Atre Kö Epuni La Ijin?
AME la easa pi atre la traem, easa canga goeëne la wac. Nemene la hne së hna troa qaja kowe la ketre sinee ka hnying ka hape, “Ije traeme hë?”
Nyimutre la itre aqane troa sa. Ame ngöne la itre xaa nöj kola qaja ka hape, “1h30” maine “13h30.”
Nemene la aqane qaja ekö la traem? Nyimutre la itre aqane qaja. Ame ngöne la Itre Hna Cinyihan Qene Heberu hna qaja la itre hnaewekë tune la “hmakany,” “hnaipajö,” “midi,” me “hej.” (Genese 8:11; 19:27; 43:16; Deuteronomi 28:29; 1 Ite Joxu 18:26) Ngo hetre itre xaa hnaewekë kö hna qaja hnei Tusi Hmitrötr, göne la traem.
Ame ekö, hetre itre atr hna acil troa qaja la traem e Isaraela, kola qaja la itre atr ka thup. Hnene la angetre Isaraela hna thawa la jidr koi könitre lao götran, hna hëne ka hape, “ite ijine troa hmek.” (Salamo 63:6) Ame ngöne Angete Amekötin 7:19, kola qaja la “hmeke he nyipin.” Ame pena lo ijine kola hnaho Iesu, hnene la angetre Iuda hna thawa la jidr koi foa lao götran, tune la itretre Heleni me angetre Roma.
Anyimua qaja e hnine la itre Evangelia, la itre ijine hmeke cili. Drei la ketre ceitun. Ame “ngöne la waci hnaeken’ e jid,” hnei Iesu hna tro hune la hnagejë kowe la itretre drei nyidrë hune la he. (Mataio 14:25) Ketre, hnei Iesu hna hamëne la ketre ceitun me hape: “Maine ate hë hnene la tixene uma la waci e jidi ka troa traqa la ate kë’nö ngön, maine ase hë angeice hmekën, nge tha hna nue kö la uma i angeice wanga thë ej.”—Mataio 24:43.
Hnei Iesu hna qaja lo foa lao ijine troa hmek, ngöne la nyidrëti a hmekëne la itretre drei nyidrë. Öni nyidrë, “tha ’te kö nyipunie la ijine traqa la joxu ne uma, maine e hejihej, maine e hne nyipa jid, maine e kukahleke la trotro, maine e hmakany.” (Mareko 13:35) Ame la pane ijin, e “hejihej,” tre, hna nyiqane ngöne la kola lö la jö uti hë 9h e hej. Ame la hnaaluene ijin, e “hnenyipajidr,” tre, kola nyiqan e 9h e hej uti hë minuit. Ame la hnaakönine ijin, e “kukahleke la trotro,” tre, kola nyiqan e minuit uti hë 3h e hmakany. Maine jë, celë hi lo hawa ne kola kukahleke la trotro, ngöne lo jidri kola othi Iesu. (Mareko 14:72) Ame la hnaaekene ijin, e “hmakany,” tre, kola nyiqan e 3h e hmakany uti hë la kola fetra la jö.
Ngacama pë palakö waci ekö, ngo ame pe, hetre itre aqane tro kö a qaja la traem.