Ketre Tusi Qaathei Lapa Ne Xomi Meköt
Itretre Ce Anyipici Iehova Me Huni Fe:
Drei la madrine hun troa cinyany koi nyipunie, itre trejine me eahun! Caasi la mekuna hun me Ioane aposetolo, lo atre qaja, ka hape, hnei nyidrë hna “hnime ngöne la nyipici” la itre sine trongei nyidrë, nge nyidrëti lo a madrine laka, hnei angatre hna “tro ngöne la nyipici.” (2 Ioane 1, 4) Nyipici, drei la ketre manathithi koi së asë troa atre la nyipici! Hnene la nyipici hna thepe së qaathei Babulona Atraqatr memine la itre ini me itre hna majemine kuca ka ahmahmanyi Akötresie. Hnene laka easa melëne la nyipici, matre hetrenyi hë së la ihnim, me menyik, me utipin. Nge ketre, hnene la nyipici hna fe gojenyi së matre troa cile xajawa i Akötresie cememine la hni ka wië, me hane mejiune kowe la mele ka thaa ase palua kö.
Ketre, drei la hni ne ole së kowe la uati hmitrötre i Iehova, laka, ej a eatrongë së o drai me acatrene la lapaune së! Mejiune hun laka hnei epuni hna madrin troa wange la itre götrane ka nyimutre ne la hna amekötine hnei Iehova ngöne la itre Kovasio ne Distrik ka ase hë, lo hna hape “Hna Eatrongëne Hnene La Ua i Akötresie.” Pine laka ngazo la itre aqane mel e celë fen, haawe, nyipi ewekë tro sa mejiune kowe la ua i Iehova ka tru trenge catren, matre troa eatrongë së ngöne la itre drai ka ngazo ka troa xulu.
Ka xecie hnyawa koi hun laka hna ketr la itre hni nyipunie hnene la hnei nyipunieti hna e ngöne la Annuaire, lo itre hna melëne hnene la itre trejine me easë ka xomihni ahoeany ngöne la kola akötrë angatr pine la lapaun. Ketre, eahuni mina fe a madrine laka, hnene la itre trejine cili hna mele nyipici, ngacama hna traqa koi angatre la itre jol, nge kolo petre hi a ase xome la bapataiso, maine thaa hna bapataisone petre kö. Drei la aqane hnimi angatr hne së pine la aqane nyipici angatr memine la aqane cilaxome angatr la meköt! Nyipici, kola uku së hnene la tulu ka lolo i angatr troa catre mele nyipici kowe la Baselaia, ngacama traqa ju koi së la itre itupath.—1 Thes. 1:6-8.
Ange trejine fe, atrehmekune hi huni laka, nyimutre la itre jol hnei epuni hna troa catre cile kow, matre troa acatrene la aqane imelekeu ne la itre atrene la hnepe lapa i epun, kola qaja la itre ejolene la mani maine itre xaa jole pena. Ame kowe la itre xan, tre, ketre jole fe la troa cainöj me hane sine pala hi la itre icasikeu ne la ekalesia. Celë hi kepin matre, thupene la hna anyimua thithi me porotrik, ene pe hne huni hna saze la aqane eköthe la itre icasikeu ne la ekalesia qaan e 1 Januare 2009. Eahuni a mejiune laka tro epuni a trongëne la itre hna amekötine cili ka troa aijijë epuni troa hetre traeme ne isa ini me ce ini Tusi Hmitrötr pena memine la itre atrene la hnepe lapa i epun.
Drei la madrine ka tru troa öhne laka, nyimutre la itre atr hna aijijën troa xome la bapataiso ngöne la itre asabele hna kuca ngöne la macatre celë. Ame thene la itre atr cili, tre, hetrenyi mina fe la itre thöth. Loi e tro epun, itre keme me thin, a hiane hnyawa la itre nekö i epun matre tro angatr a hnine la nyipici, nge tro fe a ithuecatre koi angatr troa sa xepu koi Iehova ngöne la thöthi petre kö angatr. Ngacama ka bapataiso hë la itre thöth, ngo tro ha mama la ini hnei nyudrene hna kapa qa ngöne la hnalapa hnene la aqane ujë i nyudren qëmekene la itre itupath ka traqa ngöne la itre uma ne ini.—Sal. 128:1-6.
Ketre, eahuni mina fe a ajane troa qaja la aqane kökötre hnyawa la huliwa ne ini Tusi Hmitrötr, laka, thangane hi la hna catre hnene la itre mesinare me itre pionie hut. Eahuni e celë ngöne la Lapa Ne Xomi Meköt a olene catrëne kowe la itre trejine me huni e cailo fen, pine la hnei angatre hna xome hnyawa la ketre götrane ka sisitria ne la huliwa, ene la troa qaja, ka hape, “Trohemi!” kowe la itre atr ka hni ka menyik me könëne la nöjei atr asë ka pi ij troa “xome gufane la timi ka mel.” (Hna ama. 22:17) Eahuni a kapa cememine la madrin ngöne la lapa ne la itre trejin e cailo fen, lo itre atr ka xome la bapataiso ngöne lo macatre hnapan, laka 289 678 la etrun!
Nyipi ewekë tro sa lapa mekune hnyawa la itre trenge ewekë hnei Ioane aposetolo hna cinyihan, kola hape: “Kola pate la fene hnengödrai, memine la hna aja kow; ngo troa cile huti epine palua la ate kuca la aja i Akötesie.” (1 Ioane 2:17) Nge ketre, easa atre hnyawa laka easenyi hë la ijine troa ‘paatre’ la fene celë! Drei la aqane ujë ka inamacan, ene la troa kuca panëne la aja i Akötresie ngöne la mele së, me ‘hmek.’ (Mat. 24:42) Maine tro pala hi sa kuca tune lai, haawe, thaa tro hë sa luelu nge ketre tro hë sa kepe thangane ka tru qa ngöne la ihnimi gufa i Iehova.—Is. 63:7.
Eahuni a tremeune laka tro la itre hna melëne ka hamë ithuecatr hna amë hnine la Annuaire, a xatua nyipunieti asë, angetre thele panëne la itre aja ne la Baselaia ngöne la mele i nyipunie. Eahuni a ajane troa akeukawane la hni nyipunie laka, eahuni pala hi a meku nyipunie me thithi sai nyipunie, me hnimi catrë nyipunie. Epi tro pala hi Iehova a amanathithi nyipunie.
Itre trejine me nyipunie,
Lapa Ne Xomi Meköt Ne La Itretre Anyipicine i Iehova