Ngöne La Kola Ithanatan La Ketre Qene Hlapa Hnene La Ketre Atr
1. Pine nemene matre ka nyipi ewekë catr enehila troa ce huliwa ngöne la kola cainöje ngöne la teritoar?
1 Nyimutre la itretre cainöjëne la Baselaia e cailo fen, ka öhne la itre atr ka hni ka ajan, ngo ka ithanatane pe la ketre qene hlapa, laka thaa hna ithanatane kö ngöne la ekalesia i angatr. Nyimutre la itre filial ka wanga atrehmekune la enyipiewekëne la troa acile la itre gurupe ne qene hlapa me itre ekalesia, göne matre troa xatua angatre ngöne la götrane la ua. Pine laka, nyimutre la itre qene hlapa hna ithanatane ngöne la ketre götran, maine jë nyimutre la itre xaa ekalesia ka ithanatan la itre qene hlapa ka isapengöne laka, kola ce cainöj ngöne la teritoare ka caas. Qa ngöne lai, tune kaa la aqane tro la itre ekalesia a ce huliwa matre troa xecie laka, troa cengöne caas la aqane eatrëne la huliwa ne cainöj?—1 Kor. 14:33.
2. Ame ngöne la kola cainöj ngöne itre hnalapa trootro, tre, tune kaa la aqane tro sa ce huliwa memine la ketre gurupe maine ekalesia pena ka qaja la ketre qene hlapa, ngöne la teritoare së?
2 Loi e Troa Ce Huliwa: Ame ngöne la kola cainöj e cahu gojenyi maine ngöne la nöjei ijine ka ijij, tre, thaa tro kö la ka cainöj a hnöth me cile troa thawa la maca kowe la ketre atr, kolo lai a qaja mina fe lo itre ka ithanatane la ketre qene hlapa kö, nge loi e troa hane hamëne fe koi angeic la ketre itus ngöne la qene hlapa hnei angeice hna ajan. Ngo ame ngöne la kola cainöj ngöne la teritoare hna huliwaane hnene la itre xaa gurup maine ekalesia pena ka qaja la ketre qene hlapa, tre, loi e troa cainöje hmekuje hi ngöne la itre hnalapa ne lo itre atr ka ithanatane la qene hlapa ne la ekalesia hnei angeice hna sin. Ame ngöne la kola cainöje hnene la itre ekalesia ka nyimutre ngöne la teritoare ka caas, tre, nyipi ewekë tro pala hi angatre a cinyihane hnyawa la itre ithuemacany. Ketre, loi e tro la itretre thupëne la huliwa ne cainöj a ce ithawakeune, me eköthe hnyawa la itre huliwa matre troa kepe thangane hnene la itre trejine asë. (Ite edomë 11:14) Ngo maine kola ixelë hnene la ketre trejine memine la ketre atr ka ithanatane la ketre qene hlapa ngöne lo angeic a cainöj ngöne itre hnalapa trootro, nge pëkö ekalesia ne la qene hlapa cili ka easeny, eje hi laka, loi e tro angeic a catre cainöje me wai angeice hmaca.
3. Tune kaa la aqane tro sa ujë ngöne la easa ixelë memine la itre trejine qa ngöne la itre xaa gurupe ne qene hlapa kö, maine ekalesia pena, laka kola cainöje fe ngöne la teritoare hne së hna huliwa ngön?
3 Caasi Hi La Huliwa Hne Së Hna Kuca: Maine traqa ju elanyi e kola itronyi la itre ekalesia ka nyimutre troa cainöje ngöne la teritoare ka caas, nge caasi pena hi lai drai, tune kaa la aqane tro a cile kowe lai? Nyipici, tro la ihnimi Keresiano a elë hune la eisapengöne ne la itre qene hlapa, nge tro la nöjei Keresiano asë a pane wanga atrune la itre aja ne la itre atr ngöne la teritoar. (Ioane 13:34, 35) Qa ngöne lai, ame la itre ka elemekene la huliwa, tre, loi e tro angatre a atreine tuluth, me ihnim, ngöne la kola axeciëne ka hape, maine ijije troa tro kowe la ketre teritoare hnene la ketre gurup.—Iako. 3:17, 18.
4. Nemene la hna perofetane ekö ka eatr enehila?
4 Hna thingehnaeane hnei Tusi Hmitrötr, ka hape, tro la nöjei atr ka ithanatane la itre xaa qene hlapa kö a hane drenge la maca ka loi. (Hna ama. 14:6, 7) Maine tro sa catre ce huliwa itre gurup me itre ekalesia ka isa qene hlapa kö, haawe, tro hë së a neëne troa ce fenafena ngöne la ketre hnalapa ka caas; nge tro ha elë la etrune ne la itre atr hna ketr hnene la maca ka loi, kolo lai a qaja mina fe lo itre ka ithanatane la itre xaa qene hlapa kö.—Efe. 4:16.