Ini 2

Pëkö Ketre Sinee Ka Sisitria Hui Akötresie

Pë hmaca ju kö ketre ewekë ka sisitria hune la troa sinee i Akötresie. Troa ini nyipunieti hnei Akötresie la aqane troa mele madrine me lapa xetietë; tro Nyidrëti a thepe nyipunieti fe, qa ngöne la itre ini ka thoi me itre ewekë hnei nyipunieti hna majemine kuca ka ngazo. Tro Nyidrëti a drenge la itre thithi nyipunie. Tro fe Nyidrëti a xatua nyipunie, troa hetre tingetinge me lapaun e kuhu itre hni nyipunie. (Salamo 71:5; 73:28) Tro fe Akötresieti a xatua nyipunie troa xomihnine la itre akötre i nyipunie. (Salamo 18:18) Nge Nyidrëti fe a hamëne koi nyipunie la ahnahna ka sisitria, ene la mele ka thaa ase palua kö.​—Roma 6:23.

Atreine hi tro sa ce mele memine la itre sinee i Akötresie, e hne së hna catre lapa qale koi Nyidrë. Tro fe hë angatre a hane itre sinee i nyipunieti fe, kösë itre trejine nyipunieti me angatr. Tro fe angatre a hane madrine troa qaja koi nyipunieti la pengöi Akötresie, me xatua nyipunie, me hane ithuecatre koi nyipunie.

Thaa ceitu së kö me Akötresie. Nyipi ewekë tro së a trotrohnine hnyawa la ketre mekune ka tru alien, maine easë a thele tro së a hane nyi sinee i Akötresie. Isa pengöne kö la easë a thele troa ce sinee me Akötresie, memine la easë a thele troa nyi sinee ne la ketre atr. Ka draië nge ka thatrehmekune catre kö la inamacane i Nyidrë, nge sisitria la mene i Nyidrëti hui së itre atr. Nyidrëti fe la Atre musi ka meköt. Qa ngöne lai, maine easë a ajane tro së a itre sinee i Nyidrë, loi e tro së a drei Nyidrë, me xötrethenge la hnei Nyidrëti hna upi së troa kuca. Maine tro pala hi së a mele tune lai, eje hi laka, tro hë së a hetrenyi la mele ka loi.​—Isaia 48:18.