Eloine Troa Ujë Thenge La Aqane Ameköti Ewekë i Iehova

MAINE easa ajane troa kuca la aja i Iehova thenge la aqane ameköti ewekë i Nyidrë, nyipiewekë tro sa drengethenge Nyidrë, Atre Musi Cile kowe la hnengödrai me fene hnengödrai. Ame koi së, Iesu Hupuna i Nyidrë la ka mus hune la ekalesia. Ketre, easa trongëne la trepene meköti göi troa mus ngöne la itre xa götrane la mele së. Hetrenyi la itre manathithi hne së asë hna kapa qa ngöne la hna drengethenge la aqane ameköti ewekë i Akötresie.

² Ame göi troa drengethenge la ketre mus hna acil, tre, ewekë lai ka mama ha ekö e Edena. Kola mama lai ngöne la itre hna ahnith hnei Akötresie ngöne Genese 1:28 me 2:16,17. Tro la itre öni a lapa fene la musi ne la itre atr, nge tro Adamu me Eva a drengethenge la aja i Iehova me musi Nyidrë. Troa tingetinge me tro loi la melene la atr e hna mele fene la musi Akötresie. Ame hë thupen, kola mama hnyawa la nyipici cili göi mus ngöne 1 Korinito 11:3. Öni Paulo aposetolo: “Ajange tro nyipunie a ate laka, Keriso la he ne la nöjei trahmanyi, nge trahmanyi la he i fö; nge Akötesie la he i Keriso.” Haawe, kola mama e celë laka, hetre hene së asë hi, ngo Iehova pe hi la ka pëkö hen hui Nyidrë.

³ Alanyimu la itre atr enehila ka tha metrötrëne kö la itre hene i angatr. Ame la qaane lai, tre, hnene la lue pane keme me thine së ekö hna sipu ujëtrije la musi cile i Iehova. (Gen. 3:4, 5) Ngo tha traqa kö nyidro kowe la hnei nyidroti hna ajan, ene la troa sipu mus. Nyidroti pena ha a lapa fene la musi Satana lo Diabolo, ketre angela ka ngazo. Hnene la pane icilekeu cili hna ananyine la nöjei atr qathei Akötresie. (Kol. 1:21) Ame la pune enehila, kola lapa la itre atr ka alanyim fene la musi ne la atre ka ngazo.—1 Ioane 5:19.

⁴ Pine laka, hne së hna thele troa atre la itre nyipici ne la Tusi Hmitrötr, me melën itre ej, utretre hë së qa ngöne la musi Satana. Ame koi së, Itretre Anyipici Iehova, nge hna bapataisone hë, Iehova hi la ka troa mus kowe la mele së. Casi hi la mekuna së me Davita Joxu, kola hape, Iehova e “hune la nöjei ewekë asëjëihë.” (1 A. l. ite jo. 29:11) Easa qaja amamane cememine la hni ka ipië, ka hape: “Iehova la Akötesie; nyidëti hi la ate xupi shë, nge tha hne shë kö; eëshë la nöje i nyidë, me hnënge mamoe ne la zi nyidë.” (Sal. 100:3) Ame koi së, ka draië catr Iehova, nge nyipiewekë troa pexeje la aqane idrengethenge së, ke nyidrëti la ka xup la nöjei ewekë asëjëihë. (Hna ama. 4:11) Pine laka, easë la itre hlue i Akötresie, easa xötrethenge Iesu Keriso, atre hamëne la tulu ka pexeje göi troa drengethenge Akötresie.

⁵ Nemene la hnei Iesu hna inin qa ngöne la itre akötre hnei nyidrëti hna melëne e celë fen? Öni Heberu 5:8: “Ngaca ma Hupunati nyidë, te, hna inine hnei nyidë troa idei hnene la nöjei ewekë hnei nyidëti hna xomi hnin.” Hnei Iesu hna mele nyipici, me catre drengethenge la Keme i nyidrë e koho hnengödrai, ngacama hna traqa koi nyidrë la nöjei itupath. Ketre, pëkö ewekë hnei Iesu hna ketre kuca xanën, maine ketre sipu qaja la mekuna i nyidrë, maine thele troa sipu atrunyi nyidrëti kö. (Ioane 5:19,30; 6:38; 7:16-18) Ame lo nyidrëti a huliwa i Iehova e celë fen, ka madrine palahi nyidrë troa kuca la aja ne la Keme i nyidrë, ngacama hna icilikeu me akötrë nyidrë. (Ioane 15:20) Ngo hnei Iesu palahi hna drengethenge Akötresie. “Hnei nyidëti hna aipië nyidëti kö,” uti hë la mec, ene la meci “[“hune la sinöe ne iaxösisi,” MN].” Nyimu manathith hna kapa qa ngöne la hnei nyidrëti hna idrengethenge. Ame la ketre, hna aijijëne la mele ka pë pun kowe la nöjei atr, nge hna adraië nyidrë, nge hna atrune la Keme i nyidrë.—Fil. 2:5-11; Heb. 5:9.

DREI LA NYINE TRO SA DRENGETHENGE?

⁶ Maine tro sa thel troa drengethenge Iehova, troa trianyi së hnene la itre ejolene la mel, me hleuhleu ka eje thene la itre ka thipetrije la musi cile i Iehova. Ngo, ame Satana, ithupëjia me easë, angeic a thele tha i angeic. Maine tro sa thel troa cile catr ngöne la itre nyinyithiina i angeic, me “aipië [së] ju kö fene la ime ka mene i Akötesie,” tro ha thepe së qaathene la atr ka ngazo.—Mat. 6:10, MN, 13; 1 Pet. 5:6-9.

⁷ Ame e hnine la ekalesia, easa wangatrune la musi Keriso memine la mus hnei nyidrëti hna nue kowe la hlue ka nyipici me ka inamacan. Matre, hetre thangane lai kowe la aqane ujë së koi itre xan. E tro sa drengethenge Akötresie e hnine la ekalesia, tro së lai a xötrethenge la hna amekötine hnene la Wesi Ula i Nyidrë ngöne la nöjei götrane la hmi së. Kolo lai a qaja la huliwa ne cainöje së, me sine la itre icasikeu me hane qeje mekun, memine la aqane imelekeu së me itre qatre thup, me sajuëne la aqane ameköti huliwa e hnine la ekalesia.—Mat. 24:45-47; 28:19, 20; Heb. 10:24, 25; 13:7, 17.

⁸ Hnene laka, easa drengethenge Akötresie, haawe, hetre tingeting the së, nge lapa hnyawa la hni së, nge lolo fe la aqane trongene la itre huliwa e hnine la ekalesia. Kola mama hnyawa la itre thiina i Iehova thene la itre hlue i Nyidrë. (1 Kor. 14:33, 40) Hetrenyi la itre ewekë hne së hna sipu melëne e hnine la organizasio i Nyidrë. Nge, celë hi ka ketri së, matre casi hi la mekuna së me Davita joxu. Ame la angeic a öhne la eisapengönene la itre hlue i Iehova memine la itre atr ka ngazo, öni angeice jë hi e qaja madrin ka hape: “Manathith la nöj’ e Iehova la Akötesi angat.”—Sal. 144:15.

⁹ Ame e hnine la faipoipo me e hnine la hnepe lapa, “trahmanyi la he i fö.” Ngo tro mina fe la trahmanyi a drengethenge Keriso, nge ketre Keriso a drengethenge Akötresie. (1 Kor. 11:3) Tro la itre föe a drengethenge la itre trahmanyi angatr, nge ketre, tune fe la itre nekönatr kowe la keme me thin. (Efe. 5:22-24; 6:1) Troa tingetinge la hnepe lapa e hna isa trongëne hnene la itre atrene ej la tulu celë göi mus.

¹⁰ Loi e tro la trahmanyi a mus cememine la ihnim, me nyitipu Keriso. (Efe. 5:25-29) E hna xome hnyawa la hnëqa i angeic, nge tha sasaithi tulu menu kö la aqane mus, haawe, troa madrine hnene la föe me itre kuku troa drengethenge angeic. Ame la hnëqa i föe tre, ene la troa ixatua. (Gen. 2:18) E tro nyiidro a thel matre tro palahi a sajuëne me metrötrëne hnyawa la föi nyiidro, tro hë lai a hnime catrë nyiidro hnene la trahmany, nge kolo fe a atrunyi Akötresie. (1 Pet. 3:1-4) Ame la kola xötrethenge la tulu ne mus hna qaja e hnine la Tusi Hmitrötr hnene la trahmanyi me föe, nyidroti hi lai a hamëne la tulu kowe la itre nekönatr, ene la troa drengethenge Akötresie.

¹¹ Hnene laka, hetre aja së troa drengethenge Akötresie, haawe, hetre thangane lai kowe la aqane goeëne së la “angete musi atraqat,” lo “[“hna nue itre ej hnei Akötresie troa cil,” MN].” (Rom. 13:1-7) Itre keresiano la itre atrene la nöje ka metrötrën hnyawa la itre wathebo i mus. Angatr a nyithupen impôt, me ‘hamëne koi Kaisara la itre ewekë i Kaisara, nge koi Akötresie la itre ewekë i Akötresie.’ (Mat. 22:21) Easa drengethenge la itre mus hna acil, ngo tha tro pe itre ej a icilekeu memine la itre wathebo i Iehova. Tro hë së e cili a nue la trengecatre së troa eatrëne la huliwa ne cainöj.—Mar. 13:10; Ite hu. 5:29.

¹² Kola ketr la nöjei götrane la mele së la troa drengethenge la aqane ameköti ewekë i Akötresie. Easa lapa goeëne jëne la lapaun la ijine tro la nöjei atr asë elanyi a drengethenge Iehova Akötresie. (1 Kor. 15:27, 28) Nyimu manathith hna lapa treqen hnene la itre ka wangatrune la musi cile i Iehova. Nge, the qaja kö elanyi kowe la itre ka drengethenge Nyidrë epine palua!