Hapeu Nyipunieti Kö a Huliwane La Itus Comment raisonner?
1. Hnei Paulo aposetolo me Iesu hna inine tune kaa la itre xan?
1 Hnei Paulo aposetolo hna catre troa ‘ithanatane la itre hna cinyihan.’ (Ite Hu. 17:2, 3; 18:19) Hnei angeice hna nyitipu Iesu, ke, hnei Iesu pala hi hna xome la Itre Hna Cinyihan memine la itre ceitun, matre troa xatuane la itre ka drei nyidrë troa atrepengöne la aja i Akötresie. (Mat. 12:1-12) Hna kuca la itus Comment raisonner à partir des Écritures, matre troa xatua së troa hane kuca tune lai.
2. Tune kaa la aqane tro sa huliwane la itus Comment raisonner, göne matre troa hnëkëne la itre mekune ka hetre thangan nyine nyiqaane la itre porotrike së?
2 Loi e Tro Sa Hnëkëne La Itre Mekune Nyine Nyiqaan Ka Hetre Thangan: Hetrenyi e hnine la itus Comment raisonner à partir des Écritures, la itre mekun nyine nyiqaan ka ijij troa ahlëne la aja thene la ketre atr, ngöne la itre götrane 9-15. Maine tro sa inine me xome la itre mekune nyine nyiqaane ka isapengön, ngöne la easa kuca lapaan la teritoar, haawe, tro hë sa akökötrene la aqane cainöje së, me xatua së mina fe troa maca me atreine itrotrohni ngöne la easa nyiqaane ithanata. Ijije tro sa e mekötin la itre mekune nyine nyiqaan e hnine la itus ngöne la easa cainöj jëne telefon maine jëne interphone, lo ewekë hna hnëkëne thatraqane la itre atr ka ajane troa ithanata qa kuhu trön la itre batima, memine la itre atr ka mele ngön.
3. Nemene la itre ithuemacanyi ngöne götrane 16-24 ne la itus Comment raisonner, ka troa xatua së ngöne la hna cainöj?
3 Aqane Troa Elë Hune La Itre Mekune Ka Icilekeu Memine La Maca Ka Loi: Loi e tro sa nyiqaane wange la itre mekun ka icilekeu hna troa amejëne hnene la itre atr ngöne la teritoare së, me xome la itre hnepe menetr qëmekene troa cainöj, matre troa goeëne hmaca la itre mekune ka sa lai ngöne la itre götrane 16-21? Maine jë ame la itre xan, tre, itre Budis maine itre Ëduis maine itretre Iudra maine itre Mizilima pena? Maine eje hi, xome jë la itre ithuemacanyi nyine ixatua ngöne la götrane 21-24.
4. Tro sa huliwane tune kaa la itus Comment raisonner ngöne la kola amejëne la ketre hnying, maine ketre mekune ka icilekeu?
4 Ngöne La Kola Sa La Itre Hnying: Tro fe a xatua së hnene la itus Comment raisonner ngöne la kola amejëne la ketre hnying, maine ketre mekune ka icilekeu. Ijije tro nyipunieti hi a qaja kowe lai atr, ka hape, nyipunieti a ajane troa amamai angeic la ketre ewekë ka sa hnyawa la hnyinge cili, nge thupene lai xome jë hë la itusi Comment raisonner. Pine laka hna amë wengëne la itre taan porotrik ngöne la nyipi qenön, haawe, ijije tro nyipunieti a xome la taane mekune ka ihmeku me xome la itre ithuemacanyi hna ajan. Thupene lai, canga goeëne jë la itre hnyinge hna cinyanyine atrun. Maine thaa canga öhne kö nyipunie la hnei nyipunieti hna thel, goeëne jë la pune la itus ngöne la index. Ame la nyipunieti a öhne la ithuemacanyi ka ihmeku, tre, e mekötine jë hë lai ngöne la itus. Maine nyipunieti a ithanatane la ketre xötre ne la Tusi Hmitrötr, ijije tro nyipunieti a öhne la itre ithuemacanyi ka ijij ngöne la götrane 445 fene la mekun, hna hape “Textes bibliques souvent mal compris” (itre xötr hna thaa trotrohnine hnyawa kö).
5. Nemene la itre xaa aqane troa huliwane la itus Comment raisonner?
5 Itre Xaa Aqane Troa Huliwan: Hnene la itre xan hna xome pala hi la itus Comment raisonner ngöne la hna huliwa maine hna ini pena, matre troa xatua angatr troa sa la itre hnying tune la, ‘Pine nemene matre thaa nyipunieti kö a atrune la itre feet ka tru?’ Hnene la itre thöthi hna öhne la itre ithuemacanyi fene la itre mekune ka tru, hna hape “Création” me “Évolution,” matre troa xatua angatr troa kuca la itre hnëqa i angatre ngöne la hna ini. Hapeu, hane kö nyipunieti tro troa wange la ketre atr ka wezipo, maine ka akötr pena pine laka meci hë la ketre sinee hnei angeic hna hnim? Ijije troa xatua nyipunie hnene la taane hna hape “Encouragement” göi troa hamëne la itre xötr ka keukawa. Ketre ixatua mina fe la itus Comment raisonner, ke, eje a hamëne la itre ithuemacanyi ka troa xatuane la itre ka hnëkëne la itre cainöj, me itre ka xomiujine la itre icasikeu göi cainöje trootro.
6. Nemene la aja së ngöne la easa cainöj?
6 Ame ngöne la easa cainöj, tre, thaa easë kö a thele troa icilekeu memine la itre atr matre troa amamane la ka nyipici; ketre, thaa easë kö a hamë ithuemacanyi hmekuj. Easa ajane troa atreine ithanatane me angatr la itre xötre ne la Tusi Hmitrötr me thele ewekë. Maine tro sa huliwane hnyawa la itus Comment raisonner, easë hi lai a amamane laka, easë pala hi a wange la aqane ini së.—1 Tim. 4:16.