The Xouene Kö La Pun La Fen Celë

Easenyi catre hë tro Iehova a apatrene la fen celë. Nge ame la kola troa cas la itre nöj matre lepe la nöje i Iehova, ke e cili hi la tro Nyidrëti a apatrenyi angatr, e Amagedro. Itre hlue i Iehova pe hi a treqene la ijin cili.

Thatre hnyawa kö së la aqane trongene elanyi la akötr atraqatr. Thatre kö së la drai hna sa. Nge thatre kö së la kepin, matre tro la itre mus a lep la hmi ka thoi. Thatre kö së la aqane tro la itre mus a thel troa lepe la nöje i Akötresie me ijine troa fenes. Ketre, thatre hnyawa kö së la itre jiane isi hnei Iehova hna troa huliwan, matre apatrene la itre ithupëjia ngöne la isi Amagedro.

Ngo Tusi Hmitrötr a hamë së la itre ithuemacany ka troa xatua së troa mejiun kowe la itre drai elany. Atre hi së laka, easa melëne “la itre drai ne la pun.” (2Ti 3:1) Ketre atre hi së laka, troa “ahopatrene” la ijine troa lepe la hmi ka thoi, matre tha tro kö a patre la nyipi hmi. (Ma 24:22) Nge atre fe hi së laka, tro Iehova a amelene la nöje i Nyidrë. (2Pe 2:9) Ame la atr hnei Iehova hna acil troa apatrene la itre ithupëjia, me thupëne la ka alanyimu atraqatr ngöne la ijine isi Amagedro, ke ka meköt me trene men.​—Ama 19:11, 15, 16.

Tro la itre atr a “menumenu hnei xou” qëmekene la itre ewekë ka troa traqa. Ngo, ame la easa e me lapa mekun la itre hnei Iehova hna kuca ekö, matre amelene la itre hlue i Nyidrë, me itre hnei Nyidrëti hna troa kuca elany, ijiji hi tro sa ‘mejë me gala draië, ke easenyi hë la iamele.’​—Lu 21:26, 28.