Jidri Ne Pui Ne Xeni Ne La Joxu—Ketre Nyine Amekunën Ka Atrunyi Akötresie

HNA upe la itre Keresiano troa atrun la Drai Ne Amekunën la meci Keriso. Ame la ketre aqane hëne la heji cili, tre, “xeni ne jid ne la Joxu.” (1 Korinito 11:20) Pine nemene matre ka nyipi ewekë la ijine cili? Eu nge troa atrune tune kaa la drai cili?

Hnei Iesu Keriso hna amekötine laka, troa atrun la drai cili ngöne la jidri ne Paseka i angetre Iudra ngöne la macatre 33 M.K. Ame la Paseka, tre, acaa tro hi a atrune ngöne la macatre, ngöne la hnaafootrin ne drai ne la treu Nisan i angetre Iudra. Hna treqen hnei angatr lo hneijin kolo hmaca ha a cia dröne la itre isinöe, hmekune lo kola 12 lao hawa ne lai nge 12 lao hawa ne jidr. Ame la pane dreuma treu matre traqa pi kowe la drai cili, celë hi la kola xejë la treu Nisan. Thupene jë hi la 14 lao drai kolo hi lai a atrune la Paseka, thupene la hna lö la jö.

Hnei Iesu hna ce atrun la Paseka memine la itre aposetolo i nyidrë; thupene la hna lö triji angatre hnei Iudra Isakariota, Iesu pe hi memine lo itre ka lapa pe a atrune jë la Jidri Ne Pui Ne Xeni Ne La Joxu. Hnene la pui ne xeni celë hna nyihnan lo Paseka i angetre Iudra, haawe, ame la drai hna atrune celë, tre, loi hi e troa acaa atrune ngöne la macatre.

Kola qaja hnei Mataio ka hape: “Nge angate pete hi a xötönë, Iesu a xome la areto, me olen, me thupathupa, me hamë angete deng, me hape, Xomejë, xeniju, dei la ngöneteing. Nge nyidëti a xome la inege, me olen, me hamë angat, me hape, Ijijë nyipunie asë ; ke celë hi madrange ne isisinyikeu hna nenge thatraqane la ka ala nyimu, nyine shenge la ngazo.”​—Mataio 26:​26-​28.

Kola mekune hnene la itre xan ka hape, hnei Iesu hna ujën la areto matre troa ijöne i nyidrë, nge waina matre troa madra i nyidrë. Ngo ame la Iesu a hamën la areto, tre, pë pala kö eatre i nyidrë, nge ka pexeje pala hi la ijön ne la ngönetrei i nyidrë. Hapeu, nyipici ka hape, hnene la itre aposetolo hna öni la ijöne i Iesu me iji la madra i nyidrë? Ohea, ke maine ju tre, ase hë angatr ena la wathebo i Akötresie, ene laka thaa tro kö a öni atr. (Genese 9:​3, 4; Levitiko 17:10) Thenge la hna qaja hnei Iesu ngöne Luka 22:​20, hna hape: “Dei la inege, isisinyikeu ka hnyipixe ngöne la madrang, hna nenge thatraqai nyipunie.” Hapeu hna saze ju hi tune lai la inege cili matre troa nyi “isisinyikeu ka hnyipixe”? Ohea, pine laka ame la isisinyikeu tre, thaa ketre ewekë kö nyine tro sa atreine ketr hnei wanakoim, ngo ketre mekune pe nyine troa ce kapa.

Haawe, kola mama hnyawa ka hape, ame la areto me waina, tre, lue ewekë lai hna xom matre nyine nyihatren la ngönalë memine la qazië i Iesu. Kola nyihatren hnene la areto la ngönalë ka pexeje i Keriso. Hnei Iesu hna xome la ketre hnepe falawa munëne hna xeni pe ngöne lo pui ne xeni ne Paseka. Ame la areto, tre, thaa hna levenëne kö. (Esodo 12:8) Hnei Tusi Hmitrötr hna xome la leven nyine nyihatren la ngazo maine hnyeqetr. Qa ngöne lai, kola nyihatren hnene la falawa la ngönalë ka pexeje i Iesu, ene la ngönetrei i nyidrë hna huujën. Thaa hna löthe kö hnene la ngazo.​—Mataio 16:​11, 12; 1 Korinito 5:​6, 7; 1 Peteru 2:​22; 1 Ioane 2:​1, 2.

Kola nyihatren la madra i Iesu hnene la waina ka madra. Madra lai ka anyipicin la isisinyikeu ka hnyipixe. Hnei Iesu hna qaja ka hape, ame la madra cili, tre, hna neng matre “troa nue tije la nöjei ngazo.” Haawe, ijije hë troa wië la itre atr xajawa i Akötresie, nge atreine fe hë angatr troa hane lö kowe la isisinyikeu ka hnyipixe me Iehova. (Heberu 9:​14; 10:​16, 17) Ame la isisinyikeu cili, maine ketre hna sisiny, tre, kola aijijëne la itre Keresiano ka ala 144 000 troa elë hnengödrai eë. E cili, angatr a troa xome la itre hnëqa, ene la troa itre joxu me itretre huuj, nge troa kepe manathithi qa ngön hnene la nöjei atr asë.​—Genese 22:18; Ieremia 31:​31-​33; 1 Peteru 2:9; Hna Amamane 5:​9, 10; 14:​1-3.

Drei la ka troa xome la itre hatrene cili hna troa tro fë ngöne la Drai Ne Amekunën? Kola mama hnyawa laka, kolo hmekuje hi lo itre ka lapa hnine la isisinyikeu ka hnyipixe​—ene lo itre ka mejiun troa mele e koho hnengödrai​—angatre hi la itre ka troa xeni la areto me iji waina. Kola acatren la mejiune i angatr hnene la uati hmitrötr, laka, hna ië angatre fe troa hane musi ceitun me itre joxu e koho hnengödrai. (Roma 8:​16) Angatre fe e hnine la isisinyikeu thatraqane la Baselaia me Iesu.​—Luka 22:29.

Nge tune kaa pë hë lo itre ka mejiune troa mele epine palua ngöne la Paradraiso e celë fen? Angatr a drengethenge la hna amekötin hnei Iesu, me sin la Jidri Ne Pui Ne Xeni Ne La Joxu, ngo angatre hi a troa hane sin, thaa angatre kö a troa hane xen. Nyine atrune pala hi hnene la Itretre Anyipici Iehova la Jidri Ne Pui Ne Xeni La Joxu, troa acaa kuca ngöne la macatre e drai 14 Nisan thupene la hna lö la jö. Ngacama xalaithe pe hi la itre thauzane la etrun la itre ka qaja ka hape, angatre a troa elë hnengödrai eë, ngo ka sisitria catr kowe la itre Keresiano asë troa atrun la Drai Ne Amekunën. Ketre ijine lai tro së asë a mekune hnyawa la ihnimi gufa ka sisitria, hna hamëne hnei Iehova Akötresie me Iesu Keriso.​—Ioane 3:​16.