Iehova a Xatua Nyio Troa ‘Eng Ngöne La Götran Hna Ami Nyio’

Hnei Mats me Ann-Catrin hna sine la Ini Gileada lo 1979. Ame ngöne la itre macatre thupen, hna upi nyidro a tro Iran, me Maurice, me Birmanie, me Tanzanie, me Ouganda, me Zaïre. Hnei nyidro hna kapa la eamo e caha e Gileada qaathene la ketre trejin ka hamë ini, ene Jack Redford. Celë hi ka xatua nyidro ngöne la itre nöj hna upi nyidro. Eje hi, kösë anyimua “traa” nyidro, me “feji” nyidro matre “trane hmaca” ngöne la ketre götran. Tro sa drei nyidro.

Mats, pane qaja jë koi hun la aqane atre nyipë la nyipici.

Mats: Ame ngöne la Hnaaluene Isi Ka Tru, kaka e Pologne, nge öhne hi nyidrë la aqane huliwa thoi la Hmi Katolik. Ngo öni nyidrë, “Atre hi ni ka hape, hetre nyipi hmi!” Hnenge hna jelenyipicin e thupen la hna qaja hnei kaka. Ame ekö, eni a lapa itö itus hna servine hë, nge öhne ju hi ni la ketre itus ka bulu hna hape, La vérité qui conduit à la vie éternelle. Hna ketri ni hnene la tane la itus, matre ame ju kö la jidri cili, hnenge hna e asë la itus. Ame lo hmakany, xecie hë koi ni laka, celë hi la nyipici!

Qane lo Eiperem 1972, nyimu itus qaathene la itre Temoë Iehova hnenge hna e, nge hna sa la itre hnyingeng göne la Tusi Hmitrötr. Ceitui eni memine lo atre saleme trootro ngöne la ceitune i Iesu, ka salemëne asë la itre ewekë i angeic matre itöne la penina ka tru alameken. Eje hi, hnenge hna “salemëne” maine nue la itre ini ka tru memine la ajang troa droketre, matre itöne la “penina,” ene la nyipici. (Mat. 13:​45, 46) Matre ame lo 10 Diseba 1972, hnenge hna xomi bapataiso.

Ame lo macatre thupen, hnei kaka me nenë memine la jining hna hane kapa la nyipici me xomi bapataiso. Ame lo Julai 1973, hnenge hna xom la huliwa ne pionie lapa. Nge ame ngöne la gurup ne pionie ne la ekalesia, hnenge hna öhnyi Ann-Catrin, ketre trejin föe ka mingöming, nge ka hnimi Iehova. Hnei nyio hna pane iatre me faipoipo lo 1975. Ame ngöne la 4 lao macatre thupen, hnei nyio hna lapa e Strömsund ketre traon e Suède, nge tru catr la itre atr e cili ka pi ini Tusi Hmitrötr.

Ann-Catrin: Hnei kaka hna atre la nyipici lo nyidrëti pala kö a ini ngöne université e Stockholm. Eni petre hi a köni treu, nge nyidrëti fe hë a xomi ni troa sine la itre icasikeu, me cainöj trootro. Tha madrine kö nenë, matre hnei eahlo hna thel troa jelethoine la itre Temoë. Ngo tha eatre ju kö la mekuna i eahlo, matre e thupen, hnei eahlo fe hna xomi bapataiso. Ame ni, hnenge hna bapataiso lo eni a 13 lao macatre, nge ame la eni a 16 lao macatre, hnenge hna pionie. Thupene la eni a cainöj e Umeå, ketre götrane gaa aja ixatua, hna acili ni troa pionie hut.

Thupene la nyio a faipoipo, alanyim la itre atr hnei nyio hna xatuane troa atre la nyipici. Ame la ketre ke, Maivor, ketre neköjajinyi ka nue la sport matre nyihlue i Iehova. E thupen, hnei angeic hna ce pionie memine la neköi jining. Ame lo 1984, hnei nyidro hna sine la ini Gileada, nge nyidro pala hi enehila a mesinare e Équateur.

Ame ngöne la itre götrane hnei epon hna mesinare, tune kaa la aqane trongëne epon la eamo celë, “enge jë ngöne la götrane hna ami epun”?

Mats: Anyimua saze götrane nyio. Ame la ka xatua nyio, ke troa xötrethenge la tulu i Iesu, ene la troa ipië. (Kol. 2:​6, 7) Tha hnei nyio kö hna treqene tro la itre trejin a saze la aqane mele i angatr koi nyio. Ngo hnei nyio pe hna thel troa trotrohni angatr. Aja i nyio troa trotrohnine la aqane waiewekë i angatr, me qenenöje i angatr. Ame la nyio a nyitipu Iesu, ceitu nyio memine la ketre sinöe “hna traan ezine la tim,” nyio a eng ngöne la nöjei götrane hna upi nyio.​—Sal. 1:​2, 3.

Ann-Catrin: Tro la ketre feja hna fej me tran hmaca a cia, e troa hetre jö. Iehova hi la “jö” koi nyio. (Sal. 84:11) Hnei nyidrë hna hamëne la itre trejin ka lolo thiina, nge ka ihnim. Ame la aqane ikepe ne la itre trejin ne la neköi ekalesia i nyio e Téhéran (Iran), ke ceitune hi memine la aqane ikep ne la itre hlue i Iehova ngöne la Tusi Hmitrötr. Madrine catre nyio troa lapa e Iran, ngo ame lo Julai 1980, hna wathebone la hmi së, nge hna nue hi la 2 drai koi nyio troa feke qa cili. Nge hna upi nyio pena a tro Zaïre (Congo enehila) e Afrique.

Hnenge hna treij la kola thuemacanyi nyio ka hape, kola upi nyio a tro Afrique. Eni a xou ke, hnenge hna dreng ka hape, tru catr hnei un me itre sine mec. Ngo önine la lue sinee i nyio ka cainöj ekö e cili ka hape: “Tha traqa pala kö epon e koilo! The xou kö, tro kö epon lai a öhn, ka lolo e Afrique.” Nyipici nyidroti hi! Ka lolo catr la thiina ne la itre trejin, nge ka ihnim. Thupene la 6 lao macatre, hnei nyio hna fek qa Afrique ke, hna wathebone la hmi së. Ame la eni a thithi koi Iehova, eni a nango hnyimahnyima, ke öninge koi Nyidrë, “Nyio a sipo nyipë, pi tro kö nyio a lapa e Afrique.”

Nemene la itre manathith hnei epon hna kapa?

Mats: Hnei nyio hna nyisineene la itre mesinare ka traqa qa ngöne la itre xaa nöj. Ketre, ame ngöne la itre xaa nöj hna upi nyio kow, tru catr la itre atr hnei nyio hna ini Tus memin. Ame itre xaa ijin, isa 20 lao atr hnei nyio hna ini Tusi kow! Nge thatreine kö ni thëthëhmin la ihnim me aqane ikep ne la itre trejin e Afrique. Ame la nyio a wang la itre trejin e Zaïre, alanyim la itre trejin ka ham atrun, “goi sasaithe fe la hnei angatr hna hetreny.” Angatr a nue nyio troa acili loto, ene la Combi Volkswagen, ezine la uma i angatr, nge angatre fe a hamën la hnei nyio hna bezoë. (2 Kor. 8:3) Nge ame la hnei nyio hna lapa treqen e nöjei hej, ke ene la troa porotrikën la hnei nyio hna kuca ngöne la drai, me olene koi Iehova la hna ce me nyio.

Ann-Catrin: Ame la madrine ka tru koi ni, ke troa ce huliwa memine la itre trejin e cailo fen. Hnei nyio hna inine la itre qene hlapa ka hnyipixe, tune la qene Persan, me qene Wiwi, me qene Luganda, me qene Swahili. Nge hnei nyio hna öhne la itre xaa aqane mel ka lolo. Hnei nyio fe hna inine la itre atr troa atre drei Iesu, me öhnyi nyipi sinee me “cas” me angatr ngöne la huliwa i Iehova.​—Zef. 3:9.

Ketre, nyio a madrin troa öhne laka, isapengöne kö la itre ewekë hnei Iehova hna xup. Ame la kola upi nyio kowe la ketre götran, kösë nyio a ihamë ngöne la ketre nöj, nge Iehova la ka iuji nyio. Maine patre ju Nyidrë, tha tro kö nyio lai a atre la itre xaa ewekë.

Nemene la itre jol hnei epon hna cile kow, nge nemene la ka xatua epon?

Mats: Ame ngöne la itre macatre, hna tithi nyio hnene la itre mec tune la paludisme. Nge anyimua xöje Ann-Catrin. Ketre, nyio a hnehengazo ke, kola utipië trootro la keme me thine i nyio. Ngo nyio a olene catrëne kowe la itre jini nyio, la hna thupë angatre hnyawa. Hnene la itre jini nyio hna eatrëne hnyawane la hnëqa cili cememine la xomihni, me madrin, me ihnim. (1 Tim. 5:4) Ame itre xaa ijin, nyio a nango dekurag, ke nyio a ajan troa ce lapa memine la keme me thine i nyio. Ngo nyio hi a xatua angatr qa gaa nany.

Ann-Catrin: Ame lo 1983, lo nyio e Zaïre, hna tithi ni hnei choléra. Ka ngazo catr la mecing. Önine la droketre koi Mats, “Canga bëeke sai angeice jë a tro Suède!” Ame ju kö la drai thupen, casi hi la avio ka tro Suède, nge hnei nyio hi lai hna xom.

Mats: Hnei nyio hna treij latresi ke, mekuna i nyio ka hape, tro hë nyio a nue la huliwa ne mesinare. Önine la droketre ka hape, tha tro kö a lolo la meci Ann-Catrin, ngo egöcatre hmaca pi angeic. Matre ca macatre thupen, hnei nyio hna bëeke hmaca a tro Zaïre, ngöne la ketre ekalesia ka co ka qene Swahili e Lubumbashi.

Ann-Catrin: Ame la nyio e Lubumbashi, hna uthith la upuneng. Ngacama tha mekune kö nyio troa hetre nekönatr, ngo ketre hace ka tru lai koi ni. Eloine pe, ame ngöne la ijine cili, hnei Iehova hna aijijë nyio troa nyiqane la itre ini Tus, nge tru ju kö hun ekö. Tha ca macatre ju kö, nge kola elë la etrune la itre ka cainöj trootro, 35 koi 70, memine fe la itre ka sine la itre icasikeu, 40 ekö, nge hna elë koi 220. Tru catr la itre huliwa i nyio ngöne la hna cainöj, nge itre manathithi Nyidrë a akeukawanyi ni. Ngo nyio pala hi a mekun la nekö i nyio me qeje nyën. Nyio a lapa treqene la ijine tro Iehova a ameune la hni ne la itre ka akötr.

Mats: E thupen, hnei Ann-Catrin hna nyiqane kucakuca. Nge hna öhne theng la ketre cancer stade 4 ngöne la xel. Matre hna xöji ni. Ngo ame hë enehila, egöcatre hi ni, nge Ann-Catrin pala hi a isine troa amadrinë Iehova.

Hnei nyio hna öhne laka, tha nyio casi kö la ka cil kowe la itre itupath. Thupene la ihumuth ka tru e Rwanda lo 1994, hnei nyio hna tro troa iöhnyi memine la itre trejin ngöne la itre camps de réfugiés. Hnei nyio hna öhne la lapaune i angatr, me aqane catre i angatr me ikep. Nyio a jelenyipicine laka, atreine hi Iehova xatuane la itre hlue i Nyidrë ngöne la itre itupath.​—Sal. 55:22.

Ann-Catrin: Hnei nyio hna cil kowe la ketre itupath thupene la kola ase löth la Bethela e Ouganda lo 2007. Hnei nyio hna ti minibus a tro Nairobi e Kenya, memine la 25 lao mesinare me itre ka huliwa ngöne la Bethela. Ame hë la eahuni a traqa e Kenya, hnene la ketre minibus ka traqa qëmeken hna jei eahun. Meci hë lo ka jei eahun, memine la 5 lao trejin. Nge ame la ketre trejin föe, hna meci pë hë e pital. Eahuni a lapa treqene la ijine troa iöhnyi hmaca me angatr!​—Iobu 14:​13-​15.

Lolo hmaca ni thupene la aksida. Ngo hnenge me Mats memine la itre xaa trejin ka ti minibus hna meci fë xou pine lo lai aksida. Ame ni, kola traqa la xou e jidr, kola ngazo la wenethëhming kösë eni a kriz. Matre tha loi kö ni. Ngo hna akeukawanyi nyio hnene la thith me itre xötr hnei nyio hna lapa pi e ngöne la Tusi Hmitrötr. Ketre, hnei nyio hna thele ixatua thei droketre, nge hetre thangane catr. Kola moië trootro la meci nyio, nge nyio pala hi a sipo Iehova troa xatuane la itre ka meci fë xou tui nyio.

Ame la epon a qaja la itre itupath ka traqa koi epon, epon a qaja ka hape, hnei Iehova hna xepi epon “tune la aqane xom acone la wakuja.” Kola hapeue lai?

Mats: Ketre hna ithanata lai qene Swahili hna hape, “Tumebebwa kama mayai mabichi,” kola hape, “Hna xepi së tune la aqane xom acone la wakuja.” Tune la aqane xom acone la wakuja wanga kaqa pi, hnei Iehova hna xepi nyio ngöne la nöjei götrane hna upi nyio kow. Hnei Nyidrëti hna hamë nyio la ka nyipiewekë, me hamën atrune hmaca kö. Jëne la ihimi ne la Lapa Ne Xomi Meköt, nyio a öhne la ihnim me ixatua i Iehova koi nyio.

Ann-Catrin: Eni a pi qaja la aqane xatua nyio hnei Iehova. Ame la ketre drai, hna thuemacanyi ni ka hape, kaka hë e pital, nge hace catr la meci nyidrë. Hna tithi Mats hnei paludisme, nge nyidrë petre hi a lolo. Matre pëkö manie i nyio troa nyithupei bie a tro Suède. Nyio ha mekun troa salemëne la loto i nyio. Ngo e thupen, lue ka hë nyio. Ame la pan, ke lue trefën. Atre hi nyidro la ka traqa koi nyio, matre aja i nyidro troa nyithupene la ketre bie. Nge ame la hnaaluen, ke ketre trejin ka qatre föe. Hnei eahlo hna ami mani acon ngöne la neköi kes hna makën ka hape, “Thatraqane la itre ka aja ixatua.” Nge aja i eahlo troa xatua nyio. Matre tha ca hawa ju kö, nge Iehova fe hë a xatua nyio!​—Heb. 13:6.

Nemene la itre ini hnei epon hna kapa qa ngöne la 50 lao macatre ne nyihlue i Iehova drai ka pexej?

Ann-Catrin: Hnenge hna öhne laka, ame la trengecatre së, ke ene la “troa lapa thaup me mejiun.” Ame la easa mejiune koi Iehova, Nyidrëti a isigöli së. (Isa. 30:15; 2 Aq. Jo. 20:​15, 17) Hnei nyio hna huliwa catr koi Iehova ngöne la itre nöj hna upi nyio kow, matre tru catr la hna amanathithi nyio hnei Nyidrë. Maine tha huliwa i Nyidrëti ju nyio, ke tha tro kö nyio a kapa la itre manathith cili.

Mats: Ame la ini ka tru hnenge hna kapa, ke loi e tro ni a mejiune koi Iehova ngöne la nöjei jol ka traqa koi ni, me wang la aqane xatua ni hnei Nyidrë. (Sal. 37:5) Hnei Nyidrëti pala hi hna xatua ni. Nge ame enehila, ngöne la Bethela ne Birmanie, nyio a öhne laka, ce Nyidrëti pala hi me nyio.

Aja i nyio tro la itre jeunes ka akökötrene la huliwa ne cainöj a hane öhne la ihnimi nyipici i Iehova, tui nyio. Tro kö lai a traqa, e tro angatr a nue Iehova troa iuji angatr ngöne la itre götrane hna ami angatre ngön.