Atre Fe Hi Epun?
Pine nemen matre hetre itre trenyiwa ngöne la trongene isi Dravita Joxu?
AME la itre xaa trenyiwa ka hane sine la trongene isi Dravita, ke Zelek atre Amona, Uria atre Heth, me Ithema atre Moaba.a (1 Aq. Jo. 11:39, 41, 46) Hna hane fe ce tro me angatre hnei “angete Kerethi, me Pelethi, me Gatha.” (2 Sam. 15:18) Kola mekun ka hape, ame la angetre Kerethi me Pelethi ke, itre sinee ne la angetre Filisiti. (Ezek. 25:16) Ngo ame la angetre Gatha, ke itre ka fetra qa Gatha, traone i angetre Filisiti.—Ios. 13:2, 3; 1 Sam. 6:17, 18.
Pine nemen matre Dravita a hëne la itre trenyiwa troa sine la trongene isi angeic? Pine laka, öhne hi Dravita laka, itre ka mele nyipici koi angeic, me koi Iehova. Kola qaja hnene la ketre itus ka qejepengöne la Tusi Hmitrötr göi angetre Kerethi me Perethi ka hape: “Hnei angatr palahi hna nyipici koi Dravita ngöne lo kola traqa la itre jole ka tru ngöne la musi angeic.” Ame lo kola trotriji Dravita hnene la “angetre Isaraela asë” matre xötrethenge Seba, lo lai ka icilekeu, ke lapa ju pe hi la angetre Kerethi me Pelethi. Goi xatua Dravita fe hnei angatr troa cil koi Seba. (2 Sam. 20:1, 2, 7) E thupen, ame lo Adonia ketre nekö i Dravita a thel troa thapa la theron, ke hnei angatr hmaca hna mele nyipici koi Dravita. Hnei angatr hna xatua Dravita troa acili Solomona, atr hna iën hnei Iehova troa joxu e thupen.—1 It. Jo. 1:24-27, 38, 39.
Itai lo atre Gatha, la ketre trenyiwa ka mele nyipici koi Dravita. Hnei Itai memine la ala 600 lao trahmany hna xatua Dravita, lo ijin Abasaloma a icilekeu, me thele troa iaöne la angetre Isaraela. Öni Dravita koi Itai ka hape, pine laka trenyiwa angeic, tha kolo kö a musinë angeic troa hane isi. Ngo öni Itai: “Qëmeke i Iehova Akötresie ka mel, me qëmeke i nyipë joxung, ame la jë i nyipë, ke jënge fe, göi mec maine mel!”—2 Sam. 15:6, 18-21.
Hnei Itai hna mele nyipici koi Dravita lo joxu hna iëne hnei Iehova
Ngacama itre trenyiwa la angetre Kerethi me Pelethi, me angetre Gatha, ngo atre hnyawa hi angatr laka, Iehova hi la nyipi Akötresie nge Dravita la hnei nyidrëti hna iën. Drei jë kö la madrine i Dravita la kola ce me angeic hnene la itre atr ka mele nyipici!
a Thenge la wathebo i Akötresie ngöne Dreuteronomi 23:3-6, hmitrötr tro la angetre Amona me angetre Moaba a “hane sine la icasikeu” ne la angetre Isaraela. Kolo hi lai a qaja ka hape, tha ijiji angatre kö troa hane sine la nöje Isaraela, me kuca la itre hna amekötine koi angetre Isaraela. Ngo tha hna wathebone kö kowe la itre trenyiwa troa ce mel memine la angetre Isaraela, me ce lapa me angatr. Wange ju la itus Étude perspicace des Écritures, volume 1, g. 100.