Hapeu, itre sinee i Iesu kö a mekun ka hape, tru catre pala ha la itre trengecatr hnei nyidrëti hna nu? Thatre kö së. Maine jë, itre sinee së a mekune fe ka hape, tru catre pala ha la itre trengecatr hne së hna nu kowe la hmi së. Maine eje hi lai, amamane jë koi angatr laka, atreine hi së tulu ewekë.

9. Nemene la nyine tro sa kuca matre xatuane la itre sinee së troa saze la aqane goeëne angatr la itre Temoë? (1 Peteru 3:1, 2) (Goeëne ju fe la itre foto.)

⁹ Catre jë loi thiina me atreine waiewekë. Tro la itre hne së qaja me aqane ujë së ka lolo a saze la mekuna ne la itre sinee së göne la itre Temoë Iehova. (E jë la 1 Peteru 3:1, 2.) Pane mekune jë la ketre trejin föe laka, tha ka hmi kö la föi eahlo. Ame la itre ijine eahlo a sine la itre icasikeu maine cainöj trootro, ke tro nyidrëti lai a wesitr maine mekun ka hape, tha nyipiewekë nyidrëti kö hnei eahlo. Nemene la nyine tro eahlo a kuca? Loi e tro eahlo a saze la porogarame i eahlo, matre ce lapa me nyidrë. Maine jë, tro eahlo a cainöj ngöne la itre ijine laka, hetre jole i nyidrë, maine patre kö nyidrë. Maine tro eahlo a ujë tun, me atreine tulu ewekë, tro la föi eahlo a saze la aqane goeëne nyidrë la itre Temoë.

10. Tro sa nyitipu Iesu tune kaa la kola qaja angazo së?

¹⁰ The sa kö la kola qaja angazo epun. Ame la kola jelë Iesu ka hape, ka tru hna xen me ka iji atrune la waina, ke pëkö hnei nyidrëti hna qaja. Hnei nyidrëti pe hna ithuecatr kowe la itre ka drei nyidrë troa goeëne la itre huliwa hna kuca. (Mat. 11:19) Ketre, hnei nyidrëti hna amamane ngöne la mele i nyidrë laka, atreine hi nyidrë tulu ewekë. (Wange ju la Ioane 2:2, 6-10.) Tui Iesu, ame la kola qaja angazo eö hnei itre xan, ke nue pi. Amamane jë pe ngöne la mele i eö laka, atreine hi eö tulu ewekë, nge eö a madrin. Ketre, nue pi la itre sinee i eö troa sipu öhne laka, ka tria la mekuna i angatr. Tro lai a xatua angatr troa nuetrij la itre ithuemacanyi ka thoi hnei angatr hna dreng göi easë.

CATRE JË XOMIHNI ME MEJIUN

11. Tune kaa la aqane ujë i Iesu kowe la itre jini nydrë ka tha lapaune kö?

¹¹ Tusi Hmitrötr a amamane ka hape, hnei Iesu hna xomihnine la itre jini nyidrë. Ame lo Iesu a kuca lo pane iamamanyikeu e Kana, ke ce angatre hi lo. (Ioa. 2:11, 12) Ngo tune lo hne së hna qaja e kula, tha lapaune kö angatr koi nyidrë. Ngo tha hnei Iesu kö hna xele ma wai angatr. Tusi Hmitrötr a amamane ka hape, köni macatre thupene la iamamanyikeu cili, hnei Iesu hna ithanata hnyawa kowe la itre jini nyidrë.—Ioa. 7:5-8.

12. Nemene la ka troa xatua së tro pala hi a mejiune laka, tro la itre sinee së a hane pi atre la maca ka loi?

¹² Maine tro sa trotrohnine hnyawane la utipine i Iehova, tro lai a xatua së tro pala hi a mejiune laka, tro la itre sinee së a hane pi atre Nyidrë. Ame hë la kola lep apatrene la itre hmi ka thoi, tro la itre sinee së a mekun hmaca lo itre hne së hna qaja koi angatr.b (Hna Am. 17:16) Nge maine jë, tro angatr a ce nyihlue i Iehova me easë la kola nyiqane la akötr atraqatr. Ngo e tro angatr enehila a ixelë me itre jol, nyipiewekë tro sa ce me angatr. Ame hë la angatr a öhne laka, ka nyipici la ihnimi së me aqane ujë së, tro angatre lai a hane pi atre la hna qaja hnei Tusi Hmitrötr.

AMAMANE JË LA IHNIMI EÖ KOI ANGATR

13. Ngacama tru catr la itre huliwa së koi Iehova, ngo nemene la nyine tro sa thupën?

¹³ Ngacama tru catr la itre huliwa së koi Iehova, ngo tha tro kö la itre sinee së a mekun laka, pëkö ijine i easë koi angatr, maine tha hnimi angatre hë së. (Mat. 7:12) Tro sa amamane tune kaa la ihnimi së koi angatr? Tro sa ce wang la itre xaa nyine tro sa kuca.

14-15. Nemene la ketre aqane tro sa amamane ka hape, easa hnim la itre sinee së ka tha hmi kö? Qaja jë la ketre hna melën.

¹⁴ Hë angatre jë, nge amamane jë la ihnimi epun koi angatr. Easa amamane la ihnimi së kowe la itre sinee së ka tha hmi kö, la easa hë angatr lapa. Iupi fë message jë koi angatr, me itre foto la easa vakas, maine ngenu ngöne la ketre nöj, maine la easë me itre sinee së. Ketre, ijije hi tro sa hamë kado, maine iupi fë tus, matre lolo la imelekeu së me angatr. Aqane tro hi së lai a amamane ka hape, easa hnimi angatr.

¹⁵ Tro sa ce wang la hna melën hnei Anna, ketre trejin qa Arménie. Hnene la fami angeic hna majemine itronyi la kola aniverser, maine ngöne la itre ijine feet. Ame la Anna a kapa la nyipici, hnei angatr hna seseu me mekun ka hape, tro angeic a iananyi me angatr. Nge angatr a xou, ke ame koi angatr, troa jole catre la mele i Anna. Nemene la hna kuca hnei Anna? Öni angeic, “Ame la eni a wai angatr, eni a porotrikëne la hnenge hna kuca, memine la ka traqa koi ni. Nge eni fe a hë angatr kowe la hnalapang, me amamane koi angatr la itre sineeng. Matre ame la itre xaa atrene la faming, ke imajemikeu hë memine la itre xaa trejin. Nge alanyim la itre atrene la faming ka qaja ka hape, ka lolo la meleng nge tha seseu hë angatr koi ni.”

16. Nemene la aqane nyipiewekëne Iesu la jini nyidrë, ene Iakobo? (Wange ju la ithuemacany.)

¹⁶ Nyipiewekë angatre jë. Thupene la kola amele Iesu hmaca, hnei nyidrë hna mama koi Iakobo, jini nyidrë, lo angeice cas. (1 Kor. 15:7) Pane mekune jë la aliene hni Iakobo, la angeic a öhne laka, tha thëthëhmi angeice kö hnei Iesu. Thupene lai, xecie hnyawa koi angeic laka, Iesu hi la Mesia. Maine jë, hnei Iakobo e thupen hna xatuane la itre xaa atrene la fami troa trotrohnine la nyipi pengöi Iesu.c—It. Hu. 1:14.

17. Tro sa trongëne tune kaa la hna qaja ngöne Roma 12:15? (Wange ju fe la foto.)

¹⁷ E jë la Roma 12:15. Maine tro sa nyipiewekëne la itre sinee së ngöne la itre ijine loi me ngazo, tro lai a saze la aqane goeë së hnei angatr.d Maine ketre sinee së a hnaho, felisite angeice jë, maine hamë kado matre amamane la madrine së. Nge maine kola mec la ketre sinee i angeic, ke hamëne jë la itre trengewekë ka iakeukawan, maine hamë ixatua, maine iupifë tus. Nge the cile kö së troa hë angatr, maine wai angatr lapa. Nge ame la angatr a cil kowe la itre jol ka tru, ke the thëthëhmi angatre kö.

18. Tune kaa la aqane tro sa nyitipu Anederea?

¹⁸ Amamane jë koi angeic la itre xaa trejine la ekalesia. Ame la Anederea a öhne laka, Iesu la Mesia, hnei angeic hna isine matre tro Peteru trejin me angeic a hane atre Iesu. (Ioa. 1:40-42) Tune kaa la aqane tro sa nyitipu Anederea? Hëne jë la sinee i epun troa sine la ketre icasikeu, maine troa hane ce xen memine la itre trejin. Maine tro angeic a imajimekeu memine la itre trejin, tro hë angeice lai a öhne laka, itre atr ka lolo së me metrötr.

19. Ngacama tha trotrohnine kö la itre sinee la mejiune së, ngo nemene la nyine tro sa kuca? (1 Peteru 3:15)

¹⁹ E jë la 1 Peteru 3:15. Tha trotrohnine hnyawa kö la itre xaa atrene la fami së la kepin matre tha easë kö a kuca la itre xaa ewekë. Ngo tha tro kö angatr a thëthëhmine la ihnim me metrötre së koi angatr. Nge angatr a madrin la easa isine troa ce me angatr. Ngacama tha ijiji së kö troa sine la itre xaa feet maine itre xaa hna majemin, ngo madrine pe angatr la easa thele ijin troa ce lapa me angatr. Maine jë, ame itre xaa ijin, tro sa wai angatr, me ce xeni me angatr me hamë kado.

CATRE JË MEJIUN

20. Pine nemene matre kola ithuecatre koi së hnene la hna melën hnei Iakobo?

²⁰ Ngacama tha ase kö Iakobo xötrethenge Iesu lo nyidrëti e celë fen, ngo hnei angeic hna hane atre drei nyidrë e thupen. (Gal. 1:18, 19; 2:9) Tha atre drei Iesu kö angeic lo xötrei, ngo e thupen, hnei angeic hna kapa hnyawa la itre ini nyidrë. Ame ngöne la tusi angeic ngöne la Tusi Hmitrötr, ke anyimua amexeje angeic la itre ini Iesu ka ej ngöne la Cainöj Hune La Wetr.e

21. Hnauëne la tro pala hi sa mejiun laka, tro la itre sinee së a nyihlue i Iehova?

²¹ Ngacama nue trengecatre ju hë së, ngo tha tro kö la itre xaa sinee së a hane pi atre la nyipici, maine nyipiewekë së pena. Hnauëne laka, loi e tro sa catre loi thiina? Pine laka, ame la easa utipi angatr, easë hi lai a nyitipu Iehova me Iesu. (Luka 6:33, 36) Nge tro kö a traqa la ijin tro angatr a saze. Nge maine jë, tro sa sesëkötr, ke tro angatr lai a mekun hmaca la itre ini hne së hna qaja koi angatr. Maine tro sa catr, maine jë, tro la itre xaa sinee së a hane ce nyihlue i Iehova me easë!