Tusi Qaathei Collège Central

Drei la manathithi ka eje the së! Thaa hnene hmekuje kö laka, easë a atre Iehova Akötresie ka caas, Atre xupe la hnengödrai memine la fen, ngo hnene mina fe laka, easë a xome la ëje i Nyidrë me nyihlue i Nyidrë. Celë hi ketre manathithi atraqatr!—Is. 43:12; Heb. 8:11.

Easë a mejiune kowe la mel, nge hnëqa së troa cainöjëne la maca ka loi ne la Baselaia kowe la itre xaa atr, matre tro mina fe angatre a hane thili koi Iehova, me hane kapa la mejiune ka eje the së. (Mat. 24:14; Rom. 10:13, 14; 1 Thes. 5:8) Hetrenyi fe the së la madrine qa ngöne laka, ce easë memine la itre trejine e cailo fen, itretre nyihlue i Iehova ka ihnim, me ka catre ixatua. Drei la itre thangane ka loi hne së hna kapa!

Celë hi matre kola ithuecatre koi së hnei Tusi Hmitrötre ka hape: “Nyi hlue i Iehova jë memine la madin. . . . Löjë kowe la ite qanahage i nyidë ce memine la ole, me kowe la itre hnahage i nyidë ce memine la atrun; ole nyidëti ju, qaja aloine jë la atesiwa i nyidë. Ke jiniati Iehova; eje palua kö la ihnimi nyidë; nge uti hë la nöjei xöte la nyipici nyidë.” (Sal. 100:2-5) Troa hetre madrine së troa nyihlue i Iehova, e hne së pala hi hna isa catre qale koi Nyidrë. Nyidrëti a aijijë së troa acatrene la aqane imelekeu së me Nyidrë, nge isa qanyi së pë hë troa akökötrene ej. Maine lolo la aqane imelekeu së me Iehova, atre hi së laka, traqa ju hë la itre jole koi së, ngo tro pala hi Nyidrëti a canga xatua së me acatrene la lapaune së. Easë a mejiune laka, tro Nyidrëti a hamëne la trenge catre ngöne la ua, me eatrongë së ngöne la easë a qëmeke kowe la itre jole ka traqa koi së ngöne la itre drai hnapine ne la fene celë. Ngacama easë a qëmeke kowe la itre jol, ngo easë a madrine ngöne la easë a cainöj, me olene koi Iehova ngöne la nöjei drai, pine laka, tune la hna amexeje pala hi koi së, ‘Nyidrëti a meku së.’—1 Pet. 5:7.

Ame ngöne lo macatre ka ase hë, hnei Iehova hna amanathithi së hnyawa. Easë a madrine ngöne lo ijine Kovasio ne Distrik hna hape “Kuca Thenge Jë La Wesi Ula,” laka, itre thauzane së kola pane caasi memine la itre xane ka ce lapaune me easë, nge kola thinge la itre nyima me ce thawa la itre göxeni ne la ua, hune la laulau i Iehova. Ngöne la itre hne së hna ce traqa itronyi troa Ini Tus, hne së hna ce madrine la aqane acatrene la lapaune së, hnene lo itus hna hape, Prêtons attention à la prophétie de Daniel ! Nge easë mina fe a madrine atraqatr, ngöne la easë a kapa la ketre itusi ka hnyipixe, La Prophétie d’Isaie, lumière pour tous les humains I ! ‘Hna atiqane hnyawa la inege së.’—Sal. 23:5.

Drei la madrine së troa atre laka, itre milio së itre trejine trahmanyi me föe ngöne la ua, easë a caasi troa nyihlue i Iehova! Ketre ithuecatre koi së la easë a e la itre ithuemacanyi ka hnyipixe, hna kapa qa ngöne la huliwa ne cainöj! Easë a madrine mina fe la aqane alanyimun la itre atr ka traqa troa hane sine la Drai ne Amekunëne la meci ne la Joxu, itre milio la etrun—ngacama nyimutre la itre jole hnei angatre hna cile kow enehila. Ame la easë a goeëne la fene hnengödrai, kola mama hnyawa laka, “atraqatre la meledrai.” (Luka 10:2) Ame ngöne lo macatre hnapan, hna e la 5 555 la etrune la itre atr ka etid ngöne la nöjei wiik, hnei angatre hna kökötre uti hë la xome angatre la bapataiso. Maine nyipici laka, atraqatre kö la menue ngöne la itre xaa götrane ne la ihnadro, ngo easë asë hi a madrine la hnei Iehova hna kuca. Easë a öhne hnyawa la hatrene laka, Iehova a amanathithi së, ngöne laka, hna thele pala hi troa caasi hnene la itre hlue i Nyidrë.

Ketre jëne madrine së mina fe la kola xupe la itre uma ne Baselaia ka hnyipixe! Easë a madrine la aqane sajuëne hnyawa la huliwa cili hnene la itre trejine trahmanyi me föe, ka traqa qa ngöne la itre nöje ka tru. Hna xupe hë la itre Uma Ne Baselaia itre hadredre la etrun, jëne la ixatua ne la itre Gurupe ne Xupi Uma Ne Baselaia; hnei angatre hna kapa la ini ka ijije thatraqane lai. Kola tro kowe la itre ekalesia trootro hnene la itre trejine cili, matre troa elemekene la itre Uma ne Baselaia hna xupe trongën. Itre thauzane pala kö la etrune la itre Uma Ne Baselaia nyine troa xup, celë hi matre kola sipone catrëne troa nyimu ka ixatua qa ngöne la itre nöje ka ijije troa ixatua. Maine nyipunieti a mele ngöne la itre nöje cili, hapeu, ijije kö tro nyipunie a hane ixatua? Drei la etrune la madrine ne la itre trejine troa ketre isa hetrenyi la itre Uma Ne Baselaia i angatr, hnë tro angatre a hane ce traqa troa hmi koi Akötresie! Nge drei kö la aqane tro angatre a olene la itre ahnahna hna hamëne hnene la itre trejine asë, matre troa nyi maniene la itre huliwa cili!

Ketre easë mina fe a madrine la itre ithuemacanyi ka lolo, ene la itre pune ka lolo koi së qa ngöne la itre hna kootr. Eje hi laka, nyimutre la itre atr ngöne la nöjei götrane ne la fen, ka ajane troa lepe apaatrene la hmi koi Iehova. Ngöne la easë a cile kowe la itre jole cili, easë a mejiune laka, ngacama kola mana la itretre icilekeu, maine pena kola mama laka, thaa jole kö e troa qanangazone la itre hlue i Iehova, ngo pëkö ka atreine troa sewe Iehova troa cilëgöli angatr. (2 A. l. ite jo. 14:11) Eahuni a madrine me meku nyipunieti asë itre trejine trahmanyi me föe, ka catre cila xome la nyipi hmi.

Catre pi troa acatrene la lapaune i nyipunie, me mejiune koi Iehova troa eatrongë nyipunie, nge eje hi lai laka, tro hë nyipunie a hetrenyi la madrine atraqatre troa xome la itre hnëqa i nyipunie. (Ite edomë 3:5, 6) Thaa ijije kö tro sa kucakuca, ngacama troa catrehnine la icilekeu ne la itre ithupëjia me easë. Loi e mekune pala hi së lo ithuecatre hna hamëne hnei Elisaia kowe la hlue i nyidrë ka hmengöhmengöne hnei xou, hna hape: “The xou kö, ke ala nyimu shë, nge ala xalaithe pe hi angat.” (2 Ite jo. 6:15-17) Enehila, kola thupëne hnene la trongene isi Iehova e hnengödrai, la itre ewekë ne la hmi ka wië, tune lo hneijine i Elisaia. Easë a mejiune kowe la itre drai hne së hna qëmeke kow. Iehova kö la mus. Thatreine kö la itre nöje troa isi me Nyidrë. Hnei Nyidrëti hna acile la Hupuna i Nyidrë troa mus. “Manathithi angat’ asë angete lapaune koi nyidë.”—Sal. 2:1-6, 12.

Thaa tro kö nyipunieti a thëthëhmine itre trejine trahmanyi me föe laka, eahuni a wangatrunyi nyipunie, nge nyipunieti pala hi ngöne la itre mekune hun. Ame la aliene la itre thithi hun, ke ene laka, troa isa “cile huti nyipunie nge pë ethan, me kapa hnyawa la aja i Akötesie asë.”—Kol. 4:12.

Itre trejine me nyipunie,

Collège Central des Témoins de Jéhovah